V2025

செய்தி

கோட்டாபயவின் மேடையில் வைத்து ஸ்ரீ.ல.சு.கட்சியின் ஆரியவதிக்கும் “ஹூ” கோஷம்! (காணொளி)

ஸ்ரீலங்கா பொதுஜன பெரமுனவின் ஜனாதிபதி வேட்பாளர் கோட்டாபய ராஜபக்ஷவின் வெற்றியை உறுதிப்படுத்துவதற்காக கந்தளாய் நகரில் இடம்பெற்ற பிரசாரக் கூட்டத்தின் போது, ஸ்ரீ.ல.சு.கட்சி திருகோணமலை மாவட்ட தலைவியும், கிழக்க மாகாண சபையின் முன்னாள் அமைச்சருமான ஆரியவதி கலப்பதிக்கும் மொட்டு கட்சியின் ஆதரவாளர்களால் “ஹூ” கோஷமிடப்பட்டுள்ளது.

இவ்வாறு ஹூ கோஷமிடப்பட்டதால் தனது உரையினை இடைநடுவில் கைவிட்ட ஆரியவதி, பின்னர் ஹூ கோஷம் முடிவடைந்ததும் உரையாற்றுமாறு அழைத்த போதிலும் அவர் அந்த அழைப்பை நிராகரித்தார்.

 

Comment (0) Hits: 14

கோத்தாபய விடுதலையாக்க நினைக்கும் படைவீரர்கள் யார்? (காணொளி)

முன்னாள் பாதுகாப்புச் செயலாளர் கோத்தாபய ராஜபக்ஷ விடுதலை செய்வதற்கு நினைக்கும் படைவீரர்கள் யார்? என்பது குறித்து ஜனாதிபதி வேட்பாளர் மகேஸ் சேனாநாயக்க விளக்கம் அளித்துள்ளார்.
 
போர் முடிவுக்குக் கொண்டு வரப்பட்டதன் பின்னர், 2010ஆம் ஆண்டு முதல் 2015 ஆம் ஆண்டு வரையிலான காலப் பகுதியில் ஊடகவியலாளர்களை தாக்கியமை, ஊடகவியலாளர்களை காணாமல் போகச் செய்தமை, மாணவர்களை காணாமல் போகச் செய்தமை போன்ற குற்றச்சாட்டுக்களின் அடிப்படையில், நீதிமன்றங்களில் வழக்குத் தொடரப்பட்டவர்கள் என அவர் சுட்டிக்காட்டியுள்ளார்.
 
இந்த படைவீரர்களை ஓர் குழு அல்லது தனி நபர் வழிநடத்தியுள்ளதாகக் குறிப்பிட்டுள்ளார்.
 
யூ.ரீ.வி. தொலைக்காட்சிக்கு அளித்த நேர்காணலில் அவர் இதனைக் குறிப்பிட்டுள்ளார்.
 
போரில் ஈடுபட்டவர்கள் என்ற காரணத்தினால் குற்றச் செயல்களில் ஈடுபடுவதற்கு அனுமதி வழங்கப்படாது என அவர் மேலும் சுட்டிக்காட்டியுள்ளார்.

Comment (0) Hits: 28

குண்டு தாக்குதல் காயம் எங்கே? - கோட்டாவுக்கு படை வீரரின் சவால்! (காணொளி)

கொழும்பு பித்தளை சந்தியில் இடம்பெற்ற குண்டு வெடிப்பின் பின்னர் கோட்டாபய ராஜபக்ஷவின் ஆடையில் இரத்தம் வடிந்திருப்பதை படங்களில் காணக் கிடைத்தாலும், அந்த இரத்தம் அவருடையதாயின் அதற்குரிய காயத்தைக் காட்டுமாறு ஓய்வு பெற்ற இராணுவ படைவீரர் ஒருவர் கோட்டாபயவுக்கு சவால் விடுத்துள்ளார்.

இது தொடர்பில் ஊடகவியலாளர் சந்திப்பின் போது கருத்து தெரிவித்த அவர் மேலும் குறிப்பிடும் போது,

“பொதுஜன பெரமுணவுக்கோ, மொட்டு கட்சியில் இருக்கும் எவருக்குமோ, ராஜபக்ஷக்களுக்கோ நாம் பயப்படப் போவதில்லை. கோட்டாபய ராஜபக்ஷ அநுராதபுர தேர்தல் பிரசாரக் கூட்டத்தில் விளக்கமறியலில் வைக்கப்பட்டுள்ள படை வீரர்களை விடுதலை செய்யப் போவதாகக் கூறியுள்ளார். அவரது கொள்கைப் பிரகடணத்தில் இவ்விடயம் குறிப்பிடப்பட்டுள்ளதா? இல்லை.

நான் படையினரின் போராட்டம் மற்றும் அரசியல் இரண்டையும் ஒன்றாகக் கலப்பதில்லை. நான் இராணுவ பேராட்டத்தினால் பிரபலமடையவில்லை. பொதுஜன ஐக்கிய முன்னணியில் அன்று நாம் ஒன்றிணைந்து பணியாற்றியிருந்தாலும், வீதியில் இறங்கி ஆர்ப்பாட்டங்களைச் செய்திருந்தாலும் மற்றவர்களைப் போன்று நான் வேட்பு மனுவை பிச்சை எடுக்கவில்லை.

அவ்வாறு செய்திருந்தால் 2009ம் ஆண்டில் படைவீரர்கள் மாகாண சபைக்கு வந்த போது, மாகாண சபை மேடையில் நான் பிரதான பேச்சாளர். மாகாண சபை அல்லது இப்போது நான் பாராளுமன்றத்தில் இருந்திருப்பேன். நான் வேட்பு மனுவை பிச்சை எடுக்கவில்லை.

அதே போன்றுதான் எம்மால் இருக்க முடியாத சந்தர்ப்பங்கள் இருந்தது. 2000ம் ஆண்டில் ஆணையிறவில் நாம் ஆயிரக்கணக்கான படையினர் தனிமைப்பட்டுப் போயிருந்தோம். அப்போது கோட்டாபய ராஜபக்ஷ இருக்கவில்லை. ஜெனரல் ஜானக பெரேரா, பீல்ட் மார்ஷல் சரத் பொன்சேகாதான் எம்மை மீட்டெடுத்தார்கள். இரண்டு கப்பல்கள் வந்துள்ளது, காங்கேசன்துறைக்குச் செல்ல ஆயத்தமாகுமாறு சொன்னார்கள். சுமார் ஒன்றரை இலட்சம் இராணுவத்தினை மீட்டெடுத்த போது கோட்டாபய இருக்கவில்லை.

இப்போது நான் எனது ஆடையைக் கழட்டிக் காட்டுகிறேன். எனது நெஞ்சில் 11 தையல்கள் போடப்பட்டுள்ளது. முடிந்தால் கோட்டாபயவின் உடம்பில் ஒரு காயத்தைக் காட்டுமாறு அவருக்கு சவால் விடுகின்றேன்" என்றார்.

Comment (0) Hits: 34

கொலைகார 'வெள்ளை வேன்' ஆபரேஷன் யாருடைய வேலை? - மகேஷ்! (காணொளி)

ராஜபக்ஷ ஆட்சி காலத்தில் தெற்கில் இளைஞர்களைக் கடத்திச் சென்று காணாமல் ஆக்கியும், படுகொலை செய்யும் கொலைகார வெள்ளை வேன் கலாசாரத்தை உருவாக்கி முன்னெடுத்துச் சென்றமை தொடர்பில் பாதுகாப்பு அமைச்சின் முன்னாள் செயலாளர் கோட்டாபய ராஜபக்ஷ பொறுப்புக் கூற வேண்டும் என முன்னாள் இராணுவத் தளபதி ஜெனரல் மகேஸ் சேனாநாயக்கா தெரிவித்துள்ளார். இலங்கையர்களிடத்தில் பிரபலமாகியுள்ள SL VLOG சமூக வலைத்தளத்துடன் இடம்பெற்ற நேர்காணலின் போதே அவர் இதனைத் தெரிவித்துள்ளார்.

“வெள்ளை வேன் கலாசாரம் ஒன்றிருந்ததை நாம் எம் இரண்டு கண்களாலும் கண்டோம். இது ராஜபக்ஷ ஆட்சிக்காலத்தில் இடம்பெற்றது என்பதை நீங்கள் ஏற்றுக் கொள்கின்றீர்களா?” என SL VLOG பிரதானி தர்சன ஹந்துன்கொட கேட்ட கேள்விக்கு தேசிய மக்கள் இயக்கத்தின் ஜனாதிபதி வேட்பாளர் ஜெனரல் மகேஸ் சேனநாயக்கா இவ்வாறு பதிலளித்துள்ளார்.

“மிகத் தெளிவாகவே ஏற்றுக் கொள்கின்றேன். பிரச்சினை இருப்பது யார் செய்தது? யாரின் தேவைக்காகச் செய்யப்பட்டது? என்பதில்தான். அப்பாவியான சில இராணுவ படை வீரர்கள் இதில் ஈடுபடுத்தப்பட்டிருக்கின்றார்கள். இதற்குப் பொறுப்புக் கூற வேண்டியது அந்த இராணுவ வீரர்கள் அல்ல. அதனைச் செய்ய உத்தரவிட்டவர்களேயாகும்”

அவருடனான பேட்டியின் சில கேள்வி பதில்களை இங்கு தருகின்றோம்.

SL VLOG - கோட்டாபய ஒரு ஜனாதிபதி வேட்பாளர். கோட்டாபய தொடர்பில் நீங்கள் என்ன கூற விரும்புகின்றீர்கள்?

மகேஸ் - இராணுவத்தில் நான் குறுகிய காலம் பணியாற்றியிருக்கின்றேன். அவர் தொடர்பில் என்னிடத்தில் மதிப்பிருக்கின்றது. அந்த மதிப்பு இருப்பது இராணுவ அதிகாரிகளால் அதிகாரிகளுக்கு இருக்கும் மதிப்பு மாத்திரமேயாகும். அதற்கு அப்பால் இந்த அரசியலில் நான் ஒரு போதும் அவரை மதிக்கப் போவதில்லை. காரணம் அவரைச் சுற்றியிருப்பது மீண்டும் அந்த திருட்டுக் கும்பலேயாகும்.

SL VLOG - 2019 நவம்பர் 17ம் திகதி  ஒரு வேளை கோட்டாபய இந்நாட்டின் ஜனாதிபதியானால் நீங்கள் மீண்டும் டுபாய் போய்விடுவீர்களா?

மகேஸ் - நான் இலங்கையிலேயே இருப்பேன். அன்று செய்தவற்றை அவர்களால் இப்போது செய்ய முடியாது. அவ்வாறு செய்யுமளவுக்கு அவர் முட்டாள் அல்ல என்றே நான் நினைக்கின்றேன். அன்றிருந்தவர் அல்ல இன்றிருப்பது. மற்றது கடந்த ஐந்து வருடங்களில் எமக்கு ஒரு சந்தர்ப்பம் கிடைத்திருக்கின்றது. இந்நாட்டில் மனித உரிமைகள் இருக்கின்றன. இந்நாட்டில் சுயாதீன நீதிமன்ற கட்டமைப்புள்ளது. அந்தக் காலத்தில் இவைகள் எதுவும் இருக்கவில்லை. அவை அவர்களது கைகளிலேயே இருந்தது. அதனால்தான் பிரச்சினை ஏற்பட்டது.

SL VLOG - அதாவது கோட்டாபய பாதுகாப்புச் செயலாளராக இருந்த காலத்தில், மஹிந்த ராஜபக்ஷ ஜனாதிபதியாக இருந்த காலத்தில் சுயாதீன நீதிமன்றம், சுயாதீன பொலிஸ் போன்ற எதுவும் இருக்கவில்லை என்றா கூறுகின்றீர்கள்?

மகேஸ் - ஆம். அவற்றை அழித்து சேதமாக்கினார்கள் என்றே நான் கூறுகின்றேன். அப்படி இல்லை என்றால் பீல்ட் மார்ஷல் சரத் பொன்சேகா தேர்தலில் போட்டியிட்டார் என்பதற்காக அவரை சிறையில் அடைத்திருக்க மாட்டார்கள்தானே. அந்தக் காலத்தில் மக்கள் மிகவும் அச்சத்துடனேயே வாழ்ந்தார்கள். வெள்ளை வேன்களில் கடத்திச் செல்லப்பட்டமை, ஊடகவியலாளர்களை வீதியில் படுகொலை செய்தமை, தாக்கப்பட்டமை போன்ற பல விடயங்கள் அந்தக் காலத்தில்தானே இடம்பெற்றது.

Comment (0) Hits: 32

மாவனல்லை வந்த ஹிஸ்புல்லாஹ் குழுவினர் திருப்பி அனுப்பி வைப்பு!

மாவனல்லையில் ஜனாதிபதி வேட்பாளர் ஹிஸ்புல்லாஹ் ஏற்பாடு செய்த தேர்தல் பிரசாரக் கூட்டம், அந்த ஊர் மக்களின் கடும் எதிர்ப்பின் காரணமாக கை விடப்பட்டது.

மாவன்னலை ராழியா வரவேற்பு மண்டபத்தில் இந்தக் கூட்டம் நேற்று ஏற்பாடு செய்யப்பட்டிருந்தது. ஜனாதிபதி வேட்பாளர் ஹிஸ்புல்லாவின் இணைப்பாளர் ஒருவரினால் இந்த கூட்டத்தை நடாத்துவதற்கு மண்டபத்துக்கான கட்டணங்களும் செலுத்தப்பட்டிருந்தன. இந்த விடயத்தை அறிந்த ஊர் மக்கள், குறிப்பிட்ட இணைப்பாளரை கடுமையாக எச்சரித்ததுடன், இனிமேல் இவ்வாறான கூட்டங்களை காத்தான்குடியில் வைத்துக்கொள்ளுமாறும் சமூகங்களுக்கு இடையே குழப்பங்களை ஏற்படுத்தும் இவ்வாறான நிகழ்வுகளை, மாவனல்லை மண்ணில் நடாத்த வேண்டாமெனவும் எச்சரித்தனர்.

ஏற்கனவே, காத்தான்குடியில் உருவாக்கப்பட்ட பயங்கரவாதிகளின் செயற்பாடுகள் காரணமாக, மாவனல்லை மண் சந்தித்திருந்த அவல நிலையை சுட்டிக்காட்டிய ஊர் மக்கள், இனிமேல் இவ்வாறான செயற்பாடுகளுக்கு எவரும் துணைபோவதை மாவனல்லை மக்கள் ஒருபோதும் அனுமதிக்க மாட்டார்கள் எனவும் தெரிவித்தனர்.

மேலும், காத்தான்குடியில் உருவாகிய சில பயங்கரவாதிகளினால், இந்த நாடு சந்தித்த அவலங்களையும் துயரங்களையும் மாவனல்லை ஏற்பாட்டாளர்கள் ஒருகணம் நினைத்துப் பார்க்க வேண்டுமென கடுந்தொனியில் சுட்டிக்காட்டியதோடு, இனிமேல், மாவனல்லை மண்ணில் ஹிஸ்புல்லாஹ்வுக்கு எவருமே ஆதரவளிக்கக் கூடாது எனவும் வேண்டுகோள் விடுத்தனர்.

இதேவேளை, காத்தான்குடியில் இருந்து ஐந்து பஸ்களில் மாவனல்லைக்கு அழைத்து வரப்பட்ட ஹிஸ்புல்லாவின் ஆதரவாளர்களும் ஜனாதிபதி வேட்பாளர் ஹிஸ்புல்லாவும் ஊர்மக்களின் கடுமையான எதிர்ப்பினைத் தொடர்ந்து, இடைநடுவே திரும்பிச் சென்றதாக தெரிய வருகின்றது.

Comment (0) Hits: 33

தாக்கப்படுவோம் என்பதற்காக கோட்டாபயவிற்கு வாக்களிக்க வேண்டுமா?

கோட்டாபய ராஜபக்ஷவிற்கு வாக்களிக்காவிடின் தாக்கப்படுவோம் என்ற பொய்யான பரப்புரையை முஸ்லிம் சமூகத்தின் மத்தியில் சிலர் முன்னெடுத்து வருகின்றனர்.

குறுகிய அரசியல் இலாபத்திற்காகவும் பணத்திற்காகவும் முஸ்லிம்கள் என தம்மை கூறிக்கொள்ளும் சிலர் கீழ்த்தரமான முயற்சிகளில் ஈடுபட்டுள்ளனர்.

Photo

இவ்வாறு முஸ்லிம் சமூகத்தின் மீது அழுத்தங்கள் பிரயோகிக்கப்பட்டுள்ள நிலையில், ஜனாதிபதி சட்டத்தரணியாக நியமிக்கப்பட்டதற்கான நன்றிக் கடனை அடைப்பதற்காக அலி சப்ரி என்ற நபர், இந்த செயற்பாடுகளுக்கு தலைமை வகித்து வருகிறார்.

அத்துடன், ஐக்கிய தேசியக் கட்சியினால் அரசியலுக்குள் வந்து பின்னர், தமக்கு எதிர்காலத்தில் ஏதாவது பதவி கிடைக்கும் என்ற நப்பாசையில், முஸ்லிம் மக்களை அனைத்து ரீதியாகவும் துன்புறுத்திய ராஜபக்ஷ கும்பலுடன் இணைந்திருக்கும் கொழும்பு மாநகர சபையின் முன்னாள் மேயர் முசம்மில் உள்ளிட்ட, இன்னும் சிலரும் முஸ்லிம் மக்களைக் காட்டிக்கொடுக்கும் முயற்சியில் ஈடுபட்டுள்ளனர்.

இந்தக் காட்டிக்கொடுப்பிற்கு இணங்காத முஸ்லிம் மக்களை, அச்சுறுத்தும் பாணியில் அவர்களை நிர்ப்பந்தித்து வருகின்றனர்.

'கோட்டாபய ராஜபக்ஷ நிச்சயம் வென்றுவிடுவார். எனவே, அவருக்கு வாக்களிக்காவிட்டால் முஸ்லிம் மக்கள் தாக்கப்படுவோம்." என்று முஸ்லிம் மக்கள் மத்தியில் பரப்புரை மேற்கொண்டு வருகின்றனர்.

தேர்தல் பிரசாரக் கூட்டங்களுக்கு முஸ்லிம்கள் குறைவாக வருவதால் தற்போது, மூடிய அறைக்குள் கூட்டங்களை நடத்த ஏற்பாடுகளைச் செய்து வருகின்றனர்.

எதிர்வரும் 31ஆம் திகதி கொழும்பு ஷெங்கிரில்லா விடுதியில் இவ்வாறு ஒரு கூட்டத்திற்கு ஒழுங்கு செய்யப்பட்டுள்ளது. இதற்கு முன்னதாக சில வர்த்தகர்களை அழைத்துள்ள கோட்டாபய ராஜபக்ஷ தரப்பினர், 500 மில்லியன் ரூபா நிதியை திரட்டித் தருமாறு கோரியுள்ளனர். ஆடை உற்பத்தி வியாபாரத் துறையைச் சேர்ந்த 8 வர்த்தகர்களிடம் இந்த கோரிக்கை முன்வைக்கப்பட்டுள்ளது.

இந்த நிலையில் தான், ஷெங்கிரில்லா ஹோட்டலுக்கு முஸ்லிம்களை அழைத்து, தனது பக்க நியாயத்தை எடுத்துரைக்கும் நடவடிக்கைகளை  கோட்டாபய ராஜபக்ஷ தரப்பினர் முன்னெடுத்துள்ளனர்.

'முஸ்லிம்கள் இன, மத ரீதியாக ஒடுக்கப்பட வேண்டும். பள்ளிவாசல்கள் தாக்கப்பட வேண்டும். மத ரீதியான கட்டுப்பாடுகள் தளர்த்தப்பட வேண்டும். முஸ்லிம்களின் வியாபாரங்கள் புறக்கணிக்கப்பட வேண்டும். வர்த்தக ரீதியாக முஸ்லிம்கள் முடக்கப்பட வேண்டும். பள்ளிவாசல்களில் ஒலிபெருக்கியில் ஓதுவது தடுக்கப்பட வேண்டும்' போன்ற பல இனவாத ரீதியான பரப்புரைகளை மேற்கொண்ட ராஜபக்ஷ தரப்பினர், தற்போது முஸ்லிம்களின் பணத்தையும் அவர்களின் வாக்குகளையும் கொள்ளையிட திட்டமிட்டுள்ளனர்.

அலி சப்ரி போன்ற குறுகிய அரசியல் இலாபம் பெற முயற்சிப்போர் கூறுவதைப் போல, கோட்டாபய ராஜபக்ஷ சிங்களப் பெரும்பான்மை வாக்குகளைப் பெறும் பட்சத்தில், தாக்குதல்களில் இருந்து பாதுகாத்துக்கொள்ள மட்டும் கோட்டாபய ராஜபக்ஷவிற்கு வாக்களிக்க வேண்டுமா?

அப்படியெனில், முஸ்லிம்களைத் தாக்கும் கும்பல், கோட்டாபய ராஜபக்சவுடன் இருப்பதை அலி சப்ரி போன்றவர்கள் ஏற்றுக்கொள்கிறார்களா?

அப்படி முஸ்லிம்களுக்கு எதிரான கும்பல்கள் கோட்டாபயவுடன் இருக்கும் பட்சத்தில், அவர்களை ஜனநாயக ரீதியாக எதிர்ப்பதை விடுத்து, அவர்களின் கால்களில் விழுவது எந்த வகையில் சமூகத்தைக் காப்பாற்றப் போகிறது?  என்ற கேள்விகளுக்கு அலிசப்ரி உள்ளிட்ட கொள்ளைக் கும்பல் பதில் தர மறுக்கிறது.

 
 
 
Comment (0) Hits: 33

ஜனாதிபதி தேர்தல்: 5 தமிழ் கட்சிகளின் இறுதி முடிவு நாளை!

ஜனாதிபதி தேர்தலில் தமிழர் தரப்பின் கோரிக்கைகளை தென்னிலங்கையின் ஜனாதிபதி வேட்பாளர்கள் ஏற்காத பட்சத்தில் தமிழ் மக்கள் திட்டவட்டமான முடிவினை எடுக்க வேண்டிய சூழ்நிலை உருவாகும். அதற்கான இறுதி முடிவை நாளை 30ஆம் திகதி எடுக்கவுள்ளதாக  ஈ.பி.ஆர்.எல்.எப். அமைப்பின் தலைவர் சுரேஷ் பிரேமச்சந்திரன் தெரிவித்தார். 

தமிழ் கட்சிகளின் நிலைப்பாடு தொடர்பாக முடிவெடுக்கும் 5தமிழ் அரசியல் கட்சிகளின் கலந்துரையாடல் யாழ்ப்பாணம் பிறைட் இன் விருந்தினர் விடுதியில் நேற்று முற்பகல் 11மணிக்கு ஆரம்பமாகி மூன்றரை மணி நேரம் இடம்பெற்றது. 

சந்திப்பில் இலங்கை தமிழரசுக் கட்சியின் சார்பாக அதன் தலைவரும் பாராளுமன்ற உருப்பினருமான மாவை சேனாதிராஜா, வட மாகாண அவைத் தலைவர் சி.வி.கே.சிவஞானம்,ஈ.பி.ஆர்.எல்.எப் தலைவர் சுரேஸ் பிரேமச்சந்திரன், பாராளுமன்ற உறுப்பினர் சிவசக்தி ஆனந்தன், புளொட் தலைவரும் பாராளுமன்ற உருப்பினருமான த.சித்தார்தன், ரெலோ சார்பாக முன்னாள் மாகாண சபை உறுப்பினர்ச.குகதாஸ், மூத்த உறுப்பினர் கென்ரி மகேந்திரன், தமிழ் மக்கள் கூட்டணி சார்பாக அதன் ஊடகப் பேச்சாளர் த.அருந்தவபாலன் ஆகியோர் கலந்துகொண்டனர்.   இக் கலந்துரையாடலின் பின்னர் ஊடகங்களுக்கு கருத்து தெரிவிக்கும் போதே அவர் இதனை குறிப்பிட்டார். 

மேலும் அவர் கூறுகையில்,

ஜனாதிபதி தேர்தல் தொடர்பில் பல்வேறுபட்ட விடயங்கள் பற்றி ஆராய்ந்தோம். தென்னிலங்கையில் போட்டியிடும் பிரதான தேசியக் கட்சிகள் தமிழ் தேசியக் கட்சிகளால் முன்வைக்கப்பட்ட கோரிக்கைகள் தொடர்பாக  விரிவாக ஆராயப்பட்டது. 

ஏனெனில் எமது கோரிக்கைகள் என்பது ஒரு நாட்டுக்குள் தமிழர்களுக்கு இனப் பிரச்சினையை தீர்க்கக் கூடிய விதமாக மட்டுமல்லாது தமிழர்களுக்கு ஏற்பட்டிருக்கக் கூடிய நெருக்கடிகளை தீர்ப்பதற்கானதே.

ஆனால் தென்னிலங்கையில் உள்ள பிரதான தேசியக் கட்சிகள் மற்றும் ஜனாதிபதி வேட்பாளர்கள் எமது கோரிக்கைகளை இனவாத கோரிக்கைகளாக பூதாகரமாக காட்டுகின்றனர். இக் கட்சியினர் எமது கோரிக்கைகளை ஏற்காத பட்சத்தில் தமிழ் மக்கள் திட்டவட்டமான முடிவுகள் எடுக்க நிர்ப்பந்திக்கப்படுவர். 

Comment (0) Hits: 23

தபால்மூலம் வாக்களிப்பு – 1000 பேர் கண்கானிப்பு நடவடிக்கைகளில்!

ஜனாதிபதி தேர்தலுக்காக தபால்மூலம் வாக்களிக்க தெரிவு செய்யப்பட்டுள்ள மத்திய நிலையங்களில் கண்காணிப்பு பணிகளில் சுமார் ஆயிரம் பேர் ஈடுபடுத்தப்படவிருப்பதாக பெப்ரல் அமைப்பு தெரிவித்துள்ளது.

கண்காணிப்பு பணிகளில் இவர்களை ஈடுபடுத்துவதற்கு முன்னர் இவர்களுக்கான பயிற்சி நடவடிக்கைகள் தற்போது இடம்பெற்றுவருவதாக பெப்ரல் அமைப்பின நிறைவேற்று பணிப்பாளர் ரோஹன ஹெட்டியாராச்சி தெரிவித்தார்.

Comment (0) Hits: 17

திகில் திரைப்­ப­டத்தை ஒத்த பாக்தாதி மீதான தாக்குதல் சம்பவம் - நடந்தது என்ன?

வடமேற்கு சிரி­யாவில் அமெ­ரிக்க இரா­ணு­வத்தால் மேற்­கொள்­ளப்பட்ட தாக்­குதல் நட­வ­டிக்­கையின் போது  ஐ.எஸ். தீவி­ர­வாதக் குழுவின் தலைவர் தற்­கொலை செய்து கொண்­டுள்­ள­தாக அமெ­ரிக்க ஜனா­தி­பதி டொனால்ட் ட்ரம்ப் தெரி­வித்தார்.

ஐ.எஸ். தீவி­ர­வாத குழுத் தலைவர் அமெ­ரிக்க இரா­ணுவ மோப்ப நாயால் துரத்­தப்­பட்ட நிலையில்  சுரங்கப் பாதை­யொன்­றுக்குள் பிர­வே­சித்து தான் அணிந்­தி­ருந்த குண்­டுகள் பொருத்­தப்­பட்ட தற்கொலை மேலங்­கியை வெடிக்க வைத்து உயி­ரி­ழந்­துள்­ள­தாக டொனால்ட் ட்ரம்ப் வெள்ளை மாளி­கை­யி­லி­ருந்து ஆற்­றிய உரையில் குறிப்­பிட்­டுள்ளார்.

டொனால்ட் ட்ரம்ப் பக்­தா­தியை இலக்­கு­வைத்துத் தாக்­குதல் நடத்தப்ப­டு­வ­தையும் அவர்   தனது 3 பிள்­ளை­க­ளையும் இழுத்துக் கொண்டு  சுரங்கப் பாதையில் பிர­வே­சித்து குண்டை வெடிக்க வைப்ப­தையும் வெளிப்­ப­டுத்தும் நேரடி ஒளிப­ரப்புக் காட்­சியை தொலைக்­காட்சி இணைப்பின் மூலம் ஒரு திகில் திரைப்­ப­டத்தை பார்ப்­பது போன்று கண்­டு­க­ளித்­துள்ளார்.  

மேற்­படி தாக்­குதல் நட­வ­டிக்கை தொடர்­பான  நேரடி  ஒளிப­ரப்பை அவ­தா­னிக்கும் முக­மாக  டொனால்ட் ட்ரம்ப்  அமெ­ரிக்க இரா­ணுவ ஜென­ரல்கள் மற்றும்  உப ஜனா­தி­பதி மைக் பென்ஸ் உள்­ள­டங்­க­லான அதி­கா­ரி­க­ளுடன் அமெ­ரிக்க நேரப்­படி கடந்த சனிக்­கி­ழமை மாலை 5.00 மணிக்கு வெள்ளை மாளி­கை­யி­லுள்ள  பிரத்­தி­யேக அறைக்குள் பிர­வே­சித்­துள்ளார். அதன்பின் அவர் ஏனை­ய­வர்­க­ளுடன் இணைந்து  நேரடி  தொலைக்­காட்சி  இணைப்பின் மூலம் சிரி­யா­வி­லான நிலை­மை­களை பார்­வை­யிட்­டுள்ளார்.

இந்­நி­லையில் அமெ­ரிக்க  இரா­ணு­வத்தின் விசேட படை­ யினர்  8 உலங்­கு­வா­னூர்­தி கள் மூலம்  ஈராக்­கி­லுள்ள விமானப் படைத்தளமொன்­றி­லி­ருந்து  ஒரு மணித்­தி­யாலம் 10 நிமிட அதி  அபாய­க­ர­மான பய­ணத்தை மேற்­கொண்டு சிரிய நேரப்­படி  நேற்று முன்­தினம் ஞாயிற்­றுக்­கி­ழமை  நள்­ளி­ரவு தாண்டி சிறிது நேரத்­திற்குப் பின்னர் பக்­தாதி  மறைந்­துள்­ள­தாக  புல­னாய்வுத் தகவல் மூலம் அறியப்­பட்ட பின்­தங்­கிய பிராந்­தி­ய­மான பறி­ஷாவை வந்­த­டைந்­தனர்.

ஐ.எஸ். தீவி­ர­வா­திகள்  பலம் பெற்று விளங்­கிய அந்தப் பிராந்­தியத்தின்  மீது இரா­ணுவ உலங்­கு­வா­னூர்­திகள் வட்­டமிடு­வது புதிதான ஒன்­றல்ல என்­பதால் பிர­தே­ச­வா­சி­க­ளுக்கு  அந்த உலங்­கு­வானூர்­தி­களின் ஒலி வியப்­பெ­த­னையும் ஏற்­ப­டுத்­த­வில்லை. ஆனால் அவ்­வாறு உலங்­கு­வா­னூர்­திகள் வட்­ட­மிட்­டதைத் தொடர்ந்து  அந்தப் பகு­தியில்  உயி­ரி­ழப்­பு­களை ஏற்­ப­டுத்தக்கூடிய தாக்­கு­தல்கள் நடத்­தப்­ப­டு­வது வழ­மை­யா­க­வுள்­ளதால்  தமது உயிரைப் பாது­காத்துக்கொள்ள வேண்டும் என்ற  பீதியே பிர­தே­ச­வா­சி­க­ளுக்கு ஏற்­பட்­ட­தாக கூறப்படு­கி­றது.

அவர்­க­ளது அச்­சத்தை உறு­திப்­ப­டுத்தும் வகையில்  ஒரு சில நிமி­டங்களில் அந்தப் பிராந்­தி­யத்தில் சர­மா­ரி­யாக துப்­பாக்கி வேட்­டுக்கள் தீர்க்­கப்­பட்­டன.

மேற்­படி தாக்­குதல் நட­வ­டிக்­கையின்  போது அமெ­ரிக்க உலங்­கு­வா­னூர்­திகள்  சிரி­யாவில் ரஷ்­யாவின் கட்­டுப்­பாட்­டி­லுள்ள வான் பரப்பின் மீதாக பறந்­த­தாக  ஜனா­தி­பதி ட்ரம்ப் தெரி­வித்தார். இந்தத் தாக்­குதல் நட­வ­டிக்­கைக்­காக அமெ­ரிக்­கா­வுக்கு மேற்­படி வான் பரப்பை திறந்து விட்ட ரஷ்­யா­வுக்கும் வெற்­றி­க­ர­மாக தாக்­குதல் நட­வ­டிக்­கையை முன்­னெ­டுத்த அமெ­ரிக்க விசேட படை­யி­ன­ருக்கும்  அவர் பாராட்டைத் தெரி­வித்தார்.

இதன்­போது அமெ­ரிக்கப் படை­யினர்   இட்லிப் மாகா­ணத்தில் ஐ.எஸ். தீவி­ர­வா­தி­க­ளுக்கு ஆத­ர­வான ஹாயத் தஹ்­ரீர அல் ஷாம் தீவி­ர­வா­தி­களின் கட்­டுப்­பாட்டின் கீழுள்ள  பின்­தங்­கிய பாறிஷ் கிரா­மத்தில் பக்­தாதி மறைந்­துள்­ள­தாக  நம்­பப்­பட்ட வீட்டின் மீது  உக்­கி­ர­மாக சூட்டுத் தாக்­கு­தலை நடத்­தினர்.

தொடர்ந்து உலங்­கு­வா­னூர்­தி­க­ளி­லி­ருந்து மோப்ப நாய் சகிதம்  கயிற்றின் மூலம் தரை­யி­றங்­கிய  அமெ­ரிக்க விசேட படை­யினர் துப்பாக்கிச் சூட்டை நடத்­திய வண்ணம் பக்­தாதி மறைந்­துள்­ள­தாக அறி­யப்­பட்ட வீட்டை நோக்கி விரைந்­தனர்.

இதன்­போது ஐ.எஸ். தீவி­ர­வா­திகள் பலர் சுட்டுக் கொல்­லப்­பட்­ட­துடன் சிலர்  தாமாக முன்­வந்து அமெ­ரிக்கப் படை­யி­ன­ரிடம் சர­ண­டைந்­தனர். இந்­நி­லையில்  அமெ­ரிக்கப் படை­யி­னரால் குறிப்­பிட்ட  வீட்­டி­லி­ருந்து  11 சிறு­வர்கள் எது­வித காய­மு­மின்றி பாது­காப்­பாக மீட்கப்­பட்­ட­தாக டொனால்ட் ட்ரம்ப் கூறினார்.

இந்தத் தாக்­குதல் நட­வ­டிக்­கையில் உயிர் தப்­பி­ய­வர்­களைவிடவும் இறந்­த­வர்­களே அதிகம் என  அவர் தெரி­வித்தார்.

இறந்­த­வர்­களில் பக்­தா­தியின் இரு மனை­வி­யரும் உள்­ள­டங்­கு­கின்­றனர். அவர்கள் குண்­டுகள் பொருத்­தப்­பட்ட தற்­கொலை மேலங்­கி­களை அணிந்­தி­ருந்த போதும் அந்த மேலங்­கிகள் வெடிக்­காத நிலையில் காணப்­பட்­ட­தாக அமெ­ரிக்க இரா­ணுவம் கூறு­கி­றது.

இந்தத் தாக்­கு­தலின் போது  அமெ­ரிக்கப் படை­யினர் அந்த வீட்டின் பிர­தான  வாயி­லி­னூ­டாக உள்ளே பிர­வே­சிப்­பதைத் தவிர்த்­துள்­ளனர். ஏனெனில்  அந்த வாயில் பகு­தியில்   தம்மை சிக்க வைக்க ஏதா­வது செயற்­பா­டுகள் மேற்­கொள்­ளப்­பட்­டி­ருக்­கலாம் என அவர்கள் சந்தேகம் கொண்­டி­ருந்­தனர். 

இதன் கார­ண­மாக  அவர்கள்  அந்த வீட்டின்  மதில் சுவ­ரொன்றின் ஒரு பகு­தியை வெடி வைத்துத் தகர்த்து உள்ளே பிர­வே­சித்­துள்­ளனர். அத்துடன் அவர்கள்  முன்­னெச்­ச­ரிக்கை நட­வ­டிக்­கை­யாக தாம் வீட்டிற்குள் பிர­வே­சிப்­ப­தற்கு முன்னர் தம்­முடன் கொண்டு சென்ற ரோபோ­வொன்றை அந்த வீட்­டிற்குள் அனுப்பும் நட­வ­டிக்­கை யில் ஈடு­பட்­டனர்.

இந்­நி­லையில் அந்த வீட்டில் மறைந்­தி­ருந்த பக்­தாதி தனது 3 பிள்­ளைகள் சகிதம் தப்­பிச் செல்லும் முயற்­சியில் ஈடு­பட்­டுள்ளார். இதன்போது அவரை இரா­ணுவ மோப்ப நாய் சகிதம் அமெ­ரிக்க  விசேட படை­யினர்  துரத்திச் செல்­லவும்  அவர் சுரங்­க­மொன்­றுக்குள் பிள்­ளை­க­ளுடன் பிர­வே­சித்து தான் அணிந்­தி­ருந்த குண்­டுகள் பொருத்தப்­பட்­டி­ருந்த  தற்­கொலை மேலங்­கியை வெடிக்க வைத்து மர­ணத்தைத் தழு­வி­ய­தாக தெரி­விக்­கப்­ப­டு­கி­றது. இந்த சம்­ப­வத்தில் அவ­ருடன் சென்ற அவ­ரது 3 பிள்­ளை­களும் மர­ண­ம­டைந்­துள்­ளனர். அத்­துடன் அவரை துரத்திச் சென்ற மோப்ப நாய் காய­ம­டைந்­துள்­ளது.

இந்த சம்­ப­வத்­திற்கு சிறிது நேரத்தில்  சுரங்­கத்திலிருந்த சட­லங்­களில் மேற்­கொள்­ளப்­பட்ட மர­பணு பரி­சோ­த­னையில்  பக்­தாதி உயிரிழந்துள்­ளமை உறு­திப்­ப­டுத்­தப்­பட்­டுள்­ள­தாக  தெரி­விக்­கப்­ப­டு­கி­றது.

புல­னாய்வுத் தக­வல்­களின் பிர­காரம்  பக்­தாதி தொடர்ந்து இரு வாரங்க­ளாக  அமெ­ரிக்க விசேட படை­யி­னரின் கண்­கா­ணிப்பின் கீழ் இருந்­துள்ளார். அவரை இலக்கு வைத்து  இதற்கு முன்னர் மேற்கொள்ளப்­ப­ட­வி­ருந்த சுமார் 3 தாக்­குதல் நட­வ­டிக்­கைகள் அவர்  இடத்தை மாற்றிக் கொண்­டதால்  கைவி­டப்­பட்­டி­ருந்­தன.

இது­வரை காலமும் பக்­தாதி சிரிய– ஈராக்­கிய எல்­லை­யி­லேயே மறைந்­தி­ருப்­ப­தாக நம்­பப்­பட்­டது. ஆனால் அவர் தற்­போது கொல்லப்­பட்­டுள்ள இடம் அந்தப் பிராந்­தி­யத்­தி­லி­ருந்து வெகு தொலைவில் துருக்­கிய எல்­லைக்கு அண்­மையில் அமைந்­துள்­ளது.  பக்­தாதி பதுங்­கி­யி­ருந்த  வீடு இரு வாரங்­க­ளாக கண்­கா­ணிப்­பி­லி­ருந்­த­தா­கவும் அதனைத்  தாக்­கு­வ­தற்கு  அமெ­ரிக்க  விசேட படை­யினர் இரு மணி நேரத்தை எடுத்துக்கொண்­ட­தாக கூறப்­ப­டு­கி­றது.

2014 ஆம் ஆண்டில்  சிரிய மற்றும் ஈராக்­கிய  பிராந்­தி­யத்தில்  இஸ்­லாமிய தேச­மொன்று உரு­வாக்­கப்­ப­டு­வ­தாக  சுய பிர­க­டனம் செய்­த­தை­ய­டுத்து உல­க­ளா­விய ரீதியில் பெரும் பர­ப­ரப்பை பக்­தாதி ஏற்படுத்­தி­யி­ருந்தார்.

2011ஆம் ஆண்டு ஒக்­டோபர் மாதம்  தீவி­ர­வா­தி­யொ­ரு­வ­ராக  அமெரிக்­காவால் உத்­தி­யோ­க­பூர்­வ­மாக இனங்­கா­ணப்­பட்ட பக்தாதியை கைது­செய்ய அல்­லது கொல்­வ­தற்கு வழி­வ­குக்கும் தகவலை வழங்­கு­ப­வர்­க­ளுக்கு 10 மில்­லியன் டொலர் சன்­மா­னத்தை வழங்­கு­வ­தாக அமெ­ரிக்கா அறி­வித்­தி­ருந்­தது. 

தொடர்ந்து  2017 ஆம் ஆண்டு இத்­தொகை 25 மில்­லியன் அமெ­ரிக்க டொல­ராக  அதி­க­ரிக்­கப்­பட்­டது. இத­னை­ய­டுத்து அவரால் உரு­வாக்­கப்­பட்ட ஐ.எஸ். தீவி­ர­வாத குழுவின் உறுப்­பி­னர்­க­ளாலும்  அவர்­க­ளது ஆத­ர­வா­ளர்­க­ளாலும்  சிரியா மற்றும் ஈராக்கில் மட்­டு­மல்­லாது உல­க­ளா­விய ரீதியில் மேற்­கொள்­ளப்­பட்ட  ஒரு­தொகைத் தாக்­கு­தல்­களில் பல்­லா­யி­ரக்­க­ணக்­கானோர் கொல்­லப்­பட்­டுள்­ளனர்.

சிரி­யா­வி­லி­ருந்து  அமெ­ரிக்கப் படை­யி­னரை வாபஸ் பெறும் வரையில் ஐ.எஸ். தீவி­ர­வா­தி­க­ளுக்கு எதி­ரான போராட்டத் தில் அமெ­ரிக்­கா­வுக்கு உதவி வந்த  குர் திஷ் தலை­மை­யி­லான  சிரிய ஜன­நா­யகப் படை­யினர் தெரி­விக்­கை­யில்,  ஐ.எஸ். தீவி­ர­வா­தி­களும் பக்­தா­தியும் அதி­க­ளவில் நட­மாடும் இடங்கள் குறித்து விப­ரங்­களை அமெ­ரிக்­கா­வுடன் தாம் பகிர்ந்து  கொண்­டி­ருந்­த­தாக கூறு­கின்­றனர்.

பக்­தா­தியின் மரணம் குறித்து டொனா ல்ட் ட்ரம்ப் தெரி­விக்­கையில், அவர் ஒரு நாயைப் போலவும் கோழை­யொ­ரு­வரைப் போலவும் மர­ணத்தைத் தழு­வி­யுள்­ள­தாக குறிப்­பிட்­டுள்ளார்.

2011ஆம் ஆண்டு அமெ­ரிக்க விசேட படை­யி­னரால் மேற்­கொள்­ளப்­பட்ட தாக்­குதல் நட­வ­டிக்­கை­யொன்றின்போது கொல்­லப்­பட்ட அல் கொய்தா தீவிரவாத குழுவின் முன்னாள் தலைவர் ஒஸாமா பின்லேடனின் சடலம் கடலில் புதைக்கப்பட்டது போன்று பக்தாதியின் சடலமும் கையாளப்படவுள்ளதாக  அமெரிக்க தேசிய பாதுகாப்பு ஆலோசகர் ரொபேர்ட் ஓ பிறையன் தெரிவித்தார்.

ஐ.எஸ். தீவிரவாதிகளுக்கு எதிரான எமது போராட்டத்தில் பக்தாதியின் மரணம் முக்கியத்துவமிக்க தருணமொன்றாகவுள்ளதாக பிரித்தானிய பிரதமர் போரிஸ் ஜோன்ஸன் டுவிட்டர் இணையத் தளத்தில் தன்னால் பதிவேற்றம் செய்யப்பட்டுள்ள செய்தியில் குறிப்பிட்டுள்ளார்

வட சிரிய நகரான ஜராபுலஸிற்கு அருகில் அமெரிக்க இராணுவத்தால்  முன்னெடுக்கப்பட்ட பிறிதொரு தாக்குதல் நட வடிக்கையில்  பக்தாதியின் வலது கரமாக விமர்சிக்கப்படும்  ஐ.எஸ். பேச்சாளரான அபூ அல் ஹஸன் அல் முஹாஜிர்  கொல்லப்பட்டுள்ளதாக  ஐ.எஸ். சிரிய ஜனநாய கப் படையினர் தெரிவிக்கின்றனர். 

இந் நிலையில் ஐ.எஸ். தீவிரவாத குழுவின் புதிய தலைவராக மறைந்த முன்னாள் ஈராக்கிய ஜனாதிபதி  சதாம்  ஹுஸைனின்  இராணுவ அதிகாரியான அப்துல்லாஹ் கர்டாஷ் நியமிக்கப்பட்டுள்ளதாக தகவல் வெளியாகியுள்ளது.

Comment (0) Hits: 34

'தூதரக சேவையை வலுப்படுத்த நடவடிக்கை எடுக்கப்படும்' - அனுர!

தனது ஆட்சியின் கீழ் இந்நாட்டு தூதரக சேவையை வலுப்படுத்த நடவடிக்கை எடுப்பதாக தேசிய மக்கள் சக்தியின் ஜனாதிபதி வேட்பாளர் அனுர குமார திஸாநாயக்க தெரிவித்தார்.

மாத்தளை பிரதேசத்தில் இடம்பெற்ற பிரசார கூட்டம் ஒன்றில் கலந்து கொண்டு அனுர குமார திஸாநாயக்க இதனை தெரிவித்தார்.

இந்நாட்டில் உள்ள மற்றைய நாட்டு தூதுவராலயங்கள் மூலம் இந்நாட்டு அரசியலில் தலையீடு மேற்கொள்ளப்பட்டாலும், வௌிநாடுகளில் ஸ்தாபிக்கப்பட்டுள்ள இந்நாட்டு தூதுவராலயங்களினால் எவ்வித அழுத்தங்களும் பிரயோகிக்க முடியாதுள்ளது என அவர் தெரிவித்தார்.

அதன் காரணமாக அனைத்து நாடுகளிலும் ஸ்தாபிக்கப்பட்டுள்ள தூதுவராலயங்களை வலுப்படுத்த வேலைத்திட்டம் ஒன்றை தயாரிக்கவுள்ளதாக அவர் தெரிவித்தார்.

அதன் ஊடாக புதிய பொருளாதார செயல்முறை ஒன்றை உருவாக்குவதாகவும் மற்றும் நடுத்தர தொழில் முனைவோருக்கு ஏற்றவாறு பொருளாதாரத்தை அபிவிருத்தி செய்வதாகவும் அவர் சுட்டிக்காட்டினார்.

Comment (0) Hits: 18

அலி சப்ரியின் கருத்திற்கு ஐ.தே.கவினர் கடும் கண்டனம்!

கோத்தபாய ராஜபக்ஷவிற்கு வாக்களிக்காவிடின் முஸ்லிம் சமூகம் வன்முறைகளுக்கு இலக்காக நேரிடும் என்று ஜனாதிபதி சட்டத்தரணி அலி சப்ரி வெளியிட்ட கருத்திற்கு ஐக்கிய தேசியக் கட்சியின் உறுப்பினர்கள் பலரும் கண்டனம் வெளியிட்டிருக்கின்றர். 

அண்மையில் சமூகவலைத்தளங்களில் முஸ்லிம்கள் மத்தியில் ஜனாதிபதி சட்டத்தரணி அலி சப்ரி உரையாற்றும் காணொளியொன்று மிக வேகமாகப் பரவிவருகின்றது. 

அக்காணொளியில் அலி சப்ரி பின்வருமாறு குறிப்பிடுகின்றார்:

'கோத்தபாய ராஜபக்ஷ ஏற்கனவே வெற்றி பெற்றுவிட்டார். எனவே முஸ்லிம் மக்களுக்கு நாங்கள் கூறுவது என்னவென்றால், இவ்வெற்றியில் முஸ்லிம்களும் ஒரு பங்காளராக வேண்டும். அவ்வாறில்லாவிட்டால் வலுவான தாக்குதல்களுக்கு உள்ளாக நேரிடும்'

டுவிட்டர், பேஸ்புக் உள்ளிட்ட சமூகவலைத்தளங்களில் இக்காணொளியில் அலி சப்ரி கூறும் கருத்துக்கள் கடும் கண்டத்திற்கு உள்ளாகியிருக்கின்றது. சமூக செயற்பாட்டாளர்களும், மனித உரிமை ஆர்வலர்களும் முஸ்லிம் சமூகத்தினரை தவறாக வழிநடத்த வேண்டாம் என்றும், தேர்தலில் யாருக்கு வாக்களிக்க வேண்டும் என்ற தீர்மானத்தை அவர்கள் சுயமாக மேற்கொள்வதற்கு இடமளிக்க வேண்டும் என்றும் கேட்டுக்கொண்டிருக்கிறார்கள். 

இந்நிலையில் ஐக்கிய தேசியக் கட்சியின் சிரேஷ்ட தலைவர்கள் பலரும் தமது டுவிட்டர் பக்கத்தில் சட்டத்தரணி அலி சப்ரியின் கருத்துக்கு தமது பதில் கருத்துக்களையும், கண்டனங்களையும் வெளியிட்டிருக்கின்றார்கள். 

Comment (0) Hits: 26

தனியார் வாகனங்களில் வேட்பாளர்கள் மற்றும் கட்சிகளை பிரதிபலிக்கும் ஸ்ரிக்கர்கள் ஒட்டுவதற்கு தடை!

தனியார் வாகனங்கள் உள்ளிட்டவற்றில் ஜனாதிபதி வேட்பாளர்களது மற்றும் கட்சி நிறங்களை பிரதிபலிக்கும் வகையிலான ஸ்ரிக்கர்களை ஒட்டுவது தடையாகுமென தேர்தல்கள் ஆணைக்குழுவின் தலைவர் மஹிந்த தேசப்பிரிய தெரிவித்துள்ளார்.

ஜனாதிபதித் தேர்தல் நடைபெறவுள்ள நிலையில், தேர்தல் விதிமுறைகளை மீறும் வகையில், தனியார் பஸ் வண்டிகள், முச்சக்கர வண்டிகள் உள்ளிட்ட தனியார் வாகனங்களில் ஒவ்வொரு வேட்பாளர்களின் படங்கள், கட்சி நிறங்கள், சின்னங்கள் உள்ளிட்ட ஸ்ரிக்கர்கள் மற்றும் கொடிகள் காணப்படுவது தொடர்பில், தேர்தல்கள் ஆணைக்குழுவிற்கு முறைப்பாடுகள் கிடைக்கப் பெற்றிருப்பதாக தேர்தல்கள் ஆணைக்குழுவின் தலைவர் மஹிந்த தேசப்பிரிய கூறினார்.

இவ்வாறான செயல்பாடுகள் ஜனாதிபதித் தேர்தல் விதிமுறைகளுக்கு அமைய, குற்றமாகும் எனவும் அவர் குறிப்பிட்டுள்ளார். இதனால், இவ்வாறு காட்சிப்படுத்தப்பட்டுள்ள ஸ்ரிக்கர்கள், கொடிகள் என்பனவற்றை உடன் அகற்றுவதற்கு பொலிஸாருக்கு அதிகாரம் வழங்கப்பட்டிருப்பதாகவும் ஆணைக்குழுவின் தலைவர் மஹிந்த தேசப்பிரிய குறிப்பிட்டார்.

இது தொடர்பில், சகல பொலிஸ் நிலைய பொறுப்பதிகாரிகளுக்கும் அறிவுறுத்தல் வழங்கப்பட்டிருப்பதாகவும் ஆணைக்குழுவின் தலைவர் மேலும் தெரிவித்தார்.

Comment (0) Hits: 20

ஜனாதிபதி என்ன செய்ய வேண்டும்? - கூறுகிறார் ஞானசார தேரர்! (காணொளி)

“இரண்டு வீதிகள் இருக்கலாம். அதில் ஒரு வீதியில் காபட் போடப்பட்டுள்ளது, குழங்காமல் பயணிக்க முடியும், ஆனால் அந்த வீதியில் புலி உள்ளது  என்பதை நினைவில் வைத்துக் கொள்ளுங்கள், அந்த வீதியில் நச்சுப் பாம்புகள் உள்ளது என்பதை நினைவில் வைத்துக் கொள்ளுங்கள் என்று மக்களிடத்தில் அன்பாகக் கூறுவோம். இதனை நாம் வடக்கிற்குச் சென்ற போது நாம் கண்டோம். சற்று சிரமத்துடனாவது நச்சுப் பாம்பு பயமின்றி நேரான வீதியில் செல்ல, புலி பயமில்லாத வீதியில் செல்லவதற்கான வீதியைத் தெரிவு செய்ய” என கலகொடஅத்தே ஞானசார தேரர்  கூறினார்.

நேற்று (27) கேகாலை வட்டாராம ரஜமஹா விகாரையில் இடம்பெற்ற பொதுபல மாநாட்டில் கலந்து கொண்டு உரையாற்றும் போதே அவர் இதனைத் தெரிவித்தார்.

2015ம் ஆண்டு ஆட்சி மாற்றம் ஏற்பட்ட போது உலகையே பீதிக்கு உள்ளாக்கும் அடிப்படை வாத கருத்தைக் கொண்டுள்ள தீவிரவாத குழுவை பிரதிநிதித்துவம் செய்பவர்கள் நல்லாட்சி அரசைக் கொண்டு வருவதற்கு உதவி செய்துள்ளதாகவும், இதனைப் பற்றி தான் அந்நாட்களில் வெளிப்படுத்தியதாகவும் அவர் கூறினார்.

நல்லாட்சியைக் கொண்டு வந்து அதன் மூலம் அதிகாரத்தைப் பெற்றுக் கொண்டு ஒரே நாளில் முழு நாட்டினதும் பொருளாதாரத்தைச் சீர்குழைத்ததாகவும், தற்கொலைத் தாக்குதலை மேற்கொள்வதற்காக இஸ்லாமயி அடிப்படைவாத சக்திகள் பலவீனமான அரசாங்கத்தை தெரிவு செய்ததாகவும், அந்த பலவீனமான அரசாங்கம் தீவிரவாதிகளைப் போஷித்து அவர்கள் விரும்பியவாறு செயற்படுவதற்கு இடமளித்ததாகவும் அதன் இறுதி பெறுபேறாகவே 300க்கும் அதிகமான அப்பாவி உயிர்கள் பறிக்கப்பட்டதாகவும் அவர் அங்கு கூறினார்.

2015ம் ஆண்டு நல்லாட்சி அரசாங்கத்தைக் கொண்டு வருவதற்கு செயற்பட்ட குழுக்கள் தற்போதும் ஜனாதிபதி தேர்தலுக்கு உதவி வழங்கிக் கொண்டு இருப்பதாகவும் அவர்கள் அதிகாரத்திற்கு வந்தால் என்ன நடக்கும்? என்றும் ஞானசார தோர் கேள்வி எழுப்பினார்.

Comment (0) Hits: 17

'செயற்பாட்டு அரசியலில் இருக்கவே விரும்புகிறேன்' - மைத்திரி!

ஓய்வெடுப்பதை விட செயற்பாட்டு அரசியலில் இருக்கவே விரும்புவதாக ஜனாதிபதி மைத்திரிபால சிறிசேன தெரிவித்துள்ளார்.

தனது உத்தியோகபூர்வ ட்விற்றர் கணக்கில் இடுகையொன்றை இட்டுள்ள ஜனாதிபதி மைத்திரிபால சிறிசேன, 

"ஓய்வெடுக்கும் சுகத்தை விட செயற்பாட்டு அரசியலில் ஈடுபடுவதை நான் விரும்புகிறேன்"
என தெரிவித்துள்ளார்.

உத்தியோகபூர்வ விஜயம் மேற்கொண்டு ஜப்பான் சென்ற ஜனாதிபதி மைத்திரிபால சிறிசேன, நேற்று இரவு நாடு திரும்பினார்.

தற்போது இடம்பெறவுள்ள ஜனாதிபதித் தேர்தலில், ஜனாதிபதி மைத்திரிபால சிறிசேன போட்டியிடவில்லை என்பதோடு, பதவியிலுள்ள ஜனாதிபதியொருவர் இரண்டாவது முறை ஜனாதிபதித் தேர்தலுக்காக களமிறங்காத முதலாவது சந்தர்ப்பம் இதுவென்பதும் குறிப்பிடத்தக்கது.

Comment (0) Hits: 24

டொனால்ட் ட்ரம்பிற்கு பிரதமர் ரணில் பாராட்டு!

தீவிரவாதத்திற்கு எதிராக மேற்கொண்டு வரும் நடவடிக்கைகள் தொடர்பில், பிரதமர் ரணில் விக்ரமசிங்க, அமெரிக்க ஜனாதிபதி டொனால்ட் ட்ரம்பிற்கு வாழ்த்து தெரிவித்துள்ளார்.

தனது உத்தியோகபூர்வ ட்விற்றர் மற்றும் பேஸ்புக் கணக்கின் ஊடாக அவர் இதனைத் தெரிவித்துள்ளார்.

 

தீவிரவாதத்திற்கு எதிராக மேற்கொள்ளப்பட்டு வரும் வெற்றிகரமான நடவடிக்கைகளுக்கு எதிராக தனது பாராட்டுகளைத் தெரிவிப்பதாக அவர் தெரிவித்துள்ளார்.

அண்மையில், இலங்கையில் இடம்பெற்ற தீவிரவாத தாக்குதலை தாமே மேற்கொண்டதாக ஐ.எஸ். அமைப்பு பொறுப்பேற்றிருந்ததோடு, அதன் மூலம் உலகம் முழுவதும் அச்சத்தையும், தீவிரவாதத்தையும் ஏற்படுத்தியிருந்தனர். ஆயினும், தீவிரவாதத்திற்கு எதிரான இவ்வாறான நடவடிக்கை மூலம், உலகம் பாதுகாப்பான இடமாக மாறியுள்ளதாக பிரதமர் ரணில் விக்ரமசிங்க சுட்டிக்காட்டியுள்ளார்.

இஸ்லாமிய அரசு (ஐ.எஸ்) குழுவின் தலைவர் அபூ பக்கர் அல் பக்தாதி, சிரியாவில் அமெரிக்கா மேற்கொண்ட இராணுவ நடவடிக்கை ஒன்றில் கொல்லப்பட்டதாக, நேற்றைய தினம் அமெரிக்க ஜனாதிபதி டொனால்ட் ட்ரம்ப் தெரிவித்திருந்தார் என்பது குறிப்பிடத்தக்கது.

Comment (0) Hits: 28

'அன்று பெண்களின் பாதுகாப்பை உறுதி செய்யாதவர்கள் இன்று முதலைக் கண்ணீர் வடிக்கின்றனர்' - ரணில்!

அன்று பெண்களின் பாதுகாப்புக்காக செயற்படாதவர்கள் இன்று முதலைக் கண்ணீர் வடிப்பதாக பிரதமர் ரணில் விக்ரமசிங்க தெரிவித்துள்ளார்.
 
மஹிந்த ராஜபக்ஷ ஆட்சிக் காலத்தில் உள்ளுராட்சி மன்ற அரசியல்வாதிகள் பெண்களை பாலியல் ரீதியாக துன்புறுத்திய போது, பெண்களை துஷ்பிரயோகம் செய்த போது சட்ட நடவடிக்கை எடுக்கப்படவில்லை என அவர் சுட்டிக்காட்டியுள்ளார்.
 
இவ்வாறான நபர்கள் இன்று பெண்களின் பாதுகாப்பு குறித்து முதலைக் கண்ணீர் வடிக்கின்றார்கள் என அவர் தெரிவித்துள்ளார்.
 
நேற்றைய தினம் (27) நடைபெற்ற பெண்களுக்கான மாநாட்டில் பங்கேற்ற போது, அவர் இதனைக் குறிப்பிட்டுள்ளார்.
 
அன்று பெண்களை விளையாட்டுப் பொருட்களாக பார்த்தவர்களிடம் பெண்களின் பாதுகாப்பை எவ்வாறு எதிர்பார்க்க முடியும் என அவர் கேள்வி எழுப்பியுள்ளார்.
 
ராஜபக்ஷ ஆட்சிக் காலத்தில், பிரதேச மட்ட அரசியல்வாதிகள் பெண்களை பாலியல் வன்கொடுமைக்கு உட்படுத்தி விருந்து வைத்து கொண்டாடியிருந்தனர். தங்காலையில் இடம்பெற்ற பாலியல் வன்கொடுமைச் சம்பவத்தை இந்த நாடு முழுவதுமே கேள்விப்பட நேரிட்டது. இவ்வாறு பெண்கள் பாலியல் ரீதியாக துன்புறுத்தப்பட்டமை மற்றும் பெண்களுக்கு எதிரான வன்முறைகள் பல்வேறு சந்தர்ப்பங்களில் பதிவாகியிருந்தன.
 
இவ்வாறான சம்பவங்கள் தொடர்பில், பொலிஸ் திணைக்களத்திற்கு பொறுப்பான அமைச்சின் செயலாளர் விசாரணைகளை நடாத்தவில்லை. அந்தக் காலப்பகுதியில் பொலிஸ் திணைக்களத்திற்கு பொறுப்பான அமைச்சரவை செயலாளராக கோதபாய ராஜபக்ஷ கடமையாற்றியிருந்தார். அவ்வாறான ஓருவருக்கு வாக்களிப்பதா என்பதனை பெண்களிடம் நான் கேள்வியாக கேட்கின்றேன்.
 
ராஜபக்ஷவின் பத்தாண்டு கால ஆட்சியின் போது, பெண்கள் பாலியல் ரீதியாக துஷ்பிரயோகத்திற்கு உட்பட்ட போது, அதற்கு எதிராக எவ்வித நடவடிக்கையும் எடுக்கப்படவில்லை.
 
அவ்வாறானதொரு முன்னாள் பாதுகாப்புச் செயலாளருக்கு எவ்வாறு வாக்களிப்பது?
 
இவ்வாறான ஓருவர் நாட்டின் ஜனாதிபதியாக நியமிக்கப்பட்டால், பெண்களுக்கு எவ்வாறு நியாயம் கிடைக்கும்? என ரணில் விக்ரமசிங்க கேள்வி எழுப்பியுள்ளார்.
 
Comment (0) Hits: 30

"சஜித்தின் தேர்தல் விஞ்ஞாபனம் கண்டியில் வெளியிடப்படும்" - மங்கள! (காணொளி)

புதிய ஜனநாயக முன்னணியின் ஜனாதிபதி வேட்பாளர் சஜித் பிரேமதாசவின் தேர்தல் விஞ்ஞாபனம் எதிர்வரும் 31 ஆம் திகதி கண்டியில் வெளியிடப்பட உள்ளது.
 
கண்டி குயின்ஸ் ஹோட்டலில் நடைபெறவுள்ள நிகழ்வில், அவருடைய தேர்தல் விஞ்ஞாபன வெளியீடு நடைபெறும் என தேர்தல் விஞ்ஞாபன வெளியீட்டு குழுவின் தலைவர் நிதி அமைச்சர் மங்கள சமரவீர தெரிவித்துள்ளார்.
 
இந்த தேர்தல் விஞ்ஞாபனத்தின் முதல் பிரதிகள,  கண்டி மல்வத்து மற்றும் அஸ்கிரி பீடாதிபதிகளிடம், சஜித் பிரேமதாச அவர்களினால் 31 ஆம் திகதி காலையில் சமர்ப்பிக்கப்படவுள்ளது.
 
இம்முறை 2015 ஆம் ஆண்டில் பெரும்பான்யைமான முற்போக்கு, புத்தாக்க முயற்சியுடைய நாட்டின் பெண்கள் மற்றும் இளைஞர்களின் எதிர்காலத்தை முன்னிலைப்படுத்தி தேர்தல் விஞ்ஞாபனம் வெளியிடப்பட்டுள்ளது.
 
நாட்டின் பிரஜைகள் தொடர்பில் உன்னிப்பாக அவதானித்து உருவாக்கப்பட்ட தேர்தல் விஞ்ஞாபனம் இதுவாகும் என அமைச்சர் மங்கள குறிப்பிட்டுள்ளார்.
 
அவர் தொடர்ந்து பேசுகையில்,
 
"ராஜபக்ஷக்களின் தேவதைக் கதைகளைப் போன்றல்லாது, நாம் இம்முறையும் சொல்வதை செய்வோம். நாம் எமது தேர்தல் விஞ்பானத்தை எதிர்வரும் 31ம் திகதி கண்டியில் வெளியிட உள்ளோம்.
 
ராஜபக்ஷக்களின் தேர்தல் விஞ்ஞாபனத்தை விடவும் தமது தேர்தல் விஞ்ஞாபனம் வித்தியாசமானது, நான் ராஜபக்ஷக்களின் அண்மைய தேர்தல் விஞ்ஞாபனத்தை பற்றி மட்டும் பேசவில்லை 2005 மற்றும் 2010ம் ஆண்டிலும் விஞ்ஞாபனங்கள் வெளியிடப்பட்டிருந்தன.
 
எனினும், ஒவ்வொரு தேர்தல் விஞ்ஞாபனத்திலும் சொல்வதை அவர்கள் செய்தது கிடையாது, சொல்வது ஒன்று அவர்களினால் செய்யப்படுவது வேறொன்று.
 
2005ம் ஆண்டு நிறைவேற்று அதிகார ஜனாதிபதி முறைமையை ரத்து செய்வதாக கூறினார்கள். சம்பள அதிகரிப்பு செய்வதாகவும் மக்களுக்கு போசாக்கு பொதியொன்றை வழங்குவதாகவும் உறுதியளித்திருந்தனர்.
 
எனினும், உறுதியளித்த வாக்குறுதிகள் எதுவும் நிறைவேற்றப்படவில்லை. அவ்வாறு வாக்குறுதிகள் நிறைவேற்றப்படவில்லை என்பதனை ஆதாரங்களுடன் நிரூபிக்க முடியும்.
 
அதிகாரத்தை தக்க வைத்துக்கொண்டு, சர்வாதிகார ஆட்சியொன்றை மேற்கொள்வதற்கே ராஜபக்ஷ தரப்பு முயற்சிக்கின்றது. குடும்ப ஆட்சியை நிறுவிக் கொள்ளக்கூடிய, இழிவான சர்வாதிகார தீர்மானங்களையே எடுத்திருந்தனர்.
 
எனினும், நாம் 2015 ஆம் ஆண்டில் அளித்த வாக்குறுதிகளில் 80 வீதமானவை பூர்த்தி செய்துள்ளோம். இம்முறையும் நாம் சொல்வதை செய்வோம்.
 
இம்முறை மிகச் சிறந்த தேர்தல் விஞ்ஞாபனமொன்று சமர்ப்பிக்கப்பட உள்ளது" என அவர் குறிப்பிட்டுள்ளார்.
 

Comment (0) Hits: 31

“பிசாசு கதவுக்கு அருகில்!, வீணை வாசிப்பதில் பயனில்லை” - கலாநிதி ஜயம்பதி! (காணொளி)

2015ம் ஆண்டில் பெற்ற ஜனநாயகம், சட்டத்தின் ஆதிக்கம், நீதிமன்ற சுயாதீனத் தன்மை போன்றவற்றைப் பாதுகாத்துக் கொள்ள வேண்டுமாயின் சஜித் பிரேமதாசாவை வெற்றி பெறச் செய்ய வேண்டும் என பாராளுமன்ற உறுப்பினர் கலாநிதி ஜயம்பதி விக்ரமரத்ன தெரிவித்தார்.  

நேற்று முன்தினம் (26) இடம்பெற்ற ஊடகவியலாளர் சந்திப்பின் போது கருத்து தெரிவிக்கையிலேயே அவர் இதனைத் தெரிவித்தார்.

“வரவிருக்கும் எதிரி மிகவும் ஆபத்தானவர். ஒரு வருடத்திற்கு முன்னர் வியத்மக சம்மேளனத்தில் வைத்து கமல் குணரத்ன என்ன கூறினார்?,  அரசியலமைப்பு மாற்றத்திற்காகச் செயற்படுபவர்கள் மாத்திரமல்ல, அரசியலமைப்பு மாற்றத்திற்கு ஒத்துழைப்பை வழங்குபவர்களையும் கூட கொலை செய்து, அந்த 87, 89, 90ம் ஆண்டுகளைப் போன்று அவர்களை உடல்களை முழுமையாகக் கொண்டு செல்ல முடியாதவாறு செய்ய வேண்டும் எனக் கூறியிருந்தார்.

அரசியல் அமைப்பு திருத்தத்தைக் கொண்டு வருபவர்கள் தேசத் துரோகிகள், அவர்களுக்கு எதிராக வழக்குத் தாக்கல் செய்ய வேண்டும் என கடற்படையில் உயர் பதவி வகித்த சரத் வீரசேகர கூறியிருந்தார்.  இவ்வாறான பாதாள உலகத்தினர்கள் மீண்டும் ஆட்சிக்கு வந்தால் நீதிமன்றத்திற்கு என்ன நடக்கும் என்பதை புதிதாகக் கூறத் தேவையில்லை. அவற்றை நாம் அறிவோம்.  எனவே இனிமேலும் பிசாசு கதவுக்கு அருகில் இருக்கும் போது வீணை வாசித்துக் கொண்டிருப்பதில் பயனில்லை.

அதனை விட முக்கியமான அரசியல் காரணம் உள்ளது. நியாயமான காரணங்களுக்காக ஆர்ப்பாட்டம் செய்தவர்களுக்கு ரத்துபஸ்வலவில், சிலாபத்தில் போன்ற இடங்களில் என்ன நடந்தது என்பதை நாம் கண்டோம். அவைகள்தான் இனி எதிர்காலம். இவை செயலாளர் பதவியில் இருக்கும் போது நடந்தவை. ஜனாதிபதி பதவி கிடைத்தால் எப்படி இருக்கும்?

இந்நாட்டில் ஜனநாயகத்தைப் பாதுகாக்க, 2015ம் ஆண்டில் கிடைத்த ஜனநாயக சந்தர்ப்பங்களைப் பாதுகாக்க, நீதிமன்ற சுயாதீனத்தைப் பாதுகாத்துக் கொள்ள, சுயாதீன ஆணைக்குழுக்களுக்கு இருக்கும் உரிமைகளைப் பாதுகாத்துக் கொள்ள, பாராளுமன்றத்தை தொடர்ந்தும் பலமிக்க நிறுவனமாக முன்னெடுத்துச் செல்ல நாம் இந்த நடவடிக்கையினை மேற்கொள்ள வேண்டும்” என்றார்.

Comment (0) Hits: 19

பக்கம் 9 / 66