V2025

செய்தி

"என்டர்பிரைஸ் ஸ்ரீலங்கா" நடமாடும் சேவை தம்புள்ளையில்!

"என்டர்பிரைஸ் ஸ்ரீலங்கா" இரண்டாவது நடமாடும் சேவை, ஆகஸ்ட் 24 - 25 ஆம் திகதிகளில் தம்புள்ள, பெல்வெஹெர விவசாயக் கல்லூரியில் நடைபெறவுள்ளது என நிதியமைச்சு அறிவித்துள்ளது.

நிதியமைச்சினால் இன்று (22) வெளியிடப்பட்ட ஊடக அறிக்கையில் கூறியிருப்பதாவது. 

தொழில் முயற்சியாளர்களுக்கான வட்டி நிவாரண கடன்களை வழங்கும் "என்டர்பிரைஸ் ஸ்ரீலங்கா" இரண்டாவது நடமாடும் சேவை, ஆகஸ்ட் 24 - 25 ஆம் திகதிகளில் தம்புள்ள பெல்வெஹெர விவசாயக் கல்லூரியில் நடைபெறவுள்ளது

காலை 7.30 மணி முதல் மாலை 5.00 மணி வரை நடைபெறும் இந்த நடமாடும் சேவையின் ஆரம்ப நிகழ்வில், நிதி இராஜாங்க அமைச்சர் எரான் விக்ரமரத்ன பிரதம அதிதியாகக் கலந்துகொள்வார்.

நிதியமைச்சர் மங்கள சமரவீர அவர்களினால் 2019 ஆம் ஆண்டு வரவு-செலவுத் திட்டத்தில் முன்மொழியப்பட்டு, அறிமுகப்படுத்தப்பட்ட என்டர்பிரைஸ் ஸ்ரீலங்கா வேலைத்திட்டத்தின் ஊடாக, ஒரு இலட்சம் தொழில்முயற்சியாளர்களை உருவாக்கும் நோக்கில், நிதியமைச்சினால் துரிதமான விரிவாக்கப்பட்ட ஒரு செயற்திட்டமாக, இந்த நடமாடும் சேவை ஏற்பாடு செய்யப்பட்டுள்ளது.

சுயதொழில், வியாபாரம், கைத்தொழில் ஒன்றை ஆரம்பிக்க எதிர்பார்த்திருக்கும் சுயதொழில்முயற்சியாளர்களான இளைஞர் சமுதாயத்துக்கு, நிவாரண வட்டி விகிதத்தில், அடிப்படை மூலதனம் ஒன்றை பெற்றுக்கொடுப்பதே என்டர்பிரைஸ் ஸ்ரீலங்கா செயற்திட்டத்தின் பிரதான நோக்கமாகும்.

தம்புள்ளையில் நடைபெறும் இந்த நடமாடும் சேவையின் ஊடாக, வியாபாரம் ஒன்றை அல்லது கைத்தொழில், விவசாய நடவடிக்கைகளை ஆரம்பிக்க எதிர்ப்பார்ப்புடன் காத்திருக்கும் நபர்களுக்கு, வங்கி மூலம் மூலதன நிதியை பெற்றுக்கொள்வதற்கு தேவையான வழிகாட்டுதல்களையும் ஆலோசனைகளையும் இங்கு பெற்றுக்கொள்ள முடியும்.

வங்கிகளினூடாக கடன் பெற்றுக்கொள்வதற்கு அவசியமான வணிக திட்டங்களை தயாரிப்பதற்கு ஆலோசனைகளை பெற்றுகொண்டு, அன்றைய தினமே, குறிப்பிட்ட வியாபாரம் தொடர்பில், அவர்களது திட்டங்களை வங்கிக்கு சமர்ப்பிக்க தேவையான ஒத்துழைப்பை வழங்கும் நோக்கில், பல்கலைக்கழக விரிவுரையாளர்களின் பங்கேற்புடன் செயற்திட்டம் ஒன்று முன்னெடுக்கப்படவுள்ளது.

ஆகையால், கடன் பெற்றுக்கொள்வதற்கு எதிர்பார்த்திருப்பவர்கள், தமது வியாபாரம் தொடர்பிலான அடிப்படை தகவல்களை எடுத்துக்கொண்டு வரவேண்டுமென ஏற்பாட்டுக் குழு வேண்டுகோள் விடுத்துள்ளது.

இலங்கை வங்கி, மக்கள் வங்கி, பிரதேச அபிவிருத்தி வங்கி உள்ளிட்ட அரச வங்கிகளின் நடமாடும் சேவை அலுவலகங்கள் இங்கு காணப்படும் அதேவேளை, பல்வேறு கடன் ஆலோசனை திட்டங்களுக்கு தேவையான ஒப்புதல்கள், அனுமதிப்பத்திரங்கள் மற்றும் தொழில்நுட்ப ஆலோசனைகளை வழங்கும் அரச நிறுவனங்களின் பிரதிநிதிகளின் அலுவலகங்களும் இங்கு அமைக்கப்பட்டுள்ளன.

சுற்றுலாத்துறை உள்ளிட்ட சிறிய மற்றும் நடுத்தர வியாபாரங்களுக்கு தேவையான தொழில்நுட்ப ஆலோசனைகளை வழங்குவதற்காக, கைத்தொழில் அபிவிருத்தி சபையின் காரியாலயம் ஒன்றும் இந்த நடமாடும் சேவையில் உள்வாங்கப்பட்டுள்ளது.

விவசாய பிராந்தியமான தம்புள்ளை, சுற்றுலாத்தளத்தை ஈர்க்கக் கூடிய பிரபலமான பிரதேசமாக காணப்படுவதால், சுற்றுலா தொடர்பான சேவைகளை ஆரம்பிப்பதற்கு தேவையான ஒத்துழைப்பு மற்றும் அனுமதியை, சுற்றுலா அபிவிருத்தி சபையிடமிருந்து பெற்றுக்கொண்டு, தமது வியாபார நடவடிக்கைகளை துரிதமாக ஆரம்பிக்க இந்த நடமாடும் சேவை ஒரு சிறந்த வாய்ப்பாக இருக்கும்.

 எம். அலி ஹசன்,

செய்திப் பணிப்பாளர்.

Comment (0) Hits: 1

ரணிலின் சகோதரரின் 'TNL' இன் மங்களவுக்கு சேறு பூசும் ஒப்பந்தம்! (VIDEO)

எதிர்வரும் ஜனாதிபதித் தேர்தலில் ஐ.தே.கவின் வெற்றிக்கு சிறந்த வேட்பாளராக, தான் சஜித் பிரேமதாசவை கருதுவதாக அமைச்சர் மங்கள சமரவீர் பகிரங்கமாக அறிவித்திருந்தார்.

இதனால் அமைச்சர் மங்களவை இலக்கு வைத்து, பிரதமர் ரணில் விக்ரமசிங்கவின் சகோதரரின் டி.என்.எல் (TNL)அலைவரிசை அவர் மீது சேறு பூசும் நடவடிக்கையை ஆரம்பித்துள்ளது. கடந்த சில நாட்களாக டி.என்.எல் அலைவரிசை, தனது செய்திகளில் மங்களவை தாக்கும் படலத்தை தீவிரப்படுத்தியுள்ளது, 

அமைச்சர் சஜித் பிரேமதாச பங்கேற்கவுள்ள பேரணி நாளை (23) மாத்றையில் நடைபெறவுள்ளது. 

இந்த பேரணியை அமைச்சர் மங்கள ஏற்பாடு செய்துள்ளமையே, டி.என்.எல் அலைவரிசையின் இந்த செயலுக்கு காரணம் என தெரிவிக்கப்படுகின்றது.

இந்த நிலையில் அமைச்சர் மங்கள சமரவீர தனது டுவிட்டரில் இன்று (22) பதிவொன்றை இட்டு. இவ்வாறு தெரிவித்துள்ளார்.

"டி.என்.எல் இன் செய்தி பிரிவுக்கு பொறுப்பான இஷினி விக்ரமசிங்கவுக்கு நன்றி. காரணம் நீங்கள் எனக்கு பகுதிநேர விளம்பரம் வழங்குகின்றீர்கள். மாத்றையில் நாளை வரலாற்று முக்கியதுவமிக்க பேரணி நடைபெறவுள்ளது"
SAM

பிரதமர் ரணில் விக்ரமசிங்கவின் சகோதரர் ஷான் விக்ரமசிங்கவின் மகள் இஷினி விக்ரமசிங்க. இவர் மங்கள சமரவீர அவர்கள், நல்லாட்சி அரசாங்கத்தின் ஊடக அமைச்சராக இருந்த குறுகிய காலத்தில் அவரின் பிரத்தியேக செயலாளராக கடமையாற்றினார்.

எவ்வாறாயினும், அமைச்சரிடம் பேசிய காரசாரமான வார்த்தைகளுக்காக இறுதியில், அவர் தனது பதவியை இராஜினாமா செய்ய வேண்டியேற்பட்டது.
இந்த நிலையில், ஜனாதிபதி தேர்தலில் தனது மாமனாருக்கு (ரணிலுக்கு) ஆதரவளிக்காவிடின், தமது குடும்பத்தினர் அனைவரும் கோத்தாபய ராஜபக்ஷவுக்கு ஆதரவளிப்பார்கள் எனவும் இஷினி விக்ரமசிங்க கூறியுள்ளார்.

இஷினி விக்ரமசிங்க தற்போது பிரதமர் அலுவலகத்தின் ஊடக ஆலோசகராக பணியாற்றி வருகிறார்.

இதேவேளை, இஷினி விக்ரமசிங்க, கோத்தாபய ராஜபக்ஷவின் ஆலோசகரான திலித் ஜயவீரவக்கு சொந்தமான வுசயைன Triad Advertising நிறுவனத்தின் பணிப்பாளராக உள்ளமை குறிப்பிடதக்கது.

Comment (0) Hits: 7

ராஜபக்ஷ அரசு குறித்து ஊடகவியலாளர் லசந்த எழுதிய மரண சாசனம்!

இலங்கையிலிருந்து வெளியாகும் சண்டே லீடர் என்ற ஆங்கில வாரப்பத்திரிகையின் முதன்மை ஆசிரியராக பணியாற்றிய லசந்த விக்ரமதுங்க, 11-01-2009 வெளியாக வேண்டிய இதழுக்காக கடந்த ஜனவரி 7ம் தேதி எழுதிய தலையங்கம் இது.

இதை எழுதிய அடுத்த நாளே அவர் அடையாளம் தெரியாத நபர்களால் சுட்டுக் கொல்லப்பட்டார்.

தனது மரணத்தின் பாதையை அறிந்திருந்த அவருடைய மரண சாசனமாக இந்த தலையங்கம் அமைந்துள்ளது.

ராணுவத்தைத் தவிர வேறு எந்த ஒரு தொழிலும் - தொழில் நிமித்தமாக - அந்த தொழில் புரிபவர்களின் உயிரை பலியாக கேட்பதில்லை; இலங்கையில் இந்த வகையில் பத்திரிகைத் தொழிலும் இருக்கிறது. கடந்த சில வருடங்களாக ஊடக சுதந்திரத்தின் மீதான தாக்குதல்கள் அதிகரித்து வருகிறது. மின்னணு மற்றும் அச்சு ஊடக நிறுவனங்கள் எரிக்கப்படுவதும், வெடிகுண்டு தாக்குதலுக்கு உள்ளாவதும், மூடப்படுவதும், பலவந்தமாக நிறுத்தப்படுவதும் தொடர்கதையாகி வருகிறது. எண்ணற்ற செய்தியாளர்கள் தாக்கப்படுகின்றனர், மிரட்டப்படுகின்றனர், படுகொலை செய்யப்படுகின்றனர். இந்த அனைத்தும் - கடைசி அம்சம் உட்பட - எனக்கும் பொருந்தும் என்பது எனக்கு மிகவும் சிறப்பு செய்வதாக உள்ளது.

பத்திரிகைத் தொழிலில் மிக நீண்ட காலமாக நான் இருந்து வருகிறேன். உண்மையில், இந்த 2009ம் ஆண்டு, சன்டே லீடர் பத்திரிகையின் 15ம் ஆண்டாகும். இந்த காலக்கட்டத்தில் இலங்கையில் பல மாறுதல்கள் நடந்துள்ளன. அவற்றில் பெரும்பாலான மாற்றங்கள் விரும்பத்தக்கவை அல்ல என்பதை நான் உங்களுக்கு சொல்லித் தெரிய வேண்டியதில்லை. எல்லையில்லா ரத்த தாகம் கொண்டவர்களால் இரக்கமற்று தொடுக்கப்பட்ட உள்நாட்டுப்போரின் மத்தியில் நாம் இருக்கிறோம். பயங்கரவாதிகளாலோ, அரசாங்கத்தாலோ ஏவப்படும் பயங்கரவாதம் என்பது நமது அன்றாட நிகழ்ச்சியாகிவிட்டது. சுதந்திரத்தை முடக்க விரும்பும் அரசு முக்கிய நடவடிக்கையாக படுகொலைகளை நிகழ்த்தி வருகிறது. இன்று பத்திரிகையாளர்கள் கொல்லப்படுகின்றனர். நாளை நீதிபதிகள் கொல்லப்படுவார்கள். இந்த இரு தரப்பினருக்கும் ஆபத்துகள் அதிகரிக்கின்றன. நம்பிக்கைதான் குறைந்து வருகிறது.

இருந்தபோதிலும் ஏன் இந்த தொழிலை தொடர்ந்து செய்கிறோம் என்று நான் அவ்வபோது ஆச்சரியப்படுவதுண்டு. நானும் ஒரு கணவன்தான். எனக்கும் மூன்று அருமையான குழந்தைகள் உள்ளனர். எனக்கும் கடமைகளும், பொறுப்புகளும் உள்ளன, நான் சட்டம் அல்லது பத்திரிகை ஆகிய எந்தத் துறையில் இருந்தாலும். ஆபத்துகளை விலை கொடுத்து வாங்குவது தேவைதானா? தேவையில்லை! என்றே பலரும் கூறுகின்றனர். நண்பர்கள் என்னை வழக்குரைஞர் தொழிலுக்குத் திரும்புமாறு கூறுகின்றனர். அத்தொழில் எனக்கு மேம்பட்ட மற்றும் பாதுகாப்பான வாழ்வைத் தரும் என்று அவர்கள் நம்புகின்றனர். மற்றவர்கள், குறிப்பாக இரு தரப்பிலும் உள்ள அரசியல் தலைவர்கள் அரசியலுக்கு வருமாறு என்னை அழைக்கின்றனர், நான் விரும்பும் துறைக்கு என்னை அமைச்சராக்குவதாகவும் கூறுகின்றனர்.

இலங்கையில் பத்திரிகையாளர்கள் சந்திக்கும் ஆபத்துகளை உணர்ந்த வெளிநாட்டுத்தூதர்கள், என்னை இலங்கையிலிருந்து வெளியேறுமாறும் - அவர்கள் நாட்டில் பாதுகாப்பாக வசிக்குமாறும் அழைக்கின்றனர். எனக்கு முன்னால் பல வாய்ப்புகள் இருந்தாலும், அதில் ஒன்றைக்கூட நான் செய்வதாக இல்லை.

உயர்ந்த பதவி, புகழ், செல்வம், பாதுகாப்பு போன்றவை அழைத்தாலும், அவற்றிற்கெல்லாம் மேலாக உள்ளுணர்வின் அழைப்பே முக்கியமாக இருக்கிறது.

நாங்கள் என்ன பார்க்கிறோமோ அதை, அவ்வாறே மண்வெட்டி என்றோ, திருடன் என்றோ, கொலைகாரன் என்றோ அப்படியே எழுதுவதால் சண்டே லீடர் பத்திரிகை சர்ச்சைக்குரிய ஒன்றாக விளங்குகிறது. நாங்கள் வார்த்தை விளையாட்டுகளுக்கு பின்னே பதுங்குவதில்லை. நாங்கள் வெளியிடும் புலனாய்வு செய்திகள் அனைத்தும் உரிய ஆதாரங்களுடன் வெளியிடப்படுகின்றன. அதற்காக ஆபத்து வரும் வாய்ப்புகள் இருப்பது தெரிந்தும் எங்களுக்கு ஆதாரங்களை வெளிப்படுத்தும் சமூகப்பொறுப்புள்ள மக்களுக்கு நன்றி தெரிவித்துக் கொள்கிறோம். நாங்கள் பல ஊழல்களை வெளிக்கொணர்ந்து இருந்தாலும் கடந்த 15 ஆண்டுகளில் நாங்கள் தவறு செய்துவிட்டதாக யாரும் நிரூபித்தது இல்லை. அதேபோல எங்களுக்கு எதிரான எந்த வழக்குகளும் வெற்றிகரமாக முடிக்கப்பட்டதும் இல்லை.

சுதந்திரமான பத்திரிகை என்பது கண்ணாடியாக இயங்கி ஒப்பனை இல்லாத உண்மையான சமூகத்தின் முகத்தை மக்களுக்குக் காட்டும். பத்திரிகைகளின் மூலமாகத்தான் நாட்டின் நிலை குறித்தும், நாட்டை நிர்வகிக்க தேர்ந்தெடுக்கப்பட்ட தலைவர்கள் குறித்தும் மக்கள் அறிந்துகொள்ள முடியும். இந்தத் தலைவர்கள்தான் குழந்தைகளுக்கு நல்ல எதிர்காலத்தை கொடுப்பதற்காக தேர்ந்தெடுக்கப்பட்டவர்கள். சில நேரங்களில் இந்த கண்ணாடியின் மூலம் நீங்கள் பார்க்கும் உருவம் மகிழ்ச்சி அளிப்பதாக இல்லாமல் இருக்கிறது. இந்நிலைக்காக நீங்கள் முணுமுணுத்துக் கொண்டிருக்கும் வேளையில், உங்களுக்காக அந்தக் கண்ணாடியை தாங்கிப் பிடித்துக் கொண்டிருக்கும் பத்திரிகையாளர்கள் மிகப்பெரும் ஆபத்தில் இருக்கின்றனர். இதுதான் எங்களுக்கான அழைப்பு - நாங்கள் புறக்கணிக்க முடியாத அழைப்பு.

ஒவ்வொரு பத்திரிகைக்கும் ஒவ்வொரு பார்வை இருக்கும், எங்கள் பார்வையை நாங்கள் மறைத்ததில்லை. இலங்கையை ஒரு வெளிப்படையான, மதசார்பற்ற, சுதந்திர ஜனநாயக நாடாக நாங்கள் பார்க்க விரும்பினோம். இந்த வார்த்தைகளுக்கு உள்ளே இருக்கும் பொருளை கவனியுங்கள். வெளிப்படையாக என்றால் அரசு என்பது மக்களுக்கு பதில் சொல்ல கடமைப்பட்டதாக, அரசு மீது மக்கள் வைத்துள்ள நம்பிக்கையை தவறாகப் பயன்படுத்தாததாக இருக்க வேண்டும். மதசார்பின்மை என்பது, பல்வேறு தேசிய இனங்களைக் கொண்ட - பல கலாசாரங்களைக் கொண்ட நம்முடைய சமூகத்தில் நாம் அனைவரும் ஒன்றிணைவதற்கான முக்கியமான கருத்தாகும். சுதந்திரம் என்பது, மனிதர்கள் பலவிதங்களில் வித்தியாசமாக படைக்கப்பட்டுள்ளனர் என்பதையும், அவர்கள் இருக்கும் முரண்பட்ட விதங்களிலேயே ஏற்றுக்கொள்வதுமாகும். நாம் விரும்பும் விதத்தில் அவர்கள் இருக்க வேண்டும் என்று கூறுவதல்ல. மேலும் ஜனநாயகம் என்பது... இது ஏன் முக்கியமானது? என்பதையும் நான் விளக்க வேண்டும் என்று எதிர்பார்த்தால், மன்னிக்கவும்! நீங்கள் இந்தப் பத்திரிகையை வாங்குவதை நிறுத்திவிடுவதே நல்லது.

பெரும்பாலானவர்கள் ஆதரிக்கிறார்கள் என்பதற்காக ஒரு கருத்தை கேள்வி கேட்காமல் எழுதுவதன் மூலம் - பிரதிபலிப்பதன்மூலம் சண்டே லீடர் பத்திரிகை பாதுகாப்பு தேடியதில்லை. கருத்து முரண்பாடுகளை எதிர்கொள்வதன் மூலமாகவே இதுவரை பத்திரிகையை நடத்தி வந்திருக்கிறோம். இத்தனை ஆண்டுகளாக நாங்கள் கூறிய கருத்துகள் மக்களில் பலருக்கும் சுவை அளிப்பதாக இல்லை என்பது தெரியும். உதாரணமாக, தனிநாடு கேட்கும் தீவிரவாதத்தை ஒடுக்கும் அதே நேரத்தில், பயங்கரவாதத்திற்கான மூல காரணங்களை கண்டறிந்து அவற்றையும் களைய வேண்டும் என்று தொடர்ந்து வலியுறுத்தி வருகிறோம். மேலும் இலங்கை இனப்பிரசினையை பயங்கரவாத பூதக்கண்ணாடி மூலமாக மட்டுமே பார்க்காமல், வரலாற்று நோக்கிலும் இந்தப் பிரச்சினையை பரிசீலிக்க வேண்டும் என்றும் கூறிவருகிறோம். பயங்கவாதத்திற்கு எதிரான போர் என்று கூறிக்கொண்டு சொந்த நாட்டு மக்கள் மீதே குண்டுகளை வீசி படுகொலை செய்வதை வழக்கமாக கொண்டுள்ள நாடு உலகிலேயே இலங்கை ஒன்றுதான் என்பதையும் எடுத்துக்கூறி அதை எதிர்த்து வருகிறோம். இத்தகைய கருத்துகளுக்காக நாங்கள் தேசவிரோதிகள் என்று முத்திரை குத்தப்படுகிறோம். இது உண்மையிலேயே தேசவிரோதம் என்றால் அதைப் பெருமிதத்துடன் ஏற்கிறோம்.

சண்டே லீடர் பத்திரிகைக்கு அரசியல் நோக்கம் இருப்பதாக பலரும் கருதுகின்றனர். ஆனால் உண்மையில் அப்படி இல்லை. எதிர்கட்சிகளை விமர்சனம் செய்வதைவிட தீவிரமாக அரசை விமரிசனம் செய்வது ஏனென்றால், கிரிக்கெட் விளையாட்டில் பேட்ஸ்மேனை தவிர்த்து, பீல்டிங் பகுதியில் பந்து வீசுவதில்லையோ, அதேபோல் ஆட்சியில் உள்ளவர்களுக்கு எதிராகத்தான் தீவிரமாக விமர்சனங்களை வைக்க முடியும்; எதிர்கட்சிகள் மீதல்ல. கடந்த காலத்தில் ஐக்கிய தேசியக் கட்சி ஆட்சியில் இருந்தபோதும், அந்த ஆட்சியின் அத்துமீறல்களை, ஊழல்களை வெளிக்கொணர்ந்து அன்றைய ஆட்சியின் தொண்டையில் சிக்கிய முள்ளாக நாங்கள் இருந்தோம். இத்தகைய எங்களின் போக்கும் அந்த ஆட்சி வீழக் காரணமாக இருந்தது.

போரை நாங்கள் எதிர்க்கிறோம் என்பதற்காக நாங்கள் தமிழீழ விடுதலைப்புலிகளை ஆதரிக்கிறோம் என்று அர்த்தமில்லை. உலகில் உள்ள மிகவும் இரக்கமற்ற - ரத்தவேட்கை கொண்ட இயக்கங்களில் ஒன்றாக அந்த இயக்கம் இருக்கிறது. அந்த இயக்கம் அழிக்கப்படவேண்டும் என்பதில் மாற்றுக்கருத்து இல்லை. ஆனால் அவ்வாறு கூறுவதால், தமிழ் மக்களின் மனித உரிமைகளை பறிப்பதையும், அவர்கள் மீது இரக்கமற்று துப்பாக்கிச்சூடு மற்றும் குண்டுமழை பொழிவதையும் ஏற்க முடியாது. ஏனெனில் அது தவறானது மட்டுமல்ல, புத்தரின் தம்மத்தை பாதுகாப்பதாகக் கூறும் நாம் வெட்கப்படவேண்டியதும் ஆகும். இத்தகைய அத்துமீறிய தாக்குதல்கள், செய்தித்தணிக்கை காரணமாக பொதுமக்களுக்கு உரியமுறையில் சென்று சேர்வதில்லை.

இதைவிட நாட்டின் வடக்கு-கிழக்குப் பகுதியில் குவிக்கப்பட்டுள்ள ராணுவத்தின் காரணமாக அப்பகுதியில் வசிக்கும் தமிழ் மக்கள், அவர்களின் சுயமரியாதையை இழந்து, நிரந்தரமாக இரண்டாம்தர குடிமக்களாக வசிக்க வேண்டிய அவலமும் ஏற்பட்டுள்ளது. போர் முடிந்த பின்னர், அப்பகுதியில் மறுசீரமைப்பு மற்றும் மேம்பாட்டு பணிகளை மேற்கொள்வதன்மூலம் சீற்றத்தை தணிக்கமுடியும் என்று கனவு காணக்கூடாது. இந்தப்போரின் ரணங்கள் நிரந்தர வடுக்களை ஏற்படுத்திவிடும். இதன் விளைவாக தமிழ் மக்களிடம் மேலும் கசப்புணர்வும், வெறுப்புணர்வுமே ஏற்படும். அதை சமாளிப்பது எளிதல்ல. அரசியல் ரீதியாக தீர்வு காணக்கூடிய ஒரு பிரச்சனை, அனைத்து தரப்பு மக்களையும் துன்புறுத்தக்கூடிய சீழ்ப்பிடித்த கொடுங்காயமாக மாறிவிடும். நான் கோபமடைந்தும், சலிப்புற்றும் இருக்கிறேன் என்றால், எனது நாட்டு பெரும்பான்மை மக்களும் - முழு அரசும் - வெளிப்படையாகத் தெரியும் இந்த உண்மையை பார்க்கத் தவறுவதால்தான்.

நான் இரண்டு முறை தாக்கப்பட்டதும், எனது வீடு துப்பாக்கி குண்டுகளால் துளைக்கப்பட்டதும் அனைவருக்கும் தெரியும். இந்த சம்பவங்கள் குறித்து உரிய விசாரணை நடத்துவதாக அரசுத்தரப்பில் உறுதி அளிக்கப்பட்டாலும், இந்த தாக்குதல் குறித்த விசாரணை நடத்தி, இந்தத் தாக்குதலுக்கு காரணமானவர்கள் கண்டுபிடிக்கப்படவில்லை. இந்த அனைத்து சம்பவங்களும் அரசின் தூண்டுதல் காரணமாகவே நடந்தது என்று நான் நம்புவதற்கு காரணங்கள் உள்ளன. இறுதியில் நான் கொல்லப்பட்டால், அரசுதான் என்னை கொன்றிருக்க வேண்டும்.

இதில் துயரமான வேடிக்கை என்னவென்றால், நானும் மஹிந்தாவும் கடந்த கால்நூற்றாண்டாக நண்பர்களாக இருப்பது பொதுமக்களில் பலருக்கும் தெரியாது. அவரை அவரது முதல் பெயரான ‘மஹிந்தா’ என்ற பெயரிலும், சிங்கள மொழியில் அழைக்கும் ‘ஓயா’ என்று அவரை இன்றும் அழைக்கும் மிகச்சிலரில் நானும் ஒருவனாக இருப்பேன். அதிபர் மாதத்திற்கு ஒருமுறை பத்திரிகை ஆசிரியர்களை சந்திக்கும் கூட்டத்திற்கு நான் செல்வதில்லை. எனினும் சில பின்னிரவு நேரங்களில் தனியாகவோ, நெருங்கிய நண்பர்கள் சிலருடனோ அதிபரின் இல்லத்திலேயே சந்தித்து அரசியலைப்பற்றியும், பழைய இனிமையான நாட்களைப் பற்றியும் பேசுவதுண்டு. இந்த இடத்தில் சில குறிப்புகளை கூற விரும்புகிறேன்.

நண்பர் மஹிந்தா!

கடந்த 2005ம் ஆண்டில் இலங்கை சுதந்திரக் கட்சியின் அதிபர் வேட்பாளராக நீங்கள் உருவெடுத்தபோது, எங்கள் பத்திரிகையைப்போல இதமான வரவேற்பு உங்களுக்கு வேறு எங்கும் கிடைக்கவில்லை. உண்மையில் உங்கள் முதல் பெயரை குறிப்பிடுவதன்மூலம் பல்லாண்டாக நடைமுறையில் இருந்த சம்பிரதாயங்களை உடைத்தோம். மனித உரிமைகள் மற்றும் சுதந்திரம் மீது அப்போது நீங்கள் கொண்டிருந்த கொள்கைகளுக்காக உங்களை நாங்கள் வரவேற்றோம். ஆனால் ‘ஹம்பன்டோடா’வுக்கு உதவும் முறைகேட்டில் நீங்கள் முட்டாள்தனமாக ஈடுபட்டபோது நாங்கள் கனத்த இதயத்தோடு அதை வெளியிட்டோம். மேலும் முறைகேடு செய்யப்பட்ட பணத்தை திருப்பி அளிக்கும்படியும் வலியுறுத்தினோம். அதை நீங்கள் பல வாரங்கள் கடந்து செய்தீர்கள். உங்கள் மீதான நன்மதிப்பில் மிகப்பெரும் தீயவிளைவை அது ஏற்படுத்தியது. அது உங்களை இன்றளவும் துரத்தி வருகிறது.

Rajapakse அதிபர் பதவி மீது உங்களுக்கு ஆர்வமில்லை என்று நீங்களே என்னிடம் கூறி இருக்கிறீர்கள். நீங்கள் அதிபர் பதவியைத்தேடி செல்லவில்லை: அப்பதவி தங்கள் மடியில் விழுந்தது. உங்கள் மகன்களே உங்களின் மகிழ்ச்சி என்றும், அரசு நிர்வாகத்தை உங்கள் சகோதரர்களிடம் ஒப்படைத்துவிட்டு, உங்கள் மகன்களோடு நேரத்தை செலவிடுவதே உங்களுக்கு விருப்பமானது என்றும் நீங்கள் கூறியிருக்கிறீர்கள். இப்போது எனது மகனுக்கும், மகளுக்கும் தந்தை இல்லாது போகும் சூழலில் அரசு நிர்வாகத்தை செம்மையாக நடத்துவது யார் என்பது அனைவருக்கும் தெரியவருகிறது.

எனக்கு மரணம் ஏற்படும்போது, நீங்கள் வழக்கமான சடங்குச் சொற்களை கூறுவதோடு, முழுமையான விசாரணை செய்யுமாறு காவல்துறைக்கு உத்தரவிடுவீர்கள் என்பது எனக்குத் தெரியும். ஆனால் இதே போன்ற மற்ற சம்பவங்களில் நடந்ததைப்போல இந்த விசாரணையிலும் எந்த உண்மையும் வெளிவராது என்பதும் எனக்குத் தெரியும். ஆனால் உண்மையைச் சொன்னால், எனது மரணத்திற்குப் பின்னால் யார் இருப்பார்கள் என்பது நாம் இருவருக்கும் தெரியும், அந்த பெயரைச் சொல்லும் துணிவு உங்களுக்கு இல்லாவிட்டாலும்கூட. ஏனெனில் என் வாழ்க்கையோடு, உங்கள் வாழ்க்கையும் அந்த உண்மையில் சிக்கியிருக்கிறது.

இலங்கை தேசம் குறித்து நீங்கள் இளமையில் கண்ட கனவுகள், நீங்கள் அதிபராகப் பதவியேற்ற இந்த மூன்று ஆண்டுகளில் உடைந்த செங்கற்களைப்போல தூள்தூளாகி விட்டது. தேசபக்தி என்ற பெயரில் மனித உரிமைகளைப் பறிப்பதிலும், ஊழல் சாம்ராஜ்யத்தை உருவாக்கியதிலும், பொதுமக்களின் வரிப்பணத்தை சூறையாடியதிலும் மற்றெந்த அதிபரையும்விட நீங்களே மிஞ்சி இருக்கிறீர்கள். உண்மையைச் சொல்லப்போனால், பொம்மை கடையில் இறக்கிவிடப்பட்ட குழந்தையைப்போல நீங்கள் இருக்கிறீர்கள். ஆனால் அந்த உதாரணம்கூட உங்களுக்குப் பொருந்தாது. ஏனெனில் நீங்கள் இந்த மண்ணில் ஏற்படுத்திய ரத்தக்கறையையும், குடிமக்களின் மனித உரிமைகளைப் பறித்ததையும்போல எந்தக் குழந்தையாலும் செய்ய முடியாது. நீங்கள் பதவி போதையில் மூழ்கி இருப்பதை உங்களால் உணரமுடியாது: இந்த போதை தலைக்கேறிய நிலையில் உங்கள் மகன்கள் இருப்பதைப் பார்த்து நீங்கள் வருந்தும் நிலை ஏற்படலாம். அது துயரத்தையை கொண்டுவரும். என்னைப் பொறுத்தவரை, தெளிவான மனநிலையில் என்னைப் படைத்தவனிடம் நான் செல்கிறேன். உங்களுக்கான நேரம் இறுதியாக வரும்போது, நீங்களும் அதையே செய்வீர்கள் என்று நம்புகிறேன். அதை விரும்புகிறேன்.

என்னைப் பொறுத்தவரை, நான் எந்த தனிமனிதனுக்கும் பணியாமல், தலை நிமிர்ந்து வாழ்ந்த நிறைவு இருக்கிறது. நான் இந்தப் பாதையில் தனியே பயணம் செய்யவில்லை. சக பத்திரிகையாளர்களும் என்னோடு பயணம் செய்துள்ளனர். அவர்களில் பலர் கொல்லப்பட்டுள்ளனர்; விசாரணையின்றி சிறையில் அடைக்கப்பட்டுள்ளனர்; தூர தேசங்களுக்கு நாடு கடத்தப்பட்டுள்ளனர். அதிபரான நீங்கள் முன்னொரு காலத்தில் எந்த பத்திரிகை சுதந்திற்காக பாடுபட்டீர்களோ, அதே பத்திரிகை சுதந்திரத்திற்காக தற்போது பாடுபடும் மேலும் சில பத்திரிகையாளர்கள் மரணத்தின் நிழலில் உள்ளனர். எனது மரணம் தங்கள் கண்காணிப்பின் கீழ் நிகழ்வதை நீங்கள் மறக்கவே முடியாது. எனது கொலையாளிகளை நீங்கள் பாதுகாப்பதைத்தவிர வேறு வாய்ப்பில்லாத நிலையில் நீங்கள் இருப்பீர்கள் என்பது எனக்குத் தெரியும். அவர்கள் எப்போதும் தண்டிக்கப்படாத வகையில் நீங்கள் பார்த்துக்கொள்வீர்கள் என்பதும் எனக்குத் தெரியும். உங்களுக்கு வேறு வழியே இல்லை. உங்களுக்காக நான் வருந்துகிறேன். உங்களைப் பதவியில் அமர்த்தியுள்ள உங்கள் குடும்பத்தினர், உங்கள் பாவங்களுக்காகவும் கடவுளிடம் நீண்ட நேரம் முழந்தாளிட்டு பாவமன்னிப்பு கேட்பார்கள்.

சண்டே லீடர் பத்திரிகையின் வாசகர்களுக்கு சொல்ல விரும்புவது என்னவென்றால், எங்கள் பணியில் துணை நின்றதற்காக உங்களுக்கு நன்றி தெரிவித்துக் கொள்கிறேன். சிறுபான்மையினரின் நலன்களுக்காக, குரல் எழுப்பக்கூட நாதியற்றவர்களுக்காக குரல் கொடுத்திருக்கிறோம். வேர்களை மறந்துவிட்டு தலை கொழுத்துத் திரிபவர்களின் ஊழல்களை வெளிப்படுத்தி உங்கள் வரிப்பணம் விரயமாக்கப்படுவதை அம்பலப்படுத்தி இருக்கிறோம். அரசுத்தரப்பில் கூறப்படும் பிரச்சாரங்களுக்கு மாற்றாக உண்மை நிலையை உணர்த்தி இருக்கிறோம். இதற்கான விலையை ஒரு நாள் கொடுக்க வேண்டும் என்று எனக்கு எப்போதும் தெரியும். அதனை நானும் - என் குடும்பத்தினரும் தற்போது கொடுக்கிறோம். நான் அதற்கு எப்போதும் தயாராகவே இருக்கிறேன். இதனைத் தடுக்க நான் எதையும் செய்யவில்லை; முன்னெச்சரிக்கையோ, பாதுகாப்போ இல்லை. ஆயிரக்கணக்கான படுகொலைகளைக் கண்டிக்கும்போது மனித கேடயங்களின் பின் பதுங்கிக்கொள்ளும், எனது கொலையாளியைப்போல நான் கோழை இல்லை என்பதை அவன் உணர வேண்டும் என்று விரும்புகிறேன். எனது உயிர் யாரால் எப்படி கவரப்படும் என்பது முன்னரே தீர்மானிக்கப்பட்டுவிட்டது. அது எப்போது நடைபெறும் என்பதுதான் மீதமுள்ள கேள்வி.

சண்டே லீடர் பத்திரிகை தனது அறம் சார்ந்த யுத்தத்தை தொடர்ந்து நடத்தும் என்பதும் ஏற்கனவே எழுதப்பட்டுவிட்டது. நான் இந்தப்பணியில் தனித்து செயல்படவில்லை. இந்த பத்திரிகை வீழ்த்தப்படுவதற்கு முன்னர் எங்களில் பலர் கொல்லப்படவேண்டும் - கொல்லப்படுவார்கள். அதுவரை சண்டே லீடர் பத்திரிகை மக்களுக்காகப் போராடும். எனது கொலை பத்திரிகை சுதந்திரத்தின் மீதான தாக்குதலாக கருதப்படாமல், கருத்துரிமைக்காக தொடர்ந்து பணியாற்றும் பத்திரிகையாளர்களுக்கான தூண்டுதலாக செயல்படும் என்று நம்புகிறேன். இன்னும் சொல்லப்போனால் எனது கொலை, இலங்கையில் மனித விடுதலைக்கான புதிய யுகத்தை படைப்பதற்காக போராடும் சக்திகளை இணைக்க உதவி செய்யும் என்றும் நம்புகிறேன். தேசபக்தியின் பெயரால் பல படுகொலைகள் நடந்தாலும், மனிதநேயம் மேலும் செழித்து வளரும் என்றும் அது அதிபரின் கண்களைத் திறக்கும் என்றும் நம்புகிறேன். எத்தனை ராஜபக்சேக்கள் சேர்ந்தாலும் மனிதநேயத்தை அழித்துவிட முடியாது.

நான் இத்தகைய ஆபத்தான முயற்சிகளில் இறங்க வேண்டுமா என்று பொதுமக்கள் பலரும் என்னிடம் கேட்டுள்ளனர். காலம் மாறும்போது இந்த அநீதிகளும் மாறிவிடும் என்றும் அவர்கள் கூறுகின்றனர். எனக்கும் அது தெரியும்: அது தவிர்க்கமுடியாததும்கூட. ஆனால் இப்போது நாம் பேசாவிட்டால், பின்னர் பேசுவதற்கு யாரும் மிஞ்சாமலே போய்விடக்கூடும். அவர்கள் சிறுபான்மையினராக, ஒடுக்கப்பட்டவர்களாக, வாய்ப்பு மறுக்கப்பட்டவர்களாக இருக்கலாம்.

ஜெர்மானிய மதத் தத்துவாதியாகிய மார்ட்டீன் நீய் மொல்லர் என்பவரின் வாழ்க்கை அனுபவமே எனது பத்திரிகை வாழ்க்கை முழுக்க எனது உந்து சக்தியாக செயல்பட்டு வந்தது. யூதர்களுக்கு எதிரான கருத்து கொண்ட இவர், இளமைக்காலத்தில் ஹிட்லரின் ஆதரவாளராக இருந்தார். ஹிட்லர் தலைமையிலான நாஜிக்கள் ஜெர்மனியை கைப்பற்றியவுடன், ஹிட்லரின் கொள்கை யூதர்களை மட்டுமே அழிப்பதல்ல என்பதையும், ஹிட்லருக்கு எதிரான கருத்து கொண்ட அனைவரையும் அழிப்பதே ஹிட்லரின் நோக்கம் என்பதையும் புரிந்து கொண்டார். ஹிட்லருக்கு எதிரான கருத்துகளைக் கூறிய மார்ட்டீன் நீய் மொல்லரும் நாஜிப்படையால் பிடிக்கப்பட்டு1937 முதல் 1945 வரை சித்திரவதை செய்யப்பட்டு படுகொலை செய்யப்பட்டார். அவர் படுகொலை செய்யப்படுவதற்குமுன் எழுதிய கவிதையை நான் என் இளம்பருவத்தில் படித்தேன். என் நெஞ்சில் நிலைத்த அந்த கவிதை இதோ:

முதலில் அவர்கள் யூதர்களைப் பிடிக்க வந்தனர்.

நான்பேசவில்லை: ஏனெனில் நான் யூதன் அல்ல.

பின்னர் அவர்கள் கம்யூனிஸ்டுகளைப் பிடிக்க வந்தனர்.

நான் பேசவில்லை: ஏனெனில் நான் கம்யூனிஸ்ட் அல்ல.

பின்னர் அவர்கள் தொழிற்சங்கவாதிகளைப் பிடிக்க வந்தனர். அப்போதும்

நான் பேசவில்லை: ஏனெனில் நான் தொழிற்சங்கவாதியும் அல்ல.

பின்னர் அவர்கள் என்னைப் பிடிக்க வந்தனர்.

அப்போது எனக்காக பேச யாருமே இல்லை.

நீங்கள் எதை மறந்தாலும் இதை நினைவில் வைத்துக்கொள்ளுங்கள். சண்டே லீடர் பத்திரிகை உங்களுக்காக உள்ளது. நீங்கள் சிங்களராக, தமிழராக, இஸ்லாமியராக, தாழ்த்தப்பட்ட சாதியினராக, ஓரினப்புணர்ச்சியாளராக, எதிர்கருத்து கொண்டவராக அல்லது ஊனமுற்றவராக இருக்கலாம். உங்களுக்காக போராடுவதற்கு, அதிகாரத்திற்கு அடிபணியாமல் - அச்சமில்லாமல், தைரியமாக செயல்படுவதற்கு சண்டே லீடரின் உறுப்பினர்கள் இருக்கிறார்கள். இது வெறும் வார்த்தையல்ல. பத்திரிகையாளரான எங்கள் தியாகங்கள் எங்கள் பெயருக்கும், புகழுக்கும் செய்யப்பட்டதல்ல; அது உங்களுக்காக செய்யப்பட்டது. அந்த தியாகத்திற்கான தார்மீகத்தகுதி உங்களுக்கு இருக்கிறதா என்பது வேறு விவகாரம். என்னைப் பொறுத்தவரை நான் அதற்கு முயற்சி செய்தேன் என்பது கடவுளுக்குத் தெரியும்.

-லசந்தா

(சண்டே லீடர் பத்திரிகை ஆசிரியர் )

தமிழ் மொழிப்பெயர்ப்பு :

வழக்கறிஞர் சுந்தர் ராஜன்

Comment (0) Hits: 5

"தமிழ் மக்களின் வாக்குகள் கோத்தாவுக்கு கிடைக்காது" - சுரேஷ் பிரேமசந்திரன்!

அர­சாங்­கத்­தினை பாது­காத்து வரும் தமிழ்த் தேசியக் கூட்­ட­மைப்­பினர், ஜனா­தி­பதி மைத்­திரி மட்­டுமே தமிழ் மக்­களை ஏமாற்­றி­விட்டார். பிர­தமர் ரணில் விக்­கி­ர­ம­சிங்க தமிழ் மக்­களை ஏமாற்­ற­வில்லை என்ற தோற்­றப்­பாட்­டினை உட­ன­டி­யாக நிறுத்த வேண்டும் என்று ஈ.பி.ஆர்.எல்.எப் அமைப்பின் தலைவர் சுரேஷ்­ பி­ரே­மச்­சந்­திரன் தெரி­வித்­துள்ளார்.

மேலும் அவர் கருத்து தெரிவிக்கையில், 

"தற்­போ­தைய அர­சினை தாங்கள்தான் கொண்டு வந்தோம் என தமிழ்த் தேசியக் கூட்­ட­மைப்­பினர் கூறிவந்தனர். இப்­போது மைத்­திரி எம்மை ஏமாற்றி விட்டார் என விமர்­சிக்­கின்­றனர். கண்­டிக்­கின்­றனர். அவ்வாறு கண்­டிக்க வேண்டாம் என்று சொல்­ல­வில்லை. மைத்­திரி மட்டும் ஏமாற்­ற­வில்லை ரணிலும் தான் மக்களை ஏமாற்­றி­யுள்ளார்.

போர்க் குற்­றச்­சாட்­டுக்­களில் முக்­கிய இரா­ணுவ அதி­கா­ரி­யாக குறிப்­பி­டப்­பட்டு வரும் சவேந்­திர சில்­வா­வுக்கு இரா­ணுவ தள­பதி பத­வியை ஜனா­தி­பதி வழங்­கி­யுள்ளார். இதற்கு சர்­வ­தேச மட்­டத்தில் எதிர்ப்­புகள் வெளியிடப்பட்டு வரு­கின்­றன. இவ்­வா­றான நிலையில், இலங்­கையின் வெளி­வி­வ­கார அமைச்சர், இலங்­கையின் இரா­ணுவ தள­ப­தியின் நிய­மனம் என்­பது நாட்டின் சயா­தீ­ன­மான விடயம். இதில் சர்­வ­தேச நாடுகள் தலையிடக்கூ­டாது என்ற கருத்தை வெளி­யிட்­டுள்ளார்.

அப்­ப­டி­யாயின் ரணில் நிய­மித்த வெளி­வி­வ­கார அமைச்சர் இவ்­வா­றான கருத்தை வெளி­யிட்­டுள்ளார் என்றால், இரா­ணுவ தள­ப­தியின் நிய­ம­னத்தில் ரணிலும் மைத்­தி­ரியும் இணைந்தே  செயற்­பட்­டுள்­ளனர். ஆனால், கூட்டமைப்­பினர் இதே ரணி­லுக்கு ஆத­ர­வாக செயற்­பட்டு வரு­கின்­றனர். இரா­ணுவ தள­ப­தியின் நிய­மனம் வடக்கு, கிழக்கில் வாழும் மக்­களை தொடர்ந்தும் அச்ச நிலையில் வைத்­தி­ருக்க வேண்டும் என்ற நோக்­கி­லேயே, வழங்­கப்­பட்­டி­ருக்­கலாம். இந்த அரசு மக்கள் மீது குறிப்­பாக, சிறு­பான்மை இனம் மீது அக்­கறை இல்­லாது செயற்ப­டு­கின்­றது என்­ப­தையே வெளிக்­காட்­டு­கின்­றது.

தற்­போது நாட்டில் ஜனா­தி­பதி தேர்தல் தொடர்­பான விடயம் பேசுபொரு­ளாக உள்­ளது. சில கட்­சிகள் தங்­களின் வேட்­பா­ளர்­களை அறி­மு­கப்­ப­டுத்­தி­யுள்­ளன. இந்­நி­லையில், பொது­ஜன பெர­முன  சார்­பாக முன்னாள் பாது­காப்பு செயலர் கோத்­தாபய ராஜ­பக்ஷ அறி­விக்­கப்­பட்­டுள்ளார். ஆனால், தமிழ் மக்­களின் வாக்­குகள் என்­றைக்­குமே கோத்­தா­வுக்கு கிடைக்­காது. ஏனெனில் அவர் போர்க் குற்றச்சாட்டுக்கு உள்ளாகியிருப்பவர். அதற்கும் மேலதிகமாக, அவர் சட்டங்களை மதிக்கும் நபர் இல்லை. இராணுவத்தினர் வசம் உள்ள காணிகளை விடுவிப்பதில் சாதக தன்மை அற்றவர். இவ்வாறான ஒருவரை தமிழ் மக்கள் ஏற்றுக்கொள்ள விரும்ப மாட்டார்கள்" என்றார்.

Comment (0) Hits: 4

ஜனாதிபதி தேர்தல் - மொட்டுக் கட்சியின் ஆலோசனைக் கூட்டம்!

ஜனாதிபதி தேர்தல் குறித்து ஸ்ரீலங்கா பொதுஜன பெரமுன கட்சி உறுப்பினர்களுக்கு ஆலோசனை வழிகாட்டல்கள் வழங்கப்பட உள்ளன.

பத்தரமுல்ல நெலும் மாவத்தையில் அமைந்துள்ள கட்சியின் தலைமயகத்தில் இந்த கூட்டம் நடைபெறவுள்ளது.

ஜனாதிபதி தேர்தலில் எவ்வாறு போட்டியிட வேண்டும் என்பது குறித்து, இந்த ஆலோசனைகள் மற்றும் வழிகாட்டல்கள் வழங்கப்பட உள்ளதாக நாடாளுமன்ற உறுப்பின செஹான் சேமசிங்க தெரிவித்துள்ளார்.

Comment (0) Hits: 8

கோத்தாபய ராஜபக்ஷவின் விருந்தில் பங்கேற்ற சுதந்திரக் கட்சி எம்.பிக்கள்!

'பொதுஜன முன்னணியின்' ஜனாதிபதி வேட்பாளர் கோட்டாபய ராஜபக்ஸ நேற்றிரவு (21) கொழும்பு ஷாங்கிரில்லா விடுதியில் ஸ்ரீலங்கா சுதந்திரக்கட்சி உறுப்பினர்களுக்கு விருந்துபசாரம் ஒன்றை வழங்கியுள்ளார்.


எதிர்க்கட்சித் தலைவர் மஹிந்த ராஜபக்ஸ இதற்கான அழைப்பை விடுத்திருந்த நிலையில் ஜனாதிபதி மைத்திரிபால சிறிசேனவின் அனுமதியுடன் சுதந்திரக்கடசி உறுப்பினர்கள் இதில் பங்கேற்றனர்.


அதன்படி, ஐக்கிய மக்கள் சுதந்திரக் கூட்டமைப்பின் பொதுச் செயலாளர் மஹிந்த அமரவீர,ஸ்ரீலங்கா சுதந்திரக் கட்சியின் பொதுச் செயலாளர் தயாசிறி ஜயசேகர, நிமல் சிறிபாலா டி சில்வா, பைசர் முஸ்தபா, ரஞ்சித் சியம்பலபிட்டிய, லசந்த அலகியவண்ண, அங்கஞன் இராமநாதன், ஸ்ரீயானி விஜேவிக்ரம, திலங்க சுமதிபால உள்ளிட்டோல் இதில் பங்கேற்றனர்.

ஜனாதிபதி மைத்ரிபால சிறிசேனவுக்கும் இந்த விருந்துபசாரத்தில் கலந்துக்கொள்வதற்கு அழைப்பு விடுக்கப்பட்டிருந்தது. ஆனால் ஜனாதிபதி மரண வீடு ஒன்றுக்கு செல்வதாக கூறி அதனை தவிர்த்துக்கொண்டார்.
இதேவேளை, சுதந்திரக் கட்சியின் தேசிய அமைப்பாளர் துமிந்த திசாநாயக்கவும் விருந்துபசார நிகழ்வை புறக்கணித்துள்ளார்.

ஆக, ஸ்ரீலங்கா சுதந்திரக் கட்சியின் எம்.பி.க்களைத் தவிர, ஒன்றிணைந்த எதிர்க்கட்சியின் பல தலைவர்களும் இதில் பங்கேற்றதாக அறியமுடிகின்றது.
Comment (0) Hits: 3

உயர்நீதிமன்றில் மனு தாக்கல் செய்த சுமந்திரன் எம்.பி!!

எல்லை நிர்ணய நடவடிக்கைகளை பூர்த்தி செய்யாமல் பழைய முறையின் கீழ் மாகாண சபைத் தேர்தலை நடத்த முடியுமா என்பதை தெளிவுபடுத்துமாறு கோரி, ஜனாதிபதி மைத்திரிபால சிறிசேனவினால் சமர்ப்பிக்கப்பட்டுள்ள விண்ணப்பத்தின் இடைமனுதாரராக இணைந்துகொள்ள அனுமதி கோரி, நேற்று (21) மனு தாக்கல் செய்யப்பட்டுள்ளது.

தமிழ் தேசியக் கூட்டமைப்பின் பாராளுமன்ற உறுப்பினரும், ஜனாதிபதி சட்டத்தரணியுமான எம்.ஏ.சுமந்திரன் உயர் நீதிமன்றத்தில் இன்று இந்த மனுவை தாக்கல் செய்துள்ளார். 

"எல்லை நிர்ணய அறிக்கை இன்றி, பழைய முறைக்கு அமைய மாகாண சபை தேர்தலை நடத்த ஜனாதிபதிக்கு சட்ட ரீதியாக அதிகாரம் இல்லை" என்ற உத்தரவை பிறப்பிக்குமாறு எம்.ஏ.சுமந்திரன், தனது மனுவின் ஊடாக கோரியுள்ளார். 

2017 ஆம் ஆண்டின் 17 ஆம் இலக்க மாகாணசபை தேர்தல் சட்டத்தின் திருத்தங்களுக்கு அமைய, எல்லை நிர்ணய நடவடிக்கைகளை பூர்த்தி செய்ய வேண்டியது அத்தியாவசியம் என சுமந்திரன் எம்.பி, தனது மனுவின் மூலம் நீதிமன்றத்தை தெளிவுப்படுத்தியுள்ளார். 

அவர் தனது மனுவில், மாகாண சபை தேர்தலை தடைகள் இன்றி நடத்த முடியவில்லையா? என்று முடிவு செய்யுமாறு நீதிமன்றத்தை கேட்டுள்ளார். 

ஜனாதிபதியால் உயர் நீதிமன்றத்தில் தாக்கல் செய்யப்பட்டுள்ள விண்ணப்பம், நாளை மறுதினம் பிரதம நீதியரசர் ஜயந்த ஜயசூரியவின் தலைமையில், ஐவரடங்கிய நீதியரசர்கள் குழாம் முன்னிலையில் பரிசீலனைக்கு எடுத்துக்கொள்ளப்படவுள்ளது.

Comment (0) Hits: 6

லசந்த, தாஜூதீன் படுகொலை; விசாரணை அறிக்கை சமர்ப்பிப்பு!

வசீம் தாஜூதீன், லசந்த விக்ரமதுங்க கொலை உள்ளிட்ட 05  சம்பவங்கள் தொடர்பான விசாரணை அறிக்கை, பதில் பொலிஸ் மா அதிபரால் சட்டமா அதிபரிடம் இன்று (22) ஒப்படைக்கப்பட்டுள்ளதாக பொலிஸ் ஊடகப் பேச்சாளர் தெரிவித்துள்ளார். 

வசீம் தாஜுதீன் படுகொலை, லசந்த விக்ரமதுங்க படுகொலை உள்ளிட்ட 05 சம்பவங்கள் தொடர்பான விசாரணை அறிக்கையை, வெவ்வேறு கோப்புகளாக தயாரித்து, நாளைய (23) தினத்திற்கு முன்னர் சமர்பிக்குமாறு பதில் பொலிஸ்மா அதிபர், குற்றப் புலனாய்வு திணைக்களத்திற்கு ஏற்கனவே அறிவித்திருந்தார். 

வசீம் தாஜுதீன் கொலை, லசந்த விக்ரமதுங்க கொலை, கீத் நொயார் கடத்தல், 17 பணியாளர்கள் கொலை மற்றும் 11 இளைஞர்கள் கடத்தி செல்லப்பட்டு காணாமல் ஆக்கப்பட்டமை ஆகிய சம்பவங்கள் தொடர்பான விசாரணைகளை துரிதப்படுத்துமாறு சட்டமா அதிபரினால், கடந்த 15 ஆம் திகதி பதில் பொலிஸ்மா அதிபருக்கு அறிவுறுத்தப்பட்டிருந்தது. 

அதனடிப்படையில் குறித்த 05 சம்பவங்கள் தொடர்பான விசாரணை அறிக்கை, பதில் பொலிஸ் மா அதிபரினால், சட்டமா அதிபரிடம் இன்று ஒப்படைக்கப்பட்டுள்ளதாக தெரிவிக்கப்படுகின்றது.

Comment (0) Hits: 5

இந்திய முன்னாள் நிதியமைச்சர் பி.சிதம்பரம் கைது!

இந்தியாவின் முன்னாள் நிதி அமைச்சர் பி.சிதம்பரம் ஊழல் மற்றும் நிதி மோசடி குற்றச்சாட்டுக்களின் பேரில் நேற்று (21) கைது செய்யப்பட்டுள்ளார்.

லஞ்சம் பெற்றுக் கொண்டு வெளிநாட்டு முதலீடுகளுக்கு உதவியதாக முன்வைக்கப்பட்டுள்ள குற்றச்சாட்டுக்கள் தொடர்பில் இவர் விசாரிக்கப்படுகின்றார். எனினும், இந்தக் குற்றச்சாட்டுக்களை பி.சிதம்பரம் மறுத்துள்ளார்.

நிதியமைச்சராக பணியாற்றியவேளை ஐ.என்.எக்ஸ் ஊடக நிறுவனத்திற்கு முறைகேடாக அனுமதி வழங்கிய குற்றச்சாட்டின் கீழ் சி.பி.ஐ. அதிகாரிகளால் (இந்திய மத்திய புலனாய்வுப் பணியகத்தினால்) முன்னாள் நிதியமைச்சர் சிதம்பரம் கைசெய்யப்பட்டுள்ளார்.

ஐ.என்.எக்ஸ் ஊடக முறைகேடு வழக்கில் கைது செய்யப்பட்டுள்ள சிதம்பரத்திடம் சி.பி.ஐ விசாரணையை  ஆரம்பித்துள்ளதாக அந்நாட்டு ஊடகம் தகவல் வெளியிட்டுள்ளது. 

ஐ.என்.எக்ஸ். ஊடக முறைகேடு வழக்கில், முன்னாள் மத்திய நிதி அமைச்சர் சிதம்பரத்தின் முன் பிணை மனுவை டில்லி  உயர்நீதிமன்றம்,  நேற்று முன்தினம் தள்ளுபடி செய்து தீர்ப்பு  வழங்கியது. இதைத் தொடர்ந்து, சி.பி.ஐ. மற்றும் அமுலாக்கப்பிரிவு அதிகாரிகள் சிதம்பரத்தை கைது செய்வதற்காக, டில்லி ஜோர் பாக் பகுதியில் உள்ள அவரது வீட்டுக்கு சென்றனர். ஆனால் அவர் அங்கு  இருக்கவில்லை.

இந்நிலையில், தேடப்படும் நபர் என்ற வகையில், சிதம்பரத்துக்கு எதிராக சி.பி.ஐ. சார்பிலும், அமுலாக்கப்பிரிவு சார்பிலும் ‘லுக் அவுட்’  மனு நேற்று பிறப்பிக்கப்பட்டது.

இதற்கிடையே, உயர் நீதிமன்றத்தின்  தீர்ப்பை எதிர்த்து சிதம்பரம் சார்பில் உச்சநீதிமன்றில் மேல்முறையீட்டு மனு தாக்கல் செய்யப்பட்டது. அந்த மனு மீது உடனடியாக விசாரணை நடத்தப்படாததால், சிதம்பரத்திற்கு மேலும் சிக்கல் ஏற்பட்டது. நேற்று இரவு காங்கிரஸ் தலைமை அலுவலகத்தில் பேட்டி அளித்து விட்டு வீட்டுக்கு சென்ற  சிதம்பரத்தை சி.பி.ஐ. அதிகாரிகள் கைது செய்தனர். 

சிதம்பரத்திடம் இன்று காலை முதலே சி.பி.ஐ. அதிகாரிகள் விசாரணை நடத்தி வருகின்றனர். விசாரணைக்கு பிறகு, இன்று பிற்பகல் டில்லியிலுள்ள ரோஸ் அவென்யூ  நீதிமன்றத்தில் ஆஜர்படுத்தப்படலாம் என எதிர்பார்க்கப்படுகிறது. அப்போது சிதம்பரம் தரப்பில் பிணை மனு தாக்கல் செய்யப்படும். அதேசமயம், சிதம்பரத்தை தங்கள் காவலில் எடுத்து விசாரிக்க சி.பி.ஐ. சார்பில் மனு தாக்கல் செய்யப்படலாம். 

Comment (0) Hits: 6

எவன் கார்ட் வழக்கு - ட்ரயல் எட் பார் நீதிபதிகள் குழுவை நியமிக்க வேண்டுகோள்!

நிஸ்ஸங்க சேனாதிபதி உள்ளிட்ட 12 பேர் தொடர்பான எவன் கார்ட் வழக்கை விசாரணை செய்ய, ட்ரயல் எட் பார் மேல் நீதிமன்ற நீதிபதிகள் குழுவை நியமிக்குமாறு வேண்டுகோள் விடுக்கப்பட்டுள்ளது. 

7573 பாரதூரமான குற்றங்களைக் கொண்ட எவன்கார்ட் வழக்கை விசாரிக்க, ஜூரி சபையில் அல்லாமல் மூவர் அடங்கிய "ட்ரயல் எட் பார்" மேல் நீதிமன்ற நீதிபதிகள் குழுவை நியமிக்குமாறு பிரதம நீதியரசர் ஜயந்த ஜயசூரியவிடம், சட்டமா அதிபர் தபுல டி லிவேரா நேற்று (21) எழுத்துமூலம் கோரிக்கை விடுத்துள்ளதாக, சட்டமா அதிபரின் ஒருங்கிணைப்பு அதிகாரி அரச சட்டத்தரணி நிஷாரா ஜயரத்ன தெரிவித்தார். 

இந்த பிரதிவாதிகள் 13 பேருக்கு எதிராக, 7573 குற்றச்சாட்டுக்களின் கீழ் வழக்கு தொடர உள்ளதாகவும் அவர் மேலும் குறிப்பிட்டார். 

2014 ஆம் ஆண்டு ஏப்ரல் 7ஆம் திகதி மற்றும் 2015 ஆம் ஆண்டு ஒக்டோபர் மாதம் 6ஆம் திகதி வரையான காலப்பகுதியில், ஹிக்கடுவை கடற்பகுதியில் எம்.வி.எவன்கார்ட் என்ற கப்பலினுள் உரிய ஆவணங்கள் இன்றி, 816 தானியங்கி துப்பாக்கிகள் மற்றும் 290,035 தோட்டாக்களை வைத்திருந்ததன் ஊடாக, பிரதிவாதிகள் குற்றம் இழைத்துள்ளார்கள் என குற்றம் சுமத்தி, சட்டமா அதிபரினால் இந்த வழக்கு தாக்கல் செய்யப்படவுள்ளது. 

கைப்பற்றப்பட்ட தன்னியக்க துப்பாக்கிகளில், மூன்று துப்பாக்கிகளுக்கு மாத்திரமே சட்டபூர்வமான அனுமதி கிடைக்கப் பெற்றிருந்ததாக, வழக்கறிஞர் திருமதி நிஷாரா ஜயரட்ன மேலும் தெரிவித்தார்.

குழுவாக இணைந்து மேற்கொள்ளப்பட்ட இந்த குற்ற நடவடிக்கைகள், உள்நாட்டு மற்றும் சர்வதேச ரீதியில் பாரிய பாதிப்பை ஏற்படுத்தியுள்ளதால் இந்த வழக்கினை, ஜூரி சபை ஒன்று இல்லாமல் மூவர் அடங்கிய நீதிபதிகள் குழாம் முன்னிலையில் விசாரணைக்கு உட்படுத்தப்படுவதே உகந்தது என சட்டமா அதிபர் தீர்மானித்துள்ளதாக, சட்டமா அதிபரின் ஒருங்கிணைப்பு அதிகாரி நிஷாரா ஜயரத்ன மேலும் தெரிவித்தார்.

Comment (0) Hits: 4

வாரத்தில் ஒருநாள் ஆங்கிலமொழி நாளாக பிரகடனம்!

அனைத்துப் பாடசாலைகளிலும் வாரத்தில் ஒரு நாளை, ஆங்கிலமொழி நாளாகப் பெயரிடுவதற்கு கல்வி அமைச்சு தீர்மானித்துள்ளது.

குறித்த நாளில் ஆசிரியர்கள், மாணவர்களுடன் ஆங்கில மொழியிலேயே கலந்துரையாட வேண்டும் என அதிபர்களுக்கு ஆலோசனை வழங்கப்பட்டுள்ளதாக அமைச்சின் மேலதிக செயலாளர் M.M. ரத்னாயக்க தெரிவித்துள்ளார்.

பாடசாலைகளில் ஆங்கிலமொழி கற்றுக் கொடுக்கப்படுகின்ற போதிலும், பெரும்பாலான மாணவர்கள் ஆங்கிலமொழி பேசுவதில் சிரமங்களை எதிர்நோக்குவதாக அவர் சுட்டிக்காட்டியுள்ளார்.

இதனாலேயே, வாரத்தில் ஒருநாளை ஆங்கிலமொழியில் கலந்துரையாடுவதற்காக ஒதுக்குவதற்குத் தீர்மானித்துள்ளதாக கல்வி அமைச்சின் மேலதிக செயலாளர் தெரிவித்துள்ளார்.

இதன்மூலம் அன்றாட நாளில் பயன்படுத்தப்படும் வார்த்தைகள், மாணவர்களுக்கு பரீட்சயமாவதுடன் அதனூடாக ஆங்கிலமொழியில் சரளமாகப் பேசுவதற்கு இயலும் எனவும் அவர் கூறியுள்ளார்.

இது குறித்து பாடசாலை அதிபர்களுக்கும் தௌிவுபடுத்தியுள்ளதாகவும் கல்வி அமைச்சு மேலும் தெரிவித்துள்ளது.
Comment (0) Hits: 6

"நான்கு வருட சாதனைகளை இழக்க நேரிடும்" - மங்கள எச்சரிக்கை!

சர்வதேச சமூகத்துடன் மோதும் கொள்கையை இலங்கை வெளிவிவகார அமைச்சு பின்பற்றக்கூடாது என்றும், இதனால் கடந்த நான்கு வருடகாலமாக இலங்கை அடைந்துகொண்ட சாதனைகளை இழக்க வாய்ப்பு உள்ளது எனவும்  நிதியமைச்சர் மங்கள சமரவீர தெரிவித்துள்ளார்.

இலங்கையின் புதிய இராணுவதளபதி தொடர்பாக, இலங்கை அரசாங்கம் எடுத்துள்ள முடிவில், வெளிநாட்டு தூதுவர்களை தலையிடவேண்டாம் என  வெளிவிவகார அமைச்சு வேண்டுகோள் விடுத்துள்ள நிலையிலேயே, முன்னாள் வெளிவிவகார அமைச்சரான மங்கள சமரவீர இந்த வேண்டுகோளை விடுத்துள்ளார்.

 இந்த விடயம் தொடர்பில் அவர் தனது டுவிட்டரில் இவ்வாறு பதிவிட்டிருந்தார்.

"தனிமைப்படுத்தப்பட்ட, மோதல்போக்குடைய கடந்தகால வெளியுறவுக் கொள்கைக்கு நாம் மீண்டும் திரும்பக்கூடாது. கடந்த காலத்தின் பின்தங்கிய வெளிவிவகார கொள்கைகளை மீண்டும் பின்பற்றுவதனால், கடந்த நான்கு வருடங்களில் நாம் அடைந்த பெரும்பாலான சாதனைகளை இழக்க நேரிடும். வெளிநாட்டு அலுவல்கள் அமைச்சு – இலங்கை"

Comment (0) Hits: 9

சுஜீவ சேனசிங்கவின் விருந்தில் சஜித்துக்கு ஆதரவாக ஐதேக எம்.பிக்கள் 50 பேர்!

(VIDEO இணைப்பு கீழே)
50 க்கும் மேற்பட்ட ஐ.தே.க நாடாளுமன்ற உறுப்பினர்கள் மற்றும் அமைச்சர்கள் நேற்று இரவு (20) கொழும்பு 07 இல் அமைந்துள்ள அமைச்சர் சுஜீவ சேனசிங்கவின் சகோதரியின் இல்லத்தில் சந்தித்து பேசியுள்ளனர்.
 
இதன்போது, அவர்கள் கட்சியின் பிரதித் தலைவர் சஜித் பிரேமதாசவுடன் நட்புரீதியான கலந்துரையாடலை நடத்தியுள்ளனர். நேற்றைய இந்த சந்திப்பு, இரவு 7 மணிக்கு ஆரம்பமாகி நள்ளிரவு வரை நீடித்தாக தெரிவிக்கப்படுகின்றது.
 
அமைச்சர்களான கபீர் ஹஷிம், ரஞ்சித் மத்தும பண்டாரா, மங்கள சமரவீர, மலிக் சமரவிக்ரம, தளதா அத்துகோரல, கயந்த கருணாதிலக, சந்ராணி பண்டாரா, மொஹமட் ஹலிம், ரிஷாட் பதியூதீன் உள்ளிட்டோர் இதில் கலந்து கொண்டனர்.
 
ஐக்கிய தேசியக் கட்சி தலைமையிலான ஐக்கிய தேசிய முன்னணியின் ஜனாதிபதி வேட்பாளர் யார்? என்பது குறித்து ஆராய, கட்சியின் செயற்குழு மற்றும் நாடாளுமன்ற குழு ஆகியன சமர்பித்துள்ள கடிதம் தொடர்பில், எடுக்கப்பட வேண்டிய நடவடிக்கைகள் குறித்து இங்கு விரிவாக ஆராயப்பட்டது.
 
123 மாகாண சபை உறுப்பினர்களில் 97 பேர் சஜித்துக்கு ஆதரவு!
 
ஐக்கிய தேசியக் கட்சியை பிரதிநிதித்துவப்படுத்தும் 97 மாகாண சபை உறுப்பினர்கள் நேற்று இரவு ஐ.தே.கவின் ஜனாதிபதி வேட்பாளராக சஜித் பிரேமதாச இருக்க வேண்டும் என்று ஏகமனதாக முன்மொழிந்தனர்.
 
எதிர்வரும் ஜனாதிபதி தேர்தல் தொடர்பாக, அமைச்சர் சஜித் பிரேமதாசாவுடன் கலந்துரையாடலில் பங்கேற்ற 123 மாகாண சபை உறுப்பினர்களில் 97 பேர் சஜித்தை ஆதரிப்பதாக, அமைச்சரவை அந்தஸ்தற்ற அமைச்சர் அஜித் பி பெரேரா தெரிவித்தார்.
 
அமைச்சர் சஜித் பிரேமதாசவுக்கும் கட்சியின் மாகாண சபை உறுப்பினர்களுக்கும் இடையிலான சந்திப்பு, நேற்று (20) தலவத்துகொடையில் நடைபெற்றது. எவ்வாறாயினும் "இந்த கூட்டத்தில் பங்கேற்க வேண்டாம்" என மாகாண சபை உறுப்பினர்கள், பிரதமர் அலுவலகத்தால் கேட்டுக்கொள்ளப்பட்டனர்.
 
எனினும், கூட்டத்தில் கலந்துக்கொண்டோர் ஐ.தே.க தலைமையிலான பொதுக் கூட்டணி, ஜனாதிபதி தேர்தலில் போட்டியிட்டால் அமைச்சர் சஜித் பிரேமதாச இலகுவாக வெற்றிபெற முடியும் என தெரிவித்துள்ளனர்.
இந்த கூட்டத்தில் அமைச்சர்களான எரான் விக்ரமரத்ன, நளின் பண்டாரா மற்றும் ஹெக்டர் அப்புஹாமி, எஸ்.எம்.மரிக்கர், ஹேஷா விதானகே ஆகியோரும் பங்கேற்றமை குறிப்பிடத்தக்கது.

Comment (0) Hits: 11

சம்பந்தன் - யசூசி அகாசி சந்திப்பு!

இலங்கை அரசாங்கம் வழங்கிய வாக்குறுதிகளை நிறைவேற்ற செய்வது சர்வதேச சமூகத்தின் கடமை என தமிழ் தேசிய கூட்டமைப்பின் தலைவர் இரா.சம்பந்தன் தெரிவித்துள்ளார்.
ஜப்பானின் உயர் இராஜதந்திரியும் ஐக்கிய நாடுகள் சபையின் நிர்வாகிகளில் ஒருவருமான யசூசி அகாசி நேற்று (20) சம்பந்தனை கொழும்பில் சந்தித்து கலந்துரையாடினார். இந்த சந்திப்பின்போதே சம்பந்தன் இதனை கூறியதாக கூட்டமைப்பு வெளியிட்டுள்ள ஊடக அறிக்கையில் தெரிவிக்கப்பட்டுள்ளது.
ஆயுத போராட்டம் முடிவிற்கு வந்துள்ள போதும், அதற்க்கு காரணமாக அமைந்த தமிழ் மக்களின் கோரிக்கைகள் இன்னமும் நிறைவேற்றப்படவில்லை எனவும் சம்பந்தன் கூறியுள்ளார். மேலும் யுத்தத்தினை முடிவிற்கு கொண்டுவருவதில் சர்வதேச சமூகம் பாரிய பங்காற்றியதனை சுட்டிக்காட்டிய அவர், இனப்பிரச்சினைக்கு ஒரு நிரந்தர தீர்வினை எட்டுவது தொடர்பில், இலங்கை அரசாங்கம் சர்வதேச சமூகத்திற்கு பல்வேறு வாக்குறுதிகளை வழங்கியிருந்த போதிலும் அவற்றில் எதுவும்  இதுவரை நிறைவேற்றப்படவில்லை எனவும் தெரிவித்தார்.
சர்வதேச சமூகம் இனிமேலும் வெறும் பார்வையாளர்களாக இருக்க முடியாது என்பதனை வலியுறுத்திய சம்பந்தன், இந்த வாக்குறுதிகளை இலங்கை அரசாங்கம் நிறைவேற்ற தவறுகின்ற பட்சத்தில் அது தமிழ் மக்களிற்கு மாத்திரமல்ல, மாறாக முழு நாட்டிற்கும் கேடானதாக அமையும் என்பதனையும் வலியுறுத்தினார்.
இந்த சந்திப்பில் இலங்கைக்கான ஜப்பானிய தூதுவர் அகிரா சுகியாம மற்றும் தூதரக அதிகாரிகளும் கலந்து கொண்டனர்.
Comment (0) Hits: 6

அகற்றப்பட்ட கோட்டாவின் கட்அவுட்கள் - சுற்றுச்சுழலை நேசிப்பதன் பின்னணி என்ன?

தனது ஜனாதிபதி வேட்பாளர் தொடர்பாக நாடு முழுவதும் காட்சிப்படுத்தப்பட்டுள்ள கட்அவுட்கள் மற்றும் சுவரொட்டிகளை அகற்ற ஸ்ரீலங்கா பொதுஜன முன்னணி தீர்மானித்துள்ளதா? என்பது தொடர்பில், சமூக வலைத்தளங்களில் பல்வேறு கருத்துக்கள் உலா வருகின்றன.
இதுபோன்ற சுவரொட்டிகள் மற்றும் கட்அவுட்களை அகற்றும் செயற்பாடுகள் கடந்த தினங்களில் ஹம்பாந்தோட்டையில் ஆரம்பமாகின.
கட்சியில் எவரேனும் பொலிதீன் மற்றும் தகடுகளை பயன்படுத்தி சுவரொட்டிகளை காட்சிப்படுத்தியிருந்தால், அவற்றை அகற்றுமாறு பாராளுமன்ற உறுப்பினர் நாமல் ராஜபக்ஷ நிகழ்வு ஒன்றில் வைத்து தெரிவித்திருந்தார். அதேபோல், இந்த திட்டம் எதிர்காலத்தில் மற்ற மாவட்டங்களிலும் செயல்படுத்தப்படும் எனவும் நாமல் கூறினார்.
பொதுஜன முன்னணி சார்பில், இந்தமுறை ஜனாதிபதித் தேர்தலில் போட்டியிடும் கோட்டாபய ராஜபக்ஷ, கட்சி மாநாட்டில் உரையாற்றிய போது, பிரசாரங்களுக்காக பிளாஸ்டிக் மற்றும் பொலிதீன் ஆகியவற்றை பயன்படுத்துவது தடைசெய்யப்படும் என கூறினார்.
இருப்பினும், அதனை செயல்படுத்துவதில் கட்சியின் அடிமட்டத்தில் பல சிக்கல்கள் ஏற்பட்டுள்ளதாகவும் எனினும், அவற்றை நிவர்த்தி செய்து கொண்டு தேர்தல் பிரசாரங்களில், சுற்றுச்சூழல் பாதுகாப்பிற்கு முக்கியதுவமளிக்கப்படும் என நாமல் தெரிவித்துள்ளார்.
இந்த நிலையில், நாமல் ராஜபக்ஷ சுவரொட்டிகள் மற்றும் கட்அவுட்களை அகற்றியது குறித்து, அரசியல் ஆர்வலர் ஜயம்பதி புலத்சிங்கல தனது முகப்புத்தகத்தில் பதிவொன்றை இட்டுள்ளார்.
அதில் "ஏன் கட்அவுட்கள் அமைக்கப்பட்டுள்ளன? சுற்றுச்சுழலை நேசிப்பதன் பின்னணியில் ஏதாவது விளையட்டு இருக்கிறதா? என அவர் தனது பதிவில் குறிப்பிட்டுள்ளார்.
மஹிந்தாவின் காலாவதியான கலை (சிந்தனை)
கோட்டாபய ராஜபக்ஷவின் பிரச்சார சுவரொட்டிகள் மற்றும் கட்அவுட்களை அகற்றுவதற்கான முடிவு, கோட்டாவின் உருவத்தை கட்சி சார்புடைய, ஓய்வுபெற்ற இராணுவ வீரர்களினால் சித்தரிப்பதன் ஊடாக 'பணக்கார' கட்சியின் பிரச்சாரத் திட்டங்களையும் ஏற்பாடுகளையும் புறக்கணித்து வருவதாக தெரிய வருகிறது.
இதேவேளை, ஜனாதிபதி வேட்பாளரான கோட்டாவினதும் மற்றும் பிரதமர் வேட்பாளராக மஹிந்த ராஜபக்ஷவினதும் உருவப்படங்களை காட்சிப்படுத்தி, அமைக்கப்படும் கட்அவுட்களை அமைக்கவும் அந்த கட்சி திட்டமிட்டுள்ளது.
இருப்பினும், நாடு முழுவதும் காட்சிப்படுத்தப்பட்ட சில சுவரொட்டிகள் மற்றும் கட்அவுட்களில் மஹிந்த ராஜபக்ஷவுக்கு அதிக முக்கியத்துவம் கொடுக்கப்படவில்லை.
இது சம்பந்தமாக “அனித்தா பத்திரிகையில் இவ்வாறு கூறப்பட்டுள்ளது.
மஹிந்தாவின் ஆதிக்கம் கோட்டாபயாவின்  பக்கம் மாறியது!
“இப்போது மஹிந்தவின் ஆதிக்கம் கோட்டாபயவுக்கு மாறுவதற்கான நேரம் வந்துள்ளது. கோட்டாவின் பிரச்சார சுவரொட்டிகளில், மஹிந்த ராஜபக்ஷவின் உருவப்படம் சிறியதாகி, கோட்டாவின் படம் பெரிதாகி வருகின்றது. இது எதிர்கால அரசியல் தலைவிதி என்று கூறப்படுகின்றது. மேலும் இதுவே மஹிந்த ராஜபக்ஷவின் காலாவதியாகும் நிலையாகும்”
கோட்டாவிற்கும் மஹிந்தவிற்கும் இடையில் வளர்ந்து வரும் அதிகாரப் போட்டியின் விளைவே இது என அரசியல் விமர்சகர்கள் கூறுகின்றனர்.
அதாவது “எந்த வகையிலும், ஒகஸ்ட் 11 க்குள் எளிதான முடிவை எடுத்தார். பல ஆண்டுகளுக்கு முன்பு அவர் திட்டமிட்டிருந்த எதிர்கால அரசியல் செயல்முறையை முற்றிலுமாக மாற்றுவதற்கான முடிவு இது என அவர்கள் கூறுகின்றனர்.”
2009 ல் போர் முடிவுக்கு வந்த பின்னர், அவர் 2010 ஆம் ஆண்டு தேர்தலில் வெற்றி பெற்றார். அதே ஆண்டில் மஹிந்த ராஜபக்ஷ 18 ஆவது திருத்தத்தை நாட்டுக்கு அறிமுகப்படுத்தினார். அதனூடாக ஜனாதிபதி பதவியில் தொடர்ந்தும் நீடிப்பதற்கு அவர் எத்தனித்தார்.
நமலை ஜனதிபதியாக்க கையாண்ட உத்தி!
மஹிந்த ராஜபக்ஷ குடும்பத்தில் உள்ள 'ராஜபக்ஷகள் அல்லர்” இது கடந்த வாரம் மஹிந்த ராஜபக்ஷ கூறிய கருத்து. அனால் ஜனாதிபதித் தேர்தலிலும் நாமல் போட்டியிடுவதை தடுக்க 19 ஆவது திருத்தச்சட்டம் அறிமுகப்படுத்தப்பட்டது.
கோட்டாவுக்கு இப்போது நல்லது கெட்டது எது என்பதை தெரிவு செய்ய சந்தர்ப்பம் உருவாகியுள்ளது. அவர் ஜனாதிபதியாக தெரிவானால் மஹிந்த ராஜபக்ஷ குடும்பத்திற்கு எந்த அரசியல் அதிகாரமும் இருக்காது என்பது தெளிவானதாகும்.
மகிந்த ராஜபக்ஷவின் அரசியல் பிரச்சாரத்தை ஆதரிப்பதற்காக கோட்டாபய ராஜபக்ஷ 2005 இல் இலங்கைக்கு வந்ததைப் போலவே, இப்போது அமெரிக்க குடியுரிமையை கொண்டுள்ள கோட்டாபய ராஜபக்ஷவின் மகன், தனது தந்தைக்கு பின் வெற்றி பெறுவதில் ஆச்சரியமில்லை.
எந்தவொரு அரசியல் பின்னணியும் இல்லாத போதிலும், பணக்கார மோகம் உள்ளவர்கள் அனைவரும் கோட்டபயவின் மகனை அடுத்ததாக களமிறக்க ஒன்றிணைவார்கள்.
இது பல்வேறு வாதப் பிரதிவாதங்களை உருவாக்கலாம். அதற்கு பின்னர் நாமல் ராஜபக்ஷ மற்றொரு குடும்ப போட்டியாளரான மாறவும் வாய்ப்புள்ளது.
மஹிந்த ராஜபக்ஷவின் அரசியல் ரேடார் திரைக்கு இது தென்படாமல் இருக்க வாய்பில்லை. ஆனாலும் கோட்டாவை தவிர, பொதுஜன பெரமுணவில் வெற்றி வேட்பாளர் ஒருவர் இல்லை. எவ்வாறாயினும் ராஜபக்ஷவின் முத்திரையை பதிக்க வேறு எவரையும் அவர்கள் உருவாக்க போவதில்லை.

Comment (0) Hits: 17

"என்டர்பிரைஸ் ஸ்ரீலங்கா" - மட்டக்களப்பில் 5 கோடி ரூபா இலகு கடன் திட்டம்!

அரசாங்கத்தின் "என்டர்பிரைஸ் ஸ்ரீலங்கா" தேசிய அபிவிருத்தி வேலைத்திட்டத்தின்,இலகுகடன் வழங்கும் திட்டத்தின் கீழ், மட்டக்களப்பு மாவட்டத்திலுள்ள விவசாயிகள், மீனவர்கள் மற்றும் கால்நடை உற்பத்தியாளர்களுக்கு சுமார் 05 கோடி ரூபா நிதியில், இலகுகடன் தொகை நேற்று முன்தினம் (19) வழங்கி வைக்கப்பட்டது.

 

பிரதமர் ரணில் விக்கிரமசிங்கவின் வழிகாட்டலில், நிதிஅமைச்சர் மங்கள சமரவீரவின் ஆலோசனையின் பேரில் அமுல்படுத்தப்படும் இந்த "என்டர்பிரைஸ் ஸ்ரீலங்கா" இலகுகடன் திட்டத்தில், விவசாயிகள், மீன்பிடி கைத்தொழில் மற்றும் கால்நடை உற்பத்தியாளாகள், சூரிய சக்தியில் மின்சாரம் வழங்குதல் உட்பட பல துறைகளில், தொழில் முயற்சிகள் மேற்கொள்வதற்காக இந்த கடன் திட்டங்கள் வழங்கப்பட்டதாக, பிரதேச அபிவிருத்தி வங்கியின் கிழக்கு மாகாண, வியாபார மேம்படுத்தல் முகாமையாளர் கே.சத்தியநாதன் தெரிவித்தார்.

 

குறித்த வங்கியின் மாகாண அலுவலகம், மாவட்ட அலுவலகம் மற்றும் மட்டக்களப்பில் புதிய கிளை ஒன்றை திறந்து வைக்கும் நிகழ்வுகளிலேயே இந்த இலகு கடன்கள் வழங்கப்பட்டது. இந்த நிகழ்வில் பிரதேச அபிவிருத்தி வங்கியின் தலைவர் சட்டத்தரணி சுஜித் பிரசன்ன காரியவசம் பிரதம அதிதியாகக் கலந்துகொண்டார். மட்டக்களப்பு உதவி மாவட்ட செயலாளர் ஏ.நவேஸ்வரன், மண்முனை வடக்கு பிரதேச செயலாளர் வீ.வாசுதேவன் ஆகியோர் கௌரவ அதிதியாகக் கலந்துகொண்டனர்.

 

இந்த நிகழ்வில், பிரதேச அபிவிருத்தி வங்கியின் உயர் அதிகாரிகள், அரச திணைக்களங்களின் உயர் அதிகாரிகள், பொது மக்கள் என பலர் கலந்து சிறப்பித்தனர்.

 

இங்கு பிரதேச அபிவிருத்தி வங்கியின் தலைவர் கருத்து வெளியிடுகையில், புதிய தொழில் முயற்சியாளர்களை உருவாக்க பிரதமர் ரணில் விக்கிரமசிங்க மற்றும் நிதியமைச்சர் மங்கள சமரவீர ஆகியோரினால் அறிமுகம் செய்யப்பட்டுள்ள "என்டர்பிரைஸ் ஸ்ரீலங்கா" தேசிய அபிவிருத்தி திட்டத்தில், மிகக் குறைந்த வட்டியில் இலகு கடன்களை வழங்கி, பிரதேச அபிவிருத்தி வங்கி, நாட்டில் புதிய முயற்சியாளர்களையும், விவசாய-கால்நடை உற்பத்தியாளர்களையும் மீனவர்கள், கைத்தொழில் உற்பத்தியாளர்கள் மற்றும் சுற்றுலாத்துறை சார்பான தொழில் முயற்சியாளர்களை உருவாக்க நடவடிக்கை எடுத்து வருகின்றது.

 

இலாப நோக்காக அல்லாது அறிமுகப்படுத்தப்படும் இந்த இலகு கடன் திட்டத்தில், இப்பிரதேச மக்கள் நன்மையடைய வேண்டும் என்பதே எங்களது வங்கியின் குறிக்கோள் எனக் குறிப்பிட்டார்.

Comment (0) Hits: 3

முஸ்லிம் திருமண, விவாகரத்து விவகாரம்: திருத்த சட்டமூலத்திற்கு அமைச்சரவை அனுமதி!

முஸ்லிம் பெண்களின் திருமண வயதெல்லை மற்றும் விவாகரத்து தொடர்பிலான யோசனைகளுக்கு அமைச்சரவை அனுமதி வழங்கியுள்ளது. இலங்கையில் வாழும் முஸ்லிம் சமூகத்தின் திருமணம் மற்றும் விவாகரத்தை பதிவு செய்தல் தொடர்பில் முஸ்லிம் திருமணம் மற்றும் விவாகரத்து சட்டம் மற்றும் அதற்கான திருத்தத்தின் மூலம் ஒழுங்குகள் செய்யப்பட்டுள்ளன. 

இந்த சட்டத்தில் சில விதிகளில் திருத்தம் செய்யப்பட வேண்டும் என்று முஸ்லிம் சமூகம் மற்றும் மனித உரிமை பாதுகாப்பு செயல்பாட்டாளர்களினால் கருத்துக்கள் முன்வைக்கப்பட்டுள்ளன. 

இதற்கமைவாக திருமணம் செய்யப்பட வேண்டிய வயது, பதிவு செய்யும் நடைமுறை மற்றும் திருமணம் செய்தலுக்கான விருப்பத்தை வெளிப்படுத்துவதற்கு அமைவாக விதிகள் முதலான விடயங்களில் திருத்தத்தை மேற்கொண்டு, அதன் திருத்தசட்ட மூலத்திற்கான யாப்பு திருத்த சட்டமூலத்தை மேற்கொள்வதற்கு, சட்டவரைவுக்கு அது தொடர்பாக ஆலோசனை வழங்குவதற்காக தபால் சேவை மற்றும் முஸ்லிம் மத அலுவல்கள் அமைச்சர், நீதி மற்றும் சிறைச்சாலை மறுசீரமைப்பு அமைச்சர் ஆகியோர் சமர்ப்பித்த கூட்டு பரிந்துரைக்கு அமைச்சரவை அங்கீகாரம் வழங்கியுள்ளது.

Comment (0) Hits: 11

புதிய ஜனாதிபதி வரும்வரையில் அமெரிக்க ஒப்பந்தங்கள் ஒத்திவைப்பு!

உத்தேச அமெரிக்க "மில்லேனியம் அபிவிருத்தி ஒத்துழைப்பு" (MCC) ஒப்பந்தத்தில் கையெழுத்திடுவதை எதிர்வரும் ஜனவரி மாதம் வரையில் ஒத்திவைப்பதாக ஜனாதிபதி மைத்திரிபால சிறிசேன, நேற்று (20) நடைபெற்ற அமைச்சரவை கூட்டத்தில் அறிவித்துள்ளதாக தெரிவிக்கப்படுகின்றது. இந்த ஒப்பந்தம் தொடர்பில் ஆராய்ந்து, ஒருவார காலத்திற்குள் தீர்மானிப்பதாக ஜனாதிபதி கூறியதாக அரசாங்க உள்ளக தகவல்கள் தெரிவிக்கின்றன.
இந்த வாரத்துக்கான அமைச்சரவைக் கூட்டம் நேற்று காலை 8.30 க்கு ஜனாதிபதி செயலகத்தில், ஜனாதிபதி தலைமையில் நடைபெற்றது.
இதன்போது முன்மொழியப்பட்ட அமெரிக்க மில்லேனியம் அபிவிருத்தி ஒத்துழைப்பு ஒப்பந்தத்தில் விரைவில் கையெழுத்திட வேண்டும் என அமைச்சர்கள் பலர் கேட்டுக்கொண்டுள்ளனர். இதற்கு பதிலளிக்கும் வகையிலேயே ஜனாதிபதி, மேற்குறித்த விடயத்தை அமைச்சரவையில் தெரிவித்தாக கூறப்படுகின்றது. இதுவே அமெரிக்க மில்லேனியம் அபிவிருத்தி ஒத்துழைப்பு ஒப்பந்தம் சம்பந்தமாக அமைச்சரவையில் எடுக்கப்பட்ட முடிவாகும்.
அமெரிக்காவிற்கும் இலங்கைக்கும் இடையிலான உத்தேச மில்லேனியம் அபிவிருத்தி ஒத்துழைப்பு ஒப்பந்தத்திற்கமைய, 480 மில்லியன் அமெரிக்க டொலர்கள் இலங்கைக்கு நன்கொடையாக வழங்கப்படவுள்ளது. இலங்கையின் உட்கட்டமைப்பு வசதிகளை மேம்படுத்துவதற்காக, இந்த பணத்தை வழங்க உத்தேசிக்கப்பட்டுள்ளது.
அமெரிக்காவுடன் எந்த கருத்து வேறுபாடும் இல்லாத தலைவர்!
இலங்கையில் எதிர்வரும் நாட்களில் முக்கியதுவமிக்க தேர்தல் ஒன்று நடைபெற உள்ள இந்த சூழலில், இதுபோன்ற அரசியல் ரீதியாக சர்ச்சையை ஏற்படுத்தக்கூடிய ஒப்பந்தத்தில் கையெழுத்திடுவது சாத்தியப்படாது என, அமெரிக்க அரச வட்டாரங்கள் கருதுகின்றன.
ஆனால், அரசியல் மற்றும் சமூக ஊடக ஆர்வலர்களின் கருத்துக்களுக்கமைய, ஒரு சிங்கள – பௌத்த தலைவருக்கு ஒரு புதிய மக்கள் ஆணை வழங்கப்படும் என்பதை தவிர, அத்தகைய ஒப்பந்தத்தில் கையெழுத்திட எந்த அரசியல் சக்தியும் இல்லை என தெரிவிக்கப்படுகின்றது.
“தற்போதைய அரசாங்கத்திற்கு அமெரிக்காவுடனான (சோபா) SOFA  ஒப்பந்தத்தில் கையெழுத்திட முடியாது. புதிதாக தெரிவாகும் சிங்கள – பௌத்த ஆதிக்கம் கொண்ட தலைவராலேயே அதில் கைச்சாத்திட முடியும். கடந்த 2007 மார்ச் மாதம் கோட்டா, ஐ.சி.எஸ்.ஏ என்ற ஒப்பந்தத்தில் ஐந்தாவது (Fifth Columnist) நபராக கையெழுத்திட்டார். எனவே அவ்வாறானவர் அமெரிக்க அரச தலைவராக இருக்க வேண்டும் என்பதில் எந்த முரண்பாடும் இருக்காது" என மூத்த ஊடகவியலாளர் குசல் பெரேரா கூறுகின்றார்.
Comment (0) Hits: 17

பக்கம் 1 / 33