V2025

செய்தி

தேர்தல்கள் ஆணைக்குழு தவறை திருத்திக் கொண்டது : ITN எதிரான தடை நீ்க்கிக் கொள்ளப்பட்டது!

ஜனாதிபதி தோ்தலில் வாக்கெடுப்பு நடாத்தப்பட்டு முடிவுகள் அறிவிக்கும் வரையில், சுயாதீனத் தொலைக்காட்சி சேவை (ITN) யின் ஊடாக ஒளிபரப்பப்படும் அரசியல் பின்புலத்தைக் கொண்ட அனைத்து நிகழ்ச்சிகளுக்கும் தடைகளை ஏற்படுத்தி சனிக்கிழமை (02) வெளியிட்ட உத்தரவை நீக்கிக் கொள்வதற்கு தேர்தல்கள் ஆணைக்குழு இன்று தீர்மானித்துள்ளது.

குறித்த உத்தரவு தொடர்பில், பல்வேறு தரப்பினராலும் தெரிவிக்கப்பட்ட கருத்துக்களைக் கவனத்திற் கொண்டதன் பின்னர், விஷேடமாக ஒரு தொலைக்காட்சி அலைவரிசை்கு மாத்திரம் இவ்வாறான உத்தரவை வழங்கியதன் காரணமாக,  வேறான கவனிப்பு மேற்கொள்ளப்படுவதாகத் தெரிவிக்கப்பட்ட கருத்துக்களைக் கவத்திற்கொண்டதன் பின்னர், ஜனாதிபதி தேர்தல் முடிவடையும் வரையில் சுயாதீன தொலைக்காட்சி சேவையின் ஊடாக அரசியல் நேர்காணல்கள்  போன்றவற்றை இடைநிறுத்துமாறு விடுக்கப்பட்ட உத்தரவு நீக்கிக் கொள்ளப்பட்டதாக தேர்தல்கள் ஆணைக்குழு சுயாதீன தொலைக்காட்சி சேவையின் தலைவருக்கு (03) அறிவித்துள்ளது.

Comment (0) Hits: 31

கொழும்பு சங்கிரி-லா நட்சத்திர விடுதியில் கோட்டாபயவின் தேர்தல் பணிகள்! உண்மையா?

கொழும்பு சங்கிரி-லா நட்சத்திர விடுதியில் கோட்டாபய ராஜபக்சவின் தேர்தல் பணிகள் முன்னெடுக்கப்பட்டு வருவதாக தெரியவந்துள்ளதாக நிலவரம் என்ற இணையத்தளம் செய்தி வெளியிட்டுள்ளது.

கோட்டாபாய ராஜபக்சவின் வியத்மக கருத்தரங்கு, தேர்தல் பிரசார விளக்கமளிப்பு கூட்டங்கள் உள்ளிட்ட பல நிகழ்வுகள் நடந்து வருகின்றன. இதற்கான ஏற்பாடுகளை சங்கிரி-லா பணிப்பாளர் சபை உறுப்பினர் சஜாத் மன்சூர் முன்னெடுத்து வாருகிறார்

குறிப்பாக கொழும்பு சங்கிரி-லா நட்சத்திர விடுதியின் 45ஆவது மாடியில் அதிக சொகுசு சூட்ஸ்சில் (Specialty Suites) ஒதுக்கப்பட்டுள்ளதாக சங்கிரி-லா நட்சத்திர விடுதியின் அதிகாரியொருவர் மூலம் தெரியவந்தது.

இதனைத் தவிர, பிரபல முஸ்லிம் வர்த்தகர்களிடம் சுமார் 600 மில்லியன் ரூபா பணம் வசூலிக்கப்பட்டுள்ளதாக தெரியவருகிறது. மெலிபன் டெக்ஸ்ட் டைல், பிரண்டிக்ஸ் உள்ளிட்ட பிரபல எட்டு வர்த்தகர்கள் இந்த பெருமளவு பணத்தை வசூலித்துள்ளனர்.

இதனைத்தவிர, மேல் மாகாண ஆளுநர் முசாமில் சிங்கள, முஸ்லிம் வர்த்தகர்களை அழைத்து பேசி, பணம் வசூலிப்பில் ஈடுபட்டுள்ளார்.

கோட்டாபய ராஜபக்சவின் தேர்தல் பணிகள் இவ்வாறு முன்னெடுக்கப்படும் நிலையில், சஜித் பிரேமதாசவின் தேர்தல் பணிகளை முன்னெடுத்து வரும் அமைச்சர் மங்கள சமரவீரவிற்கும், சஜாத் மன்சூர் நெருக்கமாக செயற்பட்டுள்ளார்.

இதற்காக சஜித் பிரேமசதாக சட்டத்தரணிகள் 1500 பேரை அண்மையில் சந்தித்தபோது, அவர்களுக்கு இரவு நேர விருந்துபசாரத்தையும் சதாத் மன்சூர் வழங்கியுள்ளார்.

சங்கிரி-லா ஓட்டலில் மொட்டுக் கட்சித் தேர்தல் பணிகளை சஜாத் மன்சூர் முன்னெடுத்தாலும், மங்கள சமரவீரவிற்கும் அவர் நெருக்கமாக இருந்துள்ளார் என்று தெரியவந்துள்ளது.

இதேவேளை, ராஜபக்ச தரப்பினரின் வடிகாட்டல்களில், சஜித் பிரேமதாசவிற்கு எதிரான சேறுபூசும் தேர்தல் பிரசாரமொன்றை பிரண்டிக்ஸ் உரிமையாளர் அஷ்ரப் ஓமர், முன்னெடுத்து வருவதாக தெரியவந்துள்ளது. கொழும்பில் உள்ள மற்றுமொரு நட்சத்திர ஓட்டலில் மிக இரகசியமாக இந்தப் பணி முன்னெடுக்கப்பட்டு வருகிறது.

இந்த இடம் மற்றும் பணிகள் குறித்த தகவல்களை எமதுசெய்தியாளர்கள் சேகரித்து வரும் நிலையில், இதுகுறித்த மேலதிக தகவல்களை நிலவரம் வெளியிட எதிர்பார்த்துள்ளதாக அந்த செய்தியில் குறிப்பிடப்பட்டுள்ளது.

பின்குறிப்பு : ஐக்கிய தேசியக் கட்சி, சொத்துக்களை வெளிநாடுகளுக்கு விற்க முயற்சிப்பதாக குற்றஞ்சாட்டி வருகிறது. எனினும், இராணுவ தலைமையகத்தை சீனாவிற்கு தாரைவார்த்த ராஜபக்ச தரப்பினர், தற்போது அதனை தேர்தல் அலுவலகமாக பயன்படுத்தி வருகின்றனர். அத்துடன், ஐக்கிய தேசியக் கட்சி சொத்துக்களை வெளிநாடுகளுக்கு விற்க முயற்சிப்பதாக சிங்கள மக்கள் மத்தியில் பொய்ப் பிரசாரத்தையும் ராஜபக்ச தரப்பினர் முன்னெடுத்து வருகின்றனர்.

Comment (0) Hits: 20

'அபி ஸ்ரீலங்கா' சந்திரிகாவின் மாநாடு இன்று!

ஸ்ரீலங்கா சுதந்திரக் கட்சியின் முன்னாள் தலைவியும் முன்னாள் ஜனாதிபதியுமான சந்திரிகா பண்டாரநாயக்க குமாரதுங்கவவின் தலைமையில், ஸ்ரீலங்கா சுதந்திர கட்சியை பாதுகாக்கும் "அபி ஸ்ரீலங்கா" அமைப்பின் மாநாடு, இன்று (05) கொழும்பு, சுகததாச உள்ளரங்கில் நடைபெறவுள்ளது.

இந்த மாநாட்டில் பங்கேற்குமாறு, கட்சி அமைப்பாளர்களுக்கு பாராளுமன்ற உறுப்பினர் குமார வெல்கம அழைப்பு விடுத்திருந்தார். இதில் பெருமளவிலான ஸ்ரீலங்கா சுதந்திரக் கட்சியின் கீழ் மட்ட பிரதிநிதிகள், ஆதரவாளர்கள் பங்கேற்பார்கள் என்று எதிர்பார்க்கப்படுகிறது.

பொதுஜன பெரமுனவின் வேட்பாளர் கோத்தாபய ராஜபக்சவுக்கு ஆதரவளிக்க சுதந்திரக் கட்சி முடிவு செய்துள்ள நிலையில், அந்த முடிவினால் அதிருப்தியடைந்துள்ள, கட்சித் தலைவர்கள், பிரதிநிதிகள் இந்த மாநாட்டைக் கூட்டியுள்ளனர். இதில்,சஜித் பிரேமதாசவுக்கு ஆதரவளிக்கும் தீர்மானம் நிறைவேற்றப்படலாம் என்று கூறப்படுகிறது.

இந்த மாநாடு, ஸ்ரீலங்கா சுதந்திரக் கட்சியின் மூத்த தலைவர்கள் மத்தியில் பதற்றத்தை ஏற்படுத்தியுள்ளது. இதனால், கட்சி உறுப்பினர்கள், பிரதிநிதிகளை இந்த மாநாட்டில் பங்கேற்காமல் தடுக்கும் வகையில், எச்சரிக்கைகளை விடுத்துள்ளனர். சஜித் பிரேமதாசவுக்கு ஆதரவளிக்கும் நோக்கிலேயே இந்த மாநாடு கூட்டப்பட்டுள்ளது என்றும், இதில் பங்கேற்கும் சுதந்திரக் கட்சியின் உறுப்பினர்கள், பிரதிநிதிகளுக்கு எதிராக கடுமையான ஒழுக்காற்று நடவடிக்கை எடுக்கப்படும் என்றும் கட்சியின் பொதுச்செயலர் தயாசிறி ஜயசேகர எச்சரிக்கை விடுத்துள்ளார்.

பொதுஜன பெரமுன வேட்பாளருக்கு ஆதரவளிக்க ஒருமனதாகவே கட்சி முடிவெடுத்தது என்றும், அதுபற்றி கட்சி அமைப்பாளர்களுக்கு அறிவிக்கப்பட்டுள்ள நிலையில், இந்த மாநாட்டில் பங்கேற்பது கட்சியின் ஒழுக்கத்தை மீறுகின்ற செயல் எனவும் அவர் தெரிவித்துள்ளார். 'அபி ஸ்ரீலங்கா' என்ற பெயரில் சந்திரிகா ஆரம்பித்துள்ள அமைப்பு ஏற்கனவே, சஜித் பிரேமதாசவுக்கு ஆதரவளிக்கும், ஜனநாயக தேசிய முன்னணியுடன் புரிந்துணர்வு உடன்பாட்டில் கையெழுத்திட்டுள்ளமை குறிப்பிடத்தக்கது.

Comment (0) Hits: 16

ரவிக்கும் டேய்சி ஆச்சி உத்வேகம் தருகிறாள்! - லங்காதீப பத்திரிகையின் செய்தி பொய்யானதா?

நிதி மோசடிப் பிரிவின் (FCID) முன்னாள் பணிப்பாளர் ரவி வித்தியாலங்காரவின் மனைவி பெசிலிகா வித்யாலங்கார மற்றும் மகன் அசேல ஜயம்பதி ராஜசுந்தர வித்யாலங்கார  ஆகியோரை நிதி மோசடிப் பிரிவுக்கு அழைப்பதை ஜனாதிபதி தேர்தலின் பின்னர் மேற்கொள்ளுமாறு தேர்தல்கள் ஆணைக்குழு பதில் பொலிஸ் மா அதிபருக்கு அறிவித்துள்ளதாக வெளியான செய்தி பொய்யானது என்றும் தேர்தல்கள் ஆணைக்குழுவிலிருந்து இதுவரையில் அப்படியான கோரிக்கை எதுவும் கிடைக்கவில்லை என பொலிஸ் தலைமையகத்தின் சிரேஷ்ட அதிகாரி ஒருவர் கூறினார்.

ரவி வித்யாலங்காரவின் மகனால் தேர்தல்கள் ஆணைக்குழுவில் செய்த முறைப்பாட்டிற்கு உடனடியாக செயற்பட்டுள்ள தேர்தல்கள் ஆணைக்குழு நிதி மோசடிப் பிரிவின் செயற்பாடுகளுக்கு அழுத்தங்களைச் செய்துள்ளதாக வெளியாகும் செய்திகள் தொடர்பில் வினவிய போதே அவ்வதிகாரி இதனைத் தெரிவித்தார்.

PHOTO 2019 11 02 14 10 44

நிதி மோசடிப் பிரிவின் முன்னாள் பணிப்பாளரும் ஓய்வு பெற்ற சிரேஷ்ட பிரதி பொலிஸ் மாஅதிபருமான ரவி வித்யாலங்காரவின் மகன் தேர்தல்கள் ஆணைக்குழுவில் முறைப்பாடு செய்து, தனக்கும் தனது தாய்க்கும் இம்மாதம் 04 மற்றும் 05ம் திகதிகளில் நிதி மோசடிப் பிரிவில் ஆஜராகி வாக்குமூலம் வழங்குமாறு அறிவித்துள்ளதாகவும், தானும், தனது தாயும் இத்தினங்களில் நிதி மோசடிப் பிரிவுக்குச் சென்று வாக்கு மூலம் வழங்குவது தொடர்பில் ஊடகங்களில் பெரும் பிரசாரங்கள் செய்யப்பட்டுள்ளதாகவும், இதன் மூலம் ஜனாதிபதி தேர்தல் வேட்பாளர் ஒருவருக்கு பெரும் சாதகமான நிலை ஏற்படும் என்றும் அறிவித்துள்ளதாக ஊடகச் செய்தியில் குறிப்பிடப்பட்டுள்ளது.

0a12a68bcbf4fc8bad8bd33b06ec38ae L

அவ்வாறு முறைப்பாடு செய்துள்ள அசேல வித்யாலங்கார, தனக்கும், தாய்க்கும் நிதி மோசடிப் பிரிவில் ஆஜராவதை ஜனாதிபதி தேர்தல் முடிந்த பின்னர் மேற்கொள்ளுமாறு கோரிக்கை விடத்துள்ளதாகவும் அந்தச் செய்தியில் மேலும் குறிப்பிடப்பட்டுள்ளது.

தேர்தல்கள் ஆணைக்குழுவிற்கு அவ்வாறான அதிகாரங்கள் இல்லை!


பொலிஸ் நிதி மோசடிப் பிரவின் முன்னாள் பணிப்பாளர் ரவி வித்யாலங்காரவின் மனைவி மற்றும் மகன் ஆகியோரை நிதி மோசடிப் பிரிவுக்கு அழைத்து வாக்கு மூலம் பெறுவதை ஜனாதிபதி தேர்தலின் பின்னர் மேற்கொள்ளுமாறு தேர்தல்கள் ஆணைக்குழு பதில் பொலிஸ் மா அதிபருக்கு அறிவித்துள்ளதா? என அறிந்து கொள்வதற்கு தேர்தல்கள் ஆணைக்குழுவின் தலைவர் மஹிந்த தேசப்பிரியவை தொலைபேசியில் தொடர்பு கொள்வதற்கு நாம் எடுத்த முயற்சிகள் பயனிக்கவில்லை.  எவ்வாறாயினும் எமது கேள்விக்கு பதில் வழங்கிய மேலே குறிப்பிட்ட சிரேஷ்ட பொலிஸ் அதிகாரி மேலும் கூறும் போது, பொலிஸ் நிதி மோசடிப் பிரிவு மூலம் மேற்கொள்ளப்படும் விசாரணைகளுக்கு அழுத்தங்களைச் செய்து  தண்டனைச் சட்டத்தை இடைநிறுத்துவதற்கு தேர்தல்கள் ஆணைக்குழுவிற்கு அதிகாரங்கள் இல்லை எனத் தெரிவித்தார்.

Comment (0) Hits: 20

இலங்கை தமிழ் அரசு கட்சி சஜித்துக்கு ஆதரவு! (VIDEO)

புதிய ஜனநாயக முன்னணியின் ஜனாதிபதி வேட்பாளர் சஜித் பிரேமதாசவிற்கு இலங்கை தமிழ் அரசு கட்சி ஆதரவு வழங்குவதாக கட்சியின் ஊடகப் பேச்சாளரும் பாராளுமன்ற உறுப்பினர் எம்.ஏ.சுமந்திரன் தெரிவித்துள்ளார்.

இன்று (03) வவுனியாவில் இடம்பெற்ற இலங்கை தமிழ் அரசு கட்சியின் மத்திய செயற்குழு கூட்டத்தை தொடர்ந்து,  ஊடகங்களுக்கு கருத்து தெரிவிக்கும் போதே அவர் இதனை தெரிவித்துள்ளார்.

அவர் மேலும் கருத்து தெரிவிக்கையில்,

"ஜனாதிபதி தேர்தல் தொடர்பாக நீண்ட கலந்துரையாடல் ஒன்று நடாத்தி இருக்கிறோம். இது தொடர்பாக தமிழ் தேசிய கூட்டமைப்பின் ஒருங்கிணைப்பு குழு மற்றும், பாரளுமன்ற குழு கூட்டங்களிலும் இது பற்றி ஆராயப்பட்டிருந்தது. 

இன்று எமது மத்திய செயற்குழுவின் முடிவாக, அன்னம் சின்னத்தில் போட்டி இடுகின்ற சஜித் பிரேமதாசவை ஆதரிக்க வேண்டும் என்ற தீர்மானம் ஏகமனதாக எடுக்கப்பட்டுள்ளது. இந்த தீர்மானம் இலங்கை தமிழரசு கட்சியின் உத்தியோக பூர்வ செயற்குழு இன்றைய தினம் எடுத்திருந்தாலும், தமிழ்தேசிய கூட்டமைப்பின் அங்கத்துவ கட்சியாக இருக்கின்ற காரணத்தினால், இதனை அறிவிப்பது மற்றும் தொடர்ந்தும் முன்னெடுத்து செல்லவேண்டிய விடயங்களை தமிழ் தேசிய கூட்டமைப்பின் தலைவர் சம்பந்தன் ஜயாவின் கைகளில் நாம் ஒப்படைத்துள்ளோம். 

மற்றைய இரண்டு கட்சித் தலைவர்களோடும் கலந்தாலோசித்து இந்த தீர்மானத்தை அறிவிப்பதற்கான நடவடிக்கைகளை அவர் மேற்கொள்வார். பல விடயங்களை ஆராய்ந்திருக்கிறோம். பிரதான வேட்பாளர்கள் இருவர் தொடர்பில் தான் எமது கருத்துக்கள் இருந்தது. அவர்களுடைய கடந்த கால செயற்பாடுகள், தேர்தல் அறிக்கைகள் தொடர்பாக பல விடயங்களை நாம் ஆராய்ந்து, இன்றைய சூழலில் எமது மக்களுக்கு உபயோகமான ஒரு நடவடிக்கையாக சஜித்தை ஆதரிப்பதற்கான நிலைப்பாட்டை ஏகமனதாக எடுத்துள்ளோம்.

எமது கருத்தையும் மக்கள் கேட்கிறார்கள். மக்கள் திறமைசாலிகள் அவர்களிற்கு அரசியல் நன்றாகவே தெரியும். தமிழ் மக்கள் நிதானித்து வாக்களிப்பவர்கள். அவர்களுக்கு அரசியல் தலைமைத்துவம் கொடுக்கவேண்டிய பொறுப்பு எமக்கு இருக்கிறது. ஆகவே, மக்களுடைய கருத்தையும் நாம்  அறிந்திருக்கிறோம். ஆனால், மக்களுக்கு அரசியல் தலைமைத்துவம் கொடுப்பது என்பது 'நீங்கள் விரும்புபவர்களுக்கு வாக்களியுங்கள்' என்று சொல்லுவது அல்ல.

தற்போது இருக்கும் அரியல் அரசியல் சூழ்நிலையிலே தமிழ் மக்கள் சார்பாக, ஏனைய தரப்புகளுடன் மக்களின் பிரதிநிகளாக நாம் பேச்சுவார்த்தை நடாத்துகிறோம். அந்தக் கடப்பாட்டை நாம் சரிவர செய்வதாக இருந்தால் , மக்களிற்கு ஒரு வழி காட்டுதல் கொடுக்கவேண்டிய அத்தியவசிய கடப்பாடு எமக்கு இருக்கிறது. அதை நாங்கள் செய்வோம்" என மேலும் தெரிவித்தார்.

Comment (0) Hits: 19

TNA சஜித்துக்கு ஆதரவு - சம்பந்தன் தலைமையில் முக்கிய கலந்துரையாடல்!

எட்டாவது ஜனாதிபதி தேர்தலில் போட்டியிடும் பிரதான வேட்பாளர்களான முன்னாள் பாதுகாப்புச் செயலாளர் கோத்தாபய ராஜபக்ஷ மற்றும் ஐ.தே.கவின் பிரதி தலைவர் அமைச்சர் சஜித் பிரேமதாஸ ஆகியோரின் தேர்தல் விஞ்ஞாபனங்களின் அடிப்படையில், தமிழ்த் தேசியக் கூட்டமைப்பு சஜித் பிரேமதாஸவுக்கு தனது பூரணமான ஆதரவை வெளியிடுவதற்கு தீர்மானிக்கப்பட்டுள்ளது.

இந்நிலையில், தமிழ்த் தேசியக் கூட்டமைப்பின் பிரதான தரப்பான இலங்கை தமிழரசுக்கட்சியின் மத்திய குழுக் கூட்டம் இன்று காலை 10 மணிக்கு அக்கட்சியின் வவுனியா மாவட்டக் கிளை அலுவலகமான 'தாயகம்' பணிமனையின் பிரதான கேட்போர் கூட்டத்தில் நடைபெற்றது.

தமிழ்த் தேசியக் கூட்டமைப்பின் தலைவரும், தமிழரசுக்கட்சியின் சிரேஷ்ட தலைவருமான இரா.சம்பந்தன் தலைமையில் நடைபெற்ற இந்த மத்திய குழுக் கூட்டத்தில், ஜனாதிபதி தேர்தலில் புதிய ஜனநாயக முன்னணியின் வேட்பாளர் சஜித் பிரேமதஸவை ஆதரிப்பதற்கான காரணங்கள் மற்றும் ஜனதிபதி தேர்தலில் கூட்டமைப்பின் பங்களிப்புச் செயற்றிட்டங்கள் உள்ளிட்ட விடயங்கள் ஆரயாப்பட்டு வருகின்றன.

இக் கலந்துரையாடலில், தமிழ் தேசிய கூட்டமைப்பின் தலைவர் இராசம்பந்தன், பாராளுமன்ற உறுப்பினர்களான துரைரட்ணசிங்கம், சிறிநேசன், சி.யோகேஸ்வரன், சுமந்திரன், சாந்தி சிறிஸ்கந்தராயா, யாழ், மற்றும் மட்டக்களப்பு மாநகரசபை தலைவர்களான ஆர்னோல்ட், தி.சரவணபவன், வடமாகாண முன்னாள் அவைதலைவர் கே.சிவஞானம், முன்னாள் மாகாணசபை உறுப்பினர்களான கே.சயந்தன், குருகுலராயா ஆகியோரும் கலந்துகொண்டுள்ளனர்.

Comment (0) Hits: 30

ராஜபக்ஷ ஆட்சியின் அடிப்படை இதோ! - மஹிந்த குடும்பத்தின் நெருக்கமான நண்பர் சஜின் வெளிப்படுத்தினார்! (காணொளி)

ராஜபக்ஷக்கள் அரசியல் செய்தது இனவாதம், மதவாதம், அடிப்படைவாதம் ஆகிய மூன்று முக்கிய விடயங்களைின் அடிப்படையிலேயே என ராஜபக்ஷ அரசில் இருந்த முக்கிய கண்காணிப்பு பாராளுமன்ற உறுப்பினரான சஜின்வாஸ் குணவர்தன கூறினார்.

“பொது பல சேனாவை எடுத்துக் கொண்டால், அதனை யார் ஆரம்பித்து?, யார் நிதி வழங்கியது?, யார் உதவி செய்தது?. அடுத்தது இனவாதம், அடிப்படைவாதம், மதவாதம் ஆகிய மூன்றையும் அடிப்படையாகக் கொண்டே நாம் அரசியல் செய்தோம். இதனால்தான் இவைகளின் பலனை நாம்  2015ம் ஆண்டில் பெற்றோம். அப்போதிலிருந்து இந்தக் கொள்கைகளை அவர்கள் இன்று வரையில் மாற்றிக் கொள்ளவில்லை....” என அவர் UTV  தொலைக்காட்சியுடன் இடம்பெற்ற நேர்காணலின் போது கூறியுள்ளார்.

UTV - நீங்கள் ராஜபக்ஷ ஆட்சியிலிருந்து முக்கியமான பாராளுன்ற உறுப்பினர் ஒருவர் என்பதை நாம் அறிவோம். அப்போது ஊடகங்கள் கூறியதைப் போன்று நீங்கள் பாரியளவிலான டீல் கொடுக்கல் வாங்கள் மற்றும் வெளிநாட்டு முதலீடுகள் தொடர்பில் தீர்மானங்களை மேற்கொள்ளும் பிரதானமாக நேரடியாக தலையீட்டினைச் செய்த ஒரு பாராளுமன்ற உறுப்பினராகும். அவ்வாறிருந்த நீங்கள் ஏன் திடீரென சஜித் பிரேமதாசாவின் மேடையில் ஏறினீர்கள்?

சஜின் - அந்தக் காலத்தில் இருந்த மாபெரும் திருடன் நான் என்றுதானே காட்டப்பட்டது. அவர்கள் இதோ இவர்தான் திருடன், இவரைப் பிடித்துக் கொள்ளுங்கள் என என்னைக் காட்டினார்கள். ஆனால் உண்மை என்னவென்றால் அந்த எந்தவிதமான கொடுக்கல் வாங்கள்களிலும் நான் இருக்கவில்லை. உங்களைப் போன்றவர்கள் கூறுவதைப் போன்று ஒரு டீல்களையேனும் நான் செய்திருக்கவில்லை. என்மீது தாக்கல் செய்யப்பட்ட இரண்டு மூன்று வழக்குகள் உள்ளன. அவற்றில் இப்போது இரண்டுதான் உள்ளது. அந்த வழக்குகளிலும் அரசின் எதுவும் சம்பந்தப்படவில்லை.

அரச நிதி, அல்லது நீங்கள் கூறும் டீல், நீங்கள் கூறும் கொடுக்கல் வாங்கள், நீங்கள் கூறும் அந்த எந்த விடயத்திற்கும் என்மீது வழக்குத் தாக்கல் செய்யவில்லை.  எனது வரலாற்றில் ராஜபக்ஷக்களுடன் 15, 17 வருடங்களாகும்.

2010ம் ஆண்டு வரையில் மஹிந்த ராஜபக்ஸ இதனை நன்றாகச் செய்து கொண்டு வந்தார். எந்தப் பிரச்சினையும் இருக்கவில்லை. 2010ம் ஆண்டின் பின்னர்தான் நான் கண்ட மாற்றம் ஏற்பட்டது. அது நாமல் ராஜபக்ஸவின் அரசியல் பிரவேசத்துடன் ஆரம்பித்த மாற்றமாகும்.

ஸ்ரீலங்கா பொதுஜன பெரமுண கட்சியினுள் ஏற்றுக் கொள்ளக் கூடிய ஒரு முஸ்லிம் அரசியல்வாதி உள்ளாரா? முன்னணியான ஒரு முஸ்லிம் தலைவர் இருக்கின்றாரா? என எனக்குக் கூறுங்கள். அவ்வாறு யாரும் அந்தக் கட்சியில் இல்லை.  எனவே அந்தக் கட்சிய இன்று இனவாதம், மதவாதம், அடிப்படை வாதம் ஆகியவற்றுடனேயே பயணிக்கின்றது. இந்த மூன்றையும் அடிப்படையாகக் கொண்டே அவர்கள் அரசியல் செய்கின்றார்கள்” எனத் தெரிவித்துள்ளார்.

Comment (0) Hits: 19

சஜித்துக்காக சந்திரிகா வட கிழக்கைப் பொறுப்பேற்றார்!

நடைபெறவுள்ள ஜனாதிபதித் தேர்தலில் ஐக்கிய தேசிய கட்சியின் பிரதி தலைவர் சஜித் பிரேமதாசாவுக்கு ஆதரவு வழங்குவதற்குத் தீர்மானித்துள்ள முன்னாள் ஜனாதிபதி சந்திரிகா பண்டாரநாயக்கா குமாரதுங்க, வட கிழக்கு பிரதேசங்களில் தேர்தல் நடவடிக்கைகளை ஏற்பாடு செய்வதற்கு தற்போது நடவடிக்கைகளை மேற்கொண்டுள்ளார்.

இதனடிப்படையில், வடக்கின் பல அரசியல்வாதிகளுடன் சந்திரிகா தற்போது பல தீர்க்கமான பேச்சுவார்த்தைகளையும் நடாத்தியுள்ளதாக அரசியல் வட்டாரங்களிலிருந்து தெரிய வந்துள்ளது.  

அமைச்சர் சஜித் பிரேமதாசா ஜனாதிபதித் தேர்தலில் போட்டியிடும் புதிய ஜனநாயக தேசிய முன்னணியுடன் அரசியல் கட்சிகள் மற்றும் சிவில் அமைப்புக்கள் பல ஒப்பந்தங்களைச் செய்யும் நிகழ்வு  (01) கொழும்பில் இடம்பெற்றதோடு, முன்னாள் ஜனாதிபதியும் அந்த நிகழ்வில் கலந்துகொண்டிருந்தார்.  ஐக்கிய தேசிய முன்னணியின் தலைவர்களோடு முன்னாள் ஜனாதிபதி மேடையில் அமர்ந்திருந்த போதிலும், கூட்டத்தில் அவர் உரையாற்றவில்லை

Comment (0) Hits: 36

ஜோன்ஸ்டனின் அடியாட்கள் சாந்த பண்டாரவுக்கும் “ஹூ” கோஷம்!

ஐக்கிய மக்கள் சுதந்திரக் கூட்டணியின் பாராளுமன்ற உறுப்பினர் சாந்த பண்டாரவுக்கும் ஜனாதிபதி தோ்தல் பிரசாரக் கூட்டத்தின் போது “ஹூ” கோஷம் போடப்பட்டுள்ளது. அலவ்வ பிரதேசத்தில் மொட்டுவின் ஜனாதிபதி வேட்பாளர் கோட்டாபய ராஜபக்ஷவின் வெற்றியை உறுதிப்படுத்துவதற்காக ஏற்பாடு செய்யப்பட்டிருந்த கூட்டத்தின் போதே, இவ்வாறு சாந்த பண்டாரவுக்கு ஹூ கோஷம் போடப்பட்டுள்ளது.

இவ்வாறு மொட்டு மேடையில் ஏறும் ஸ்ரீ.ல.சு.கட்சி பாரளுமன்ற உறுப்பினர்களுக்கு ஹூ கோஷம் போடப்படுவது, மொட்டு கட்சியுடன் இணைந்துள்ள எந்த ஒரு ஸ்ரீ.ல.சு.கட்சியின் உறுப்பினர்களுக்கும் ஹூ கோஷம் போடக்கூடாது என எதிர்கட்சித் தலைவர் மஹிந்த ராஜபக்ஷ மற்றும் மொட்டுவின் ஜனாதிபதி வேட்பாளர் கோட்டாபய ராஜபக்ஷ ஆகியோர் தமது கட்சி ஆதரவாளர்களிடத்தில் பல சந்தர்ப்பங்களிலும் அறிவுறுத்தியிருந்த போதேயாகும்.

இதேவேளை, எதிர்கட்சித் தலைவர் மஹிந்த ராஜபக்ஷ இந்தக் கூட்டத்தில் உரையாற்றும் போது, அங்கு கூடியிருந்த மது போதையிலிருந்தவர்கள் கூக்குரலிட்டுள்ளதோடு அதனையடுத்து அவரும் தனது உரையினை முடித்துக் கொண்டதோடு, இதன் பின்னர் மாலையில் பிரசாரக் கூட்டங்களை நடாத்துவதில்லை எனவும் தெரிவித்துள்ளார்.  இனிமேல் காலை வேளையிலேயே பிரசாரக் கூட்டங்களை நடாத்துவதாகவும் எதிர்கட்சித் தலைவர் மஹிந்த ராஜபக்ஷ இதன் போது கூறியுள்ளார்.

Comment (0) Hits: 18

தேர்தலில் வாக்களிப்பு பகிஷ்கரிப்பு எதுவுமில்லை - TNA யின் தீர்மானம் அடுத்த வாரம்!

ஜனாதிபதித் தோ்தலில் போட்டியிடும் பிரதான வேட்பாளர்களான சஜித் பிரேமதாச மற்றும் கோட்டாபய ராஜபக்ஷ ஆகிய இருவரில் தமது கூட்டமைப்பு ஆதரவு வழங்கும் வேட்பாளர் யார்? என்பது தொடர்பில் இன்னமும் தீர்மனிக்கப்படவில்லை என்றும், அடுத்த வாரத்தில் அதனைத் தெரிவிக்க முடியும் என்றும் தமிழ் தேசிய கூட்டமைப்பின் பாராளுமன்ற உறுப்பினர்  எம். ஏ. சுமந்திரன் கூறினார்.  

இதனிடையே தமிழ் மக்கள் கூட்டணியின் தலைவரும் முன்னாள் வட மாகாண முதலமைச்சருமான சீ.வீ.விக்னேஸ்வரன் கருத்து தெரிவிக்கையில், தமிழ் மக்களுக்காக 13 கோரிக்கைகளை  சில தினங்களுக்கு முன்னர் ஜனாதிபதி வேட்பாளர்களின் கவனத்திற்குக் கொண்டுவரப்பட்ட போது, கோட்டாபய ராஜபக்ஷ பேச்சுவார்த்தையின்றி உடனடியாக பதிலை வழங்கி அது  நிராகரிக்கப்பட்டதோடு, ஏனையவர்களிடத்திலிருந்தும் இதற்கான பதில் கிடைக்காத காரணத்தினால், சிறுபான்மையினர் தொடர்பில் உணர்வுபூர்வமற்ற சிங்கள வேட்பாளர்களுக்கு வாக்கை அளிப்பது பயனற்றது என்றும் தெரிவித்துள்ளார்.

தமிழ் மக்கள் நடைபெறவுள்ள ஜனாதிபதி தேர்தலில் வாக்களிப்பார்கள் என்றும், வாக்களிப்பை பகிஷ்கரிக்கப் போவதில்லை என்றும் அவர் மேலும் கூறும் போது தெரிவித்துள்ளார்.

Comment (0) Hits: 27

கோட்டாபய தெற்கில் மறைத்து வடக்கில் கூறிய விடயம்! (காணொளி)

தமிழ் அரசியல் கைதிகளை விடுதலை செய்வதாக மொட்டு கட்சியின் ஜனாதிபதி வேட்பாளர் கோட்டாபய ராஜபக்ஷ வடக்கில் தெரிவித்த  பகிரங்க விடயத்தை, அவரது தேர்தல் பிரசார அமைப்பு தெற்கில் மறைத்துள்ளது.

அவர் யாழ்ப்பாணத்தில் வைத்து பயங்கரவாத குற்றச்சாட்டுக்களின் கீழ் கைது செய்யப்பட்டுள்ள சிறைக் கைதிகளை விடுவிப்பதாக் கூறியிருந்தார்.

“நாம் எல்.டி.டி.ஈ உறுப்பினர்கள் 13,000 பேரை புனர்வாழ்வளித்து விடுதலை செய்துள்ளோம். 5000க்கும் மேற்பட்ட சிறைக் கைதிகளுள் 274 பேரைத் தவிற ஏனைய அனைவரையும் நாம் விடுதலை செய்திருக்கின்றோம். நான் ஜனாதிபதியாக வெற்றி பெற்றால் மீதமான அனைவரையும் புனர்வாழ்வளித்து விடுதலை செய்வதாக நான் கடந்த திங்கட்கிழமை யாழில் மக்களுக்கு வாக்குறுதி வழங்கினேன்” என கோட்டாபய ராஜபக்ஷவின் டுவீட்டர் வலைத்தளத்தில் தமிழில் வெளியிட்டுள்ள செய்தியில் குறிப்பிடப்பட்டுள்ளது.

இந்தக் கூற்றை சிங்களம் அல்லது ஆங்கிலத்தில் இதுவரையில் காணக் கிடைக்கவில்லை.

Comment (0) Hits: 18

வறுமையினை விற்பனை செய்யும் அரசாங்கத்திற்கு பதிலாக வறுமையினை ஒழிக்கும் அரசாங்கத்தை அமைப்போம் - அநுர குமார

வறுமையினை விற்கும் அரசாங்கத்திற்கு பதிலாக வறுமையினை ஒழிக்கும் அரசாங்கம் ஒன்றை உருவாக்குவோம் என தேசிய மக்கள் இயக்கத்தின் ஜனாதிபதி வேட்பாளர் அநுர குமார திசாயநாயக்கா தெரிவித்துள்ளார்.  அம்பாறை நகரில் இடம்பெற்ற தேர்தல் பிரசாரக் கூட்டத்தில் கலந்து கொண்டு உரையாற்றும் போதே அவர் இதனைத் தெரிவித்துள்ளார்.

இங்கு தொடர்ந்தும் உரையாற்றி அநுர குமார திசாநாயக்கா மேலும் கூறியதாவது,

“தற்போது தேர்தல் ஒன்று வந்திருக்கின்றது. எனினும் இம்முறை இது ஒரு தேர்தல் காலமாகத் தெரியவில்லை. நத்தால் காலத்தைப் போன்றிருக்கின்றது. ஒருவர் கூறுகின்றார், நான் வெற்றி பெற்றால் வேளான்மைச் செய்கைக்கு இலவசமாக உரம் தருவேன் என்று. இன்னொருவர் தான் வெற்றி பெற்றால் அனைத்து பயிர்ச் செய்கைக்கும் இலவசமாக உரம் தருவேன் என்கிறார்.

பிள்ளைகள் இருக்கும் இடத்தில் என்றால், நான் வெற்றி பெற்றால் ஒரு கப் பால் தருவேன் எனக் கூறுகின்றனர். பட்டதாரிகள் இருக்கும் இடத்தில், அனைவருக்கும் அரச தொழில் வழங்குவதாகக் கூறுகின்றனர். கர்ப்பிணித் தாய்மார் இருக்கும் இடத்தில், அனைவருக்கும் போஷாக்கு பொதி வழங்குவேன் என்கிறார்கள். நத்தால் தாத்தாக்கள் இருவர் வந்தததை்ப் போன்று.

நான் அனைவருக்கும் இலவசமான அரிசி வழங்குவேன் என அன்று ஸ்ரீமாவோ பண்டாரநாயக்கா கூறியபோது, எங்கிருந்து அந்தளவு அரிசியைக் கொண்டு வருவீர்கள் என யாரோ ஒருவர் திரும்ப கேட்டிருக்கின்றார். அப்போது அவர் கூறியிருக்கின்றார், நான் சந்திரனிலிருந்தாவது அரிசியைக் கொண்டு வந்து தருவேன் எனக் கூறியிருக்கின்றார். அதற்கும் மக்கள் கைதட்டியிருக்கின்றார்கள்” என்றார்.

Comment (0) Hits: 14

வெளிச்சத்துக்கு வரும் ஹிஸ்புல்லாவின் மறுபக்கம்!

ஜனாதிபதித் தேர்தலில் கோட்டாவை நிச்சயித்ததன் மூலம் ஜனாதிபதி வேட்பாளர் ஹிஸ்புல்லாஹ், முஸ்லிம் சமூகத்துக்கு மீண்டும் துரோகம் இழைத்துள்ளார். சிறுபான்மை சமூகத்தில் பெரும்பான்மையானோர் சஜித் பிரேமதாசவை ஆதரிப்பதற்கு மாற்றமாக, ஹிஸ்புல்லாஹ் தனது சுயநலத்துக்காகவும் பதவி ஆசைக்காகவும் கோட்டாவை வெல்ல வைப்பதற்காக, ஜனாதிபதி தேர்தலில் போட்டியிடுவது தற்போது உறுதியாகியுள்ளது. முஸ்லிம்களின் வாக்குகளை சிதறடித்து, சஜித்துக்கு கிடைக்கவிருக்கும் முஸ்லிம் வாக்குகளை குறைத்து, கோட்டாவை வெல்ல வைப்பதற்கு இவருக்கு வழங்கப்பட்ட கொந்தராத்தை அவர் கச்சிதமாக செய்து வருகின்றார்.

இலங்கை வாழ் முஸ்லிம்களின் நல்வாழ்வுக்காக அரபு நாடுகள் வழங்கிய பணமும் சஜித்தை தோற்கடிப்பதற்காக பசில் வழங்கிய பணமும் ஹிஸ்புல்லாவின் பிரசாரத்துக்கு இலட்சக் கணக்கில் அள்ளி வீசப்படுகின்றது. புத்திஜீவிகள் எனக் கூறிக்கொள்ளும் சிலரும் வியாபாரிகளும் இவரது வலையிலே சிக்கியுள்ளனர்.

ஹிஸ்புல்லாஹ் ‘துரோகத்தின் அடையாளம்’ என்பதை கடந்த காலங்களில் நிரூபித்துள்ளார். ஸ்ரீலங்கா முஸ்லிம் காங்கிரஸின் ஸ்தாபகத் தலைவரும் முஸ்லிம் சமூகத்துக்கு அரசியல் முகவரி கொடுத்தவருமான மர்ஹூம் அஷ்ரப் அவர்களுக்கே துரோகமிழைத்தவர் தான் இவர். மொஹிதீன் அப்துல் காதருக்கு பாராளுமன்ற பதவியில் அரைவாசிக் காலத்தை வழங்க வேண்டுமென்று, மர்ஹூம் அஷ்ரப் அவர்களிடம் வழங்கிய எழுத்துமூல ஒப்பந்தத்தையும் அவர் மீறினார்.

முஸ்லிம் காங்கிரஸ் தலைவர் ஹக்கீமுடன் முரண்பட்டு, அவருக்கும் துரோகமிழைத்தார். மர்ஹூம் அஷ்ரபின் பாரியார் திருமதி.பேரியல் அஷ்ரபிற்கு துரோகம் செய்து, வேறுவழி சென்றவர். அதேபோன்று, அகில இலங்கை மக்கள் காங்கிரஸுடன் இணைந்து எம்.பியாகிய பின்னர், கடந்த 2015 ஆம் ஆண்டு அக்கட்சி மைத்திரிக்கு ஆதரவளித்த போது, சமூக இருப்புக்கு மாறாக ஹிஸ்புல்லாஹ், மஹிந்தவுக்கு ஆதரவளித்தார்.

மேடைகளிலே மைத்திரியை மிக மோசமாக ஏசித் திரிந்த அவர், தேர்தலில் தோற்ற பின்னர் தேசியப் பட்டியலுக்காக, மைத்திரியின் கால்களில் விழுந்து சாஷ்டாங்கம் செய்து, எம்.பி பதவியையும் ஏக காலத்தில் இராஜாங்க அமைச்சர் பதவியையும் பெற்றார். இப்போது, கோட்டாவை வெல்ல வைப்பதற்காக அவரது கொந்தராத்தை எடுத்து, சமூகத்துக்கு பாரிய துரோகம் இழைத்துள்ளார். ஜனாதிபதித் தேர்தலில் சஜித் வெற்றி பெற்றால் எவருடைய காலைப் பிடித்தாவது, சஜித்திடம் எம்.பி பதவியை பெற்றுகொள்ள கெஞ்சுவார்.

தேர்தல் பிரசாரங்களில் அவர் அவ்வாறுதான் கூறியும் வருகின்றார். அவரது “நமது கனவு” இவ்வாறுதான் இருக்கப்போகின்றது.

 
Comment (0) Hits: 28

மீண்டும் கோட்டாபயவுக்கு சவால் விடுத்தார் சஜித்!

தன்னுடன் நேரடி தொலைக்காட்சி விவாதத்துக்கு வருமாறு 10 நாட்களுக்கு முன்னர் தேசிய ஜனநாயக முன்னணியின் ஜனாதிபதி வேட்பாளர் சஜித் பிரேமதாஸ எதிரணி வேட்பாளர் கோட்டாபய ராஜபக்ஷவுக்கு சவால் விடுத்தார். அது தொடர்பில் அன்று தனது உத்தியோகபூர்வ டுவிட்டரில் பதிவொன்றை இட்டிருந்தார்.

இந்நிலையில், குறித்த சவாலை ஞாபகப்படுத்தி பகிரங்க விவாதத்துக்கு வருமாறு பொதுஜன பெரமுனவின் ஜனாதிபதி வேட்பாளர் கோட்டாபய ராஜபக்ஷவுக்கு  தேசிய ஜனநாயக முன்னணியின் ஜனாதிபதி வேட்பாளர் சஜித் பிரேமதாஸ கடிதமொன்றை அனுப்பியுள்ளதுடன், அதனை தனது உத்தியோகபூர்வ டுவிட்டர் பக்கத்திலும் பதிவிட்டுள்ளார்.

அப்பதிவில் அவர், “எங்கள் கொள்கைகள் பற்றிய விவாதிப்பதற்காக 10 நாட்களுக்கு முன்பு நான் கோட்டாபயவுக்கு சவால் விடுத்தேன். ஆனால் அவர் பதிலளிக்கவில்லை. பொதுமக்கள் காத்திருக்கிறார்கள். நானும் காத்திருக்கிறேன். தயவுசெய்து இன்று உங்கள் மனதை மாற்றி எனது சவாலுக்கு பதிலளியுங்கள் என்று குறிப்பிட்டுள்ளார்.

Comment (0) Hits: 17

தமிழ் மக்களின் தலையெழுத்தை மாற்றியமைக்க வரும் "திருகோணமலை பிரகடனம்"

தமிழ் மக்களை பிரதிநிதித்துவம் படுத்தும் பொதுவேட்பாளராக இம்முறை ஜனாதிபதி தேர்தலில் போட்டியிடும் முன்னாள் வடமாகாண சபைஉறுப்பினர் எம். கே. சிவாஜிலிங்கம் ஒட்டு மொத்தமாக தமிழர் பிரதேசங்கள்புறக்கணிக்கப்பட்டுள்ளதாக தெரிவித்திருந்தார்.

கிழக்கு மாகாணத்தின் பல பிரதேசங்களில் குறிப்பாக திருகோணமலைதமிழ் சமூகம் பல்வேறுபட்ட இன்னல்களை சந்திக்கின்றதாகவும் இவர் கடந்த காலங்களில்குறிப்பிட்டிருந்தார்.

இந்த நிலையில் ஜனாதிபதி வேட்பாளர் எம். கே.சிவாஜிலிங்கத்தின் தேர்தல் விஞ்ஞாபனமும், பொதுக்கூட்டமும் தமிழர்களின் தலை நகராக கருதப்படும் திருகோணமலையில் எதிர்வரும் ஒன்பதாம்திகதி வெளியிடப்படவுள்ளதாக தெரிவிக்கப்படுகின்றது.

"திருகோணமலைபிரகடனம்" எனும் தொனிப்பொருளில் இந்த தேர்தல் விஞ்ஞாபனம் வெளியிடப்படவுள்ளது.பல வருடங்களாக பாதிக்கப்பட்டுள்ள தமிழ் மக்களின் பிரச்சினைகளுக்கு விடியலாக இது அமையும்என பலரால் எதிர்பார்க்கப்படுவதாக முன்னாள் வடமாகாண சபை உறுப்பினர் எம். கே.சிவாஜிலிங்கம் குறிப்பிட்டார்.

Comment (0) Hits: 30

அமெரிக்க உடன்படிக்கைக்கு எதிராக நீதிமன்றில் மனுத் தாக்கல்

அமெரிக்காவுடன் இலங்கை அரசாங்கம் ஏற்படுத்திக் கொள்ளவுள்ள மிலேனியம் சலன்ஞ் கோப்ரேசன் (MCC) வேலைத்திட்ட ஒப்பந்தங்களில் கைச்சாத்திடுவதை தடுக்கும் வகையில், உத்தரவொன்றை பிறப்பிக்குமாறு கோரி உயர் நீதிமன்றில் அடிப்படை மனுவொன்று தாக்கல் செய்யப்பட்டுள்ளது.

இந்த அடிப்படை மனு சட்டத்தரணி தர்ஷன வேரதுவகேவால் தாக்கல் செய்யப்பட்டுள்ளது.

இதன் பிரதிவாதிகளாக சட்டமா அதிபர், ஜனாதிபதி மைத்திரபால சிறிசேன, பிரதமர் ரணில் விக்கிரமசிங்க, வெளிவிவகார அமைச்சர் திலக் மாரப்பன மற்றும் நிதி அமைச்சர் மங்கள சமரவீர ஆகியோர் பெயரிடப்பட்டுள்ளனர்.

இதேவேளை, அமெரிக்காவுடன் எக்ஸா, எம்சீசீ, சோபா ஆகிய உடன்படிக்கைகளில் கைச்சாத்திட இடைகால தடை உத்தரவை பிறப்பிக்க கோரி, உயர் நீதிமன்றில் அடிப்படை உரிமை மீறல் மனு தாக்கல் செய்யப்பட்டுள்ளமை குறிப்பிடத்தக்கது.

Comment (0) Hits: 27

உயிர்த்த ஞாயிறு தாக்குதல்; வெளிவரவிருக்கும் காணொளியால் அச்சத்தில் கோத்தபாய தரப்பு!

ஈஸ்டர் ஞாயிறு தாக்குதலுடன் ஜனாதிபதி வேட்பாளர் கோத்தாபய ராஜபக்ஷவுக்கு தொடர்பு இருப்பதாக சேறுபூசும் காணொளி ஒன்றை ஐக்கிய தேசியக் கட்சியின் பிரசாரப் பிரிவு வெளியிட உள்ளதாக, ஸ்ரீலங்கா பொதுஜன பெரமுன ஊடக சந்திப்புகளில் தெரிவித்து வருகிறது.

இந்தக் காணொளி சம்பந்தமான சில விடயங்களை பொதுஜன பெரமுனவினர் கூறியுள்ளனர். இதில் ஒரு காணொளியை ஐக்கிய தேசியக் கட்சியின் ஊடகப் பிரிவின் பொறுப்பாளர் துஷார வன்னியாராச்சி தயாரித்து வருவதாக பொதுஜன பெரமுனவினர் கூறியுள்ளனர்.

இதற்கு பதிலளித்துள்ள துஷார வன்னியாராச்சி, தனக்கு எதிராக சுமத்தப்பட்டுள்ள குற்றச்சாட்டு குறித்து விசாரிக்குமாறு குற்றப் புலனாய்வு திணைக்களத்தில் முறைப்பாடு செய்துள்ளார்.

உண்மையில் கோத்தாபய ராஜபக்ஷவுக்கு எதிராக இப்படியான காணொளி தயாரிக்கப்பட்டுள்ளதா? அல்லது தயாரிக்கப்படுகிறதா? என்ற தகவல்கள் வெளியாகவில்லை. எனினும் ராஜபக்ஷ தரப்பின் பிரசாரப் பிரிவினர், இது குறித்து கடும் அச்சத்திலும் அதிர்ச்சியிலும் இருப்பதாக கூறப்படுகிறது.

பொய்யான காணொளி என்றால், எவரும் இந்தளவுக்கு அச்சப்பட வேண்டிய தேவையில்லை எனவும் பொய்யானது என்பதை உறுதிப்படுத்த காரணங்களை முன்வைக்க முடியும் எனவும் பொய்யான காணொளியை தயாரித்தவர்களுக்கு எதிராக சட்ட நடவடிக்கை எடுக்க முடியும் எனவும் ஐக்கிய தேசியக் கட்சியினர் தெரிவித்துள்ளனர்.

சஹ்ரான் உட்பட ஈஸ்டர் ஞாயிறு தாக்குதலுடன் சம்பந்தப்பட்டவர்களுக்கு புலனாய்வு ஒற்றர்கள் என்ற ரீதியில், ராஜபக்ஷ அரசாங்கத்தின் காலத்தில் வசதிகளை வழங்கி, சம்பளம் கொடுக்கப்பட்டதாக எதிர்க்கட்சித் தலைவர் மஹிந்த ராஜபக்சவே அண்மையில் கண்டியில் மாநாயக்க தேரர் ஒருவரிடம் கூறியிருந்தார்.

அதேவேளை தான் ஆட்சிக்கு வந்த பின்னர், ஈஸ்டர் ஞாயிறு தாக்குதல் சம்பந்தமான மற்றுமொரு ஆணைக்குழுவை நியமிக்க உள்ளதாக அன்றைய பாதுகாப்பு அமைச்சின் செயலாளர் கோத்தாபய ராஜபக்ச, கொழும்பு பேராயர் வணக்கத்திற்குரிய கர்தினால் மெல்கம் ரஞ்சித்திடம் வாக்குறுதியளித்துள்ளார்.

அண்மையில் சாய்ந்தமருது பிரதேசத்தில் நடைபெற்ற தேர்தல் பிரசாரத்தில் உரையாற்றிய மஹிந்த ராஜபக்ச, ஈஸ்டர் தாக்குதலின் பின்னர், வரலாற்றில் முதல் முறையாக முஸ்லிம்களுக்கு பள்ளிவாசலுக்கு செல்ல முடியாமல் போனதாகவும் குண்டுகளை வெடிக்க செய்த சஹ்ரான்கள் இதற்கு பொறுப்புக் கூற வேண்டியதில்லை எனவும் குண்டு வெடிக்க போவது தெரிந்தும் உறங்கிக் கொண்டிருந்த ஆட்சியாளர்களே இதற்கு பொறுப்புக் கூற வேண்டும் எனவும் கூறியிருந்தார்.

ஈஸ்டர் ஞாயிறு தாக்குதல் தொடர்பாக உயர் நீதிமன்றத்தில் வழக்கு தொடர்ந்துள்ள கத்தோலிக்க பங்கு தந்தை ஒருவர், இந்த தாக்குதல் தொடர்பான புலனாய்வு தகவலை எதிர்க்கட்சித் தலைவர் மஹிந்த ராஜபக்ச அறிந்திருந்ததாக கூறியுள்ளார்.

ஈஸ்டர் ஞாயிறு தாக்குதல் சம்பந்தமாக முதலை கண்ணீர் வடிக்கும் ராஜபக்சவினர், ஜனாதிபதித் தேர்தலில் வெற்றி பெறுவதற்காக கத்தோலிக்க மக்களின் வாக்குகளை பெற குழம்பிய குட்டையில் மீன்பிடிக்கும் நடவடிக்கைகளில் ஈடுபட்டுள்ளதாக ஐக்கிய தேசியக் கட்சியினர் குற்றம் சுமத்தியுள்ளனர்.

 

Comment (0) Hits: 33

MCC ஒப்பந்தம்; அமெரிக்க தூதரகம் முக்கிய அறிவிப்பு!

அனைத்து பங்காளி நாடுகளிலுமான மிலேனியம் சலேஞ்ச் கோர்ப்பரேஷனின் (Millennium Challenge Corporation - MCC) உலகளாவிய கொள்கைக்கு இசைவானதாக, இந்த (கடனற்ற) நிதியுதவிக்கான ஒப்பந்தம் கைச்சாத்திடப்பட்டதும் இலங்கை அரசாங்கம் அதை பாராளுமன்ற அங்கீகாரத்திற்காக அனுப்பி வைக்க வேண்டுமென இலங்கைக்கான அமெரிக்க தூதரகம் தெரிவித்துள்ளது. அதன் மூலம், இந்த நிதியுதவி ஒப்பந்தத்தை மீளாய்வு செய்ய பாராளுமன்றத்துக்கு போதிய சந்தர்ப்பம் கிடைக்கும் எனவும் அமெரிக்க தூதரகம் அறிவித்திள்ளது.

இந்த மீளாய்வு காலப்பகுதியில், நிதியுதவி ஒப்பந்தத்தை அமுல்படுத்துவதற்கான திட்டங்களை தயாரிப்பதற்கும் போக்குவரத்து மற்றும் காணி நிர்வாகத்தை மேம்படுத்துவதற்கான செயற்பாட்டுத் திட்டங்களை வடிவமைப்பதற்கும் இலங்கை அரசாங்கம் செயற்படும். இந்த நிதியுதவி ஒப்பந்தமானது 11 மில்லியனுக்கும் மேற்பட்ட இலங்கையர்களுக்கு நேரடியாக நன்மைபயக்கும் என்பதுடன், பொருளாதார வளர்ச்சியையும் அர்த்தபுஷ்டியான வகையில் ஊக்குவிக்கும்.

இந்த நிதியுதவி ஒப்பந்தத்திற்கு அரசாங்கத்தினதும் மக்களினதும் ஆதரவு இருக்கிறது என்பதை உறுதிசெய்து கொள்வதற்கு பாராளுமன்றத்தினது மீளாய்வு மற்றும் ஒப்புதல் மிலேனியம் சலேஞ்ச் கோர்ப்பரேஷனுக்கு தேவைப்படுகிறது.

மிலேனியம் சலெஞ்ச் கோப்ரேஷன் போக்குவரத்துத் திட்டம்

போக்குவரத்துத் திட்டமானது 350 மில்லியன் டொலர்களைக் கொண்டது என மதிப்பீடு செய்யப்பட்டிருப்பதுடன் இது மேல், மத்திய, சப்ரகமுவ மற்றும் ஊவா மாகணங்களில் நகர மற்றும் கிராமிய நகரும் தன்மையை இருவழியில் முன்னேற்றுவது இதன் நோக்கமாகும். முதலில் கொழும்பு பெருநகரப் பிராந்தியத்தில் காணப்படும் வாகன நெரிசலை எளிதுபடுத்துவதுடன், பொதுப் போக்குவரத்தை முன்னேற்றும். கொழும்பை மேலும் வாழக்கூடிய, நன்கு செயற்படக்கூடிய நகரமாக்குவதற்கு போக்குவரத்து உரிமையைப் பெறுவது முக்கியமானதாகும். இரண்டாவதாக, போக்குவரத்துத் திட்டமானது மேல் மாகாணத்திலுள்ள துறைமுகங்கள் மற்றும் சந்தையுடன் நாட்டின் மத்திய பகுதியை இணைப்பதை மேம்படுத்தும். போக்குவரத்துத் திட்டமானது போக்குவரத்து உட்கட்டமைப்பு மற்றும் பொறிமுறைகளை தரமுயர்த்தும். இது மூன்று செயற்பாடுகளைக் கொண்டதாகும்:

* கொழும்பு பெருநகர பிராந்தியத்தின் மேம்படுத்தப்பட்ட போக்குவரத்து முகாமைத்துவப் பொறிமுறைக்காக (Advanced Traffic Management System) 160 மில்லியன் டொலர்கள் ஒதுக்கீடுசெய்யப்பட்டுள்ளது. மேம்படுத்தப்பட்ட போக்குவரத்து முகாமைத்துவப் பொறிமுறையானது மத்திய கொழும்பை புறநகர் பகுதிகளுடன் இணைக்கும் அதிக போக்குவரத்துக்களைக் கொண்ட எட்டு பாதைகளில் உள்ள வீதி வலையமைப்புக்களை தொழில்நுட்ப மேம்படுத்தலுடன் பௌதீக ரீதியாக முன்னேற்றுவதுடன், சிவில் வேலைகளை முன்னேற்றுவதாகும். இந்த செயற்பாடானது வாகனங்களை கண்டறிவதற்கு நவீன தொழில்நுட்பங்களை அறிமுகப்படுத்தல், நிகழ்நேர தகவல் சேகரிப்பு, போக்குவரத்தை ஆய்வுசெய்தல், போக்குவரத்து சமிக்ஞைகளை ஒன்றுடன் ஒன்று இணைத்தல் மற்றும் முழுமையான வலையமைப்பிலும் பஸ் முன்னுரிமை முறைக்கு இடமளித்தல் என்பன உள்ளடங்குகின்றன. பாதசாரிகள், உலகின் பல நகரங்களில் பொருட்கள் மற்றும் பயணிகள் நகர வீதிக் கட்டமைப்பில் நெரிசல்கள் இன்றி பயணிப்பதற்கான வசதிகளை ஏற்படுத்திக் கொடுக்கும் முக்கியமான கருவியாக மேம்படுத்தப்பட்ட போக்குவரத்து முகாமைத்துவப் பொறிமுறை நிரூபணமாகியுள்ளது. மேம்படுத்தப்பட்ட போக்குவரத்து முகாமைத்துவப் பொறிமுறையானது கொழும்பு மாகரில் உள்ள 132 சந்திகளில் சிவில் செயற்பாடுகளை முன்னேற்றுவது மற்றும் ஏறத்தாழ 205 கிலோமீற்றர் வீதி வலையமைப்பில் உள்ள போக்குவரத்து கட்டுப்பாட்டு சமிக்ஞை திட்டங்களை வினைத்தினறாக நடைமுறைப்படுத்துவதையும் மேம்படுத்தும்.

* 50 மில்லியன் டொலர்கள் கொழும்பு மாநகரில் பஸ் சேவையை மேம்படுத்த பஸ் சேவை நவீனயப்படுத்தல் செயற்பட்டுக்கு ஒதுக்கப்படும். கொழும்பு மாநகரில் உள்ள பயணிகளில் 45 வீதமானவர்களே பஸ் சேவையைப் பயன்படுத்துவதுடன், குறைந்தவருமானம் பெறும் நபர்களாலேயே இது அளவுக்கு அதிகமாகப் பயன்படுத்தப்படுகிறது. இந்த செயற்பாடானது ஸ்மார்ட் அட்டையின் அடிப்படையில் தன்னிச்சயாக கட்டணங்களை அறவிடும் பொறிமுறையை அறிமுகப்படுத்தும். ஒரு அட்டையை பல்வேறு வழித்தடங்களில் செல்லும் பஸ்களுக்குப் பயன்படுத்துவதற்கு ஏதுவாக அமைவதுடன், பஸ்கள் சரியான முறையில் தமது செயற்பாடுகளை மேற்கொள்கின்றனவா என்பதைக் கண்டுகொள்வதற்காக ஜிபிஸ் பொறிமுறையை அறிமுகப்படுத்துவதும் இதில் அடங்குகிறது. சரியான நேரசூசியில் பஸ்கள் செயற்படுகின்றனவா, பஸ்களில் பயணிக்கும் பெண்கள், வயது வந்தவர்கள், மாற்றுவலுவுடையவர்கள் மற்றும் அங்கவீனமானவர்களின் பாதுகாப்பை அதிகரிப்பதற்கும் இது உதவியாகவிருக்கும். இலங்கை போக்குவரத்து சபை மற்றும் தனியார் பஸ் செயற்பாட்டாளர்கள் அதிநவீன போக்குவரத்துக்கான புதிய பஸ்களை கொள்வனவு செய்வதற்கான நிதி ஏற்பாடுகளை செய்வதற்கு மிலேனியம் சலெஞ்ச் கோப்ரேஷன் உதவியளிக்கும்.

* 140 மில்லியன் கிராமிய போக்குவரத்து செயற்பாடானது மத்திய, சப்ரகமுவ மற்றும் ஊவா மாகணங்களுக்கிடையிலான ஏறத்தாள 131 கிலோமீற்றரைக் கொண்ட மத்திய வளைய வீதி வலையமைப்பை மேல் மாகாணத்தின் சந்தைகள் மற்றும் துறைமுகங்களுடன் இணைப்பதை மேம்படுத்தும். மிலேனியம் சலெஞ்ச் கோப்ரேஷன் பல்வேறு பிரிவு வலையமைப்புக்களை புனரமைக்கும். கிழக்கு மாகாணத்திலுள்ள பயணிகள் மற்றும் பொருட்கள் இந்த வலையமைப்பின் ஊடாகப் பயணப்படும். இந்த வலையமைப்பை மேம்படுத்துவது விவசாயம், சுற்றுலாத்துறை என்பவற்றின் மையமாகவிருக்கும் மத்திய பிராத்தியத்துக்கும், அங்குள்ள இன பல்வகைமை மற்றும் வறுமைநிலையில் உள்ள அதிகமானவர்களுக்கும் நன்மையாக அமையும்.

மிலேனியம் சலெஞ்ச் காணித் திட்டம்

காணித் திட்டமானது 67 மில்லியன் அமெரிக்க டொலர்களைக் கொண்டது என மதிப்பிடப்பட்டிருப்பதுடன், இடஞ்சார் தகவல்கள் கிடைக்கக்கூடிய தன்மை மற்றும் காணி உரிமைத் தகவல்கள் தொடர்பில் இலங்கை அரசாங்கம் முன்னெடுத்துள்ள முயற்சிகளை விஸ்தரிப்பது மற்றும் முன்னேற்றுவது இதன் நோக்கமாகும். இந்தத் திட்டமானது பயன்படுத்தப்படாதுள்ள அரசாங்க காணிகளை அடையாளம் கண்டு அவற்றை முடிந்தளவு வினைத்திறனாகப் பயன்படுத்தவும், அவற்றை அரசாங்கம் குத்தகைக்கு வழங்கி ஆகக்கூடியளவு வாடகைகளைப் பெற்றுக் கொள்வதற்கும் உதவியாகவிருக்கும். அத்துடன் பணிக்காலப் பாதுகாப்பு மற்றும் சிறுகாணி உரிமையாளர்கள், பெண்கள் நிறுவனங்களுக்கான காணி வர்த்தகத்தன்மை என்பவற்றை அதிகரிப்பதுடன், டிஜிட்டல் மயப்படுத்தப்பட்ட காணி உறுதிகளைப் பேணவது போன்றவற்றால் பாதிப்புக்கள், திருட்டுக்கள், இழப்புக்களிலிருந்து தவிர்த்தல் என்பவற்றுக்கு உறுதுணையாக இருப்பதுடன், தலைப்புப் பதிவு முறையிலிருந்து காணி உறுதி முறைக்கு சொத்துக்களை மாற்றுவதாகும். காணித் திட்டமானது ஐந்து செற்பாடுகளைக் கொண்டிருப்பதுடன், அரசாங்கம் ஏற்கனவே ஆரம்பித்துள்ள முயற்சிகளை மேம்படுத்துவதாக இவை அமையும். அவையாவன:

* நிலம் தொடர்பான காணி வரைபடத்தை உருவாக்குவது மற்றும் அரசாங்க காணிகள் குறித்த முழுமையான இருப்புக்களைப் பெறுதல், ஈ-அரச காணிகள் தகவல் முகாமைத்துவ முறைமைக்கு தகவல்களை வழங்குதல். மதிப்பீடு 23,400,000 டொலர்கள்;

* கணினி மயப்படுத்தப்பட்ட வெகுஜன மதிப்பீட்டுக்கு உதவியாக அரச மற்றும் தனியார் காணிகள் தொடர்பான தகவல் சேகரிப்பை மேம்படுத்துதல், மதிப்பீட்டுத் திணைக்களத்தைப் பலப்படுத்தும் அரசாங்கத்தின் முயற்சிகளைப் பலப்படுத்துதல். மதிப்பீடு 6,5000, 000 டொலர்கள்;

* காணி உறுதி பதிவேட்டில் உள்ள பதிவுகளை டிஜிட்டல் மயப்படுத்தி மேம்படுத்தல், டிஜிட்டல் தகவல் கட்டமைப்பில் அவற்றை இணைத்தல், அரசாங்கத்தின் ஈ-பதிவு முயற்சிகளைக் கட்டியெழுப்புதல். மதிப்பீடு 11,400,000 டொலர்கள்;

* காணி உறுதி முறையிலிருந்து தலைப் பதிவேட்டு முறைக்குச் சொத்துக்களை மாற்றுவதன் ஊடாக காணி உரிமையாளர்களின் உரிமையை மேம்படுத்தல். அரசாங்கத்தின் பிம் சவிய திட்டத்தை விஸ்தரித்தல். மதிப்பீடு 19,300,000 டொலர்கள்;

* காணி நிர்வாக கொள்கைத்திட்டங்களை முன்னேற்றுவதற்கான முயற்சிகளை எடுப்பதற்கான ஆய்வுளுக்கு உதவியளித்தல். மதிப்பிடு 6,700,000 டொலர்கள்;

ஈ-அரச காணிகள் தகவல் முகாமைத்துவ முறைமை என்பது அரசாங்கத்தின் பல்வேறு முகவர்களிடம் உள்ள அரச காணிகள் தொடர்பான காணி வரைபடைத்தை உள்ளடக்கிய தகவல் தொழில்நுட்ப பொறிமுறையாகும். இந்தப் பொறிமுறையானது அரசாங்கம் ஏற்னவே குத்தகைக்கு வழய்கிய அரச காணிகள் குறித்த தகவல்கள் பற்றிய விண்ணப்பங்களை பின்தொடர்ந்து அவற்றிலிருந்து வருமானங்களை சேகரித்துக் கொள்ளும். அரசாங்கம் தற்பொழுது காணி மதிப்பீட்டு செயற்பாட்டை தானியங்குமுறைக்கு மாற்றி வருகிறது. இது வரி மதிப்பீடு மற்றும் ஏனைய தேவைகளுக்காக சொத்துக்கள் மதிப்பிடப்படுவதை விரைவுபடுத்தும். ஈ-காணி பதிவேடு முறைமையானது காணி பதிவுத் தகவல்களை டிஜிட்டல் மயப்படுத்துவதுடன், காணி தொடர்பான கொடுக்கல் வாங்கல்களில் சம்பந்தப்பட்ட தரப்பினர்களுக்கான தகவல்களை இலகுவாகப் பெற்றுக் கொடுப்பதற்கும் வழிகோலும். பிம் சவிய திட்டமானது தனியார் காணிகளை காணி உறுதி முறையிலிருந்து மிகவும் பாதுகாப்பான தலைப்பு பதிவு முறைக்கு மாற்றுவதாகும். துரதிஸ்டவசமாக போதிய நிதியுதவி மற்றும் தொழில்நுட்ப வளங்கள் இன்மையால் இந்த முயற்சிகள் யாவும் அங்கும் இங்குமாக இழுபடுவதுடன் சரியான ஒருங்கிணைப்பின்றிக் காணப்படுகின்றன. மிலேனியம் சலெஞ்ச் கோப்ரேஷன் காணி திட்டமானது இந்த வளப் பிரச்சினையை நிவர்த்திசெய்யும்.

Comment (0) Hits: 25

பக்கம் 7 / 66