V2025

செய்தி

தேர்தலுக்கு ஆயத்தமாகி வரும் மஹிந்த, மைத்திரி தரப்பு

ஜனாதிபதி மைத்திரிபால சிறிசேன மற்றும் எதிர்க்கட்சித்தலைவர் மஹிந்த ராஜபக்ச ஆகிய தரப்புக்கள் தேர்தல் குறித்து பேச்சுவார்த்தைகளை ஆரம்பித்துள்ளன.

ஸ்ரீலங்கா சுதந்திர கட்சி மற்றும் ஸ்ரீலங்கா பொதுஜன பெரமுன ஆகிய கட்சிகளுக்கு இடையிலான ஐந்தாவது கட்ட பேச்சுவார்த்தை சற்றுமுன்னர் ஆரம்பமாகியுள்ளது.

எதிர்க்கட்சித் தலைவர் அலுவலகத்தில் இந்தப் பேச்சுவார்த்தை இடம்பெறுவதாக எமது செய்தியாளர் கூறியுள்ளார்.

இரண்டு கட்சிகளும் இணைந்து கூட்டணி அமைப்பது சம்பந்தமாக இரு தரப்பினரும் கலந்துரையாடி வருகின்றனர்.

இரு கட்சிகளுக்கும் இடையே ஏற்கனவே நான்கு கட்ட பேச்சுவார்த்தை இடம்பெற்றுள்ளமை குறிப்பிடத்தக்கது.

Comment (0) Hits: 143

கருத்தடை குற்றச்சாட்டு குறித்து தாய்மாரிடம் மருத்துவ பரிசோதனை

டொக்டர் சஹாப்டீன் சாபியினால் மேற்கொள்ளப்பட்ட சிசேரியன் சிகிச்சை தொடர்பில் மருத்துவ பரிசோதனைகள் மேற்கொள்ளப்பட உள்ளது.

குருணாகல் வைத்தியசாலையின் மருத்துவர் சஹாப்டீன் சாபி, சிசேரியன் சத்திரசிகிச்சைகளின் மூலம் கருத்தடை செய்ததாகக் குற்றம் சுமத்தப்பட்டுள்ளது.

சஹாப்டீன் சாபீ 4000 சிங்கள பௌத்த பெண்களுக்கு கருத்தடை செய்ததாகக் குற்றம் சுமத்தப்பட்டுள்ளது.

இவ்வாறு முறைப்பாடு செய்து வரும் தாய்மாருக்கு மருத்துவ பரிசோதனை நடத்தப்பட உள்ளதாகத் தெரிவிக்கப்படுகிறது.

 

Comment (0) Hits: 159

மங்களவிற்கு எதிராக குற்றம் சுமத்தியவர் சிறுவர் பாலியல் குற்றவாளி

நிதி அமைச்சர் மங்கள சமரவீரவிற்கு எதிராக குற்றம் சுமத்தியவர் சிறுவர் பாலியல் குற்றச் செயல்களுடன் தொடர்புடைய குற்றவாளி என தெரிவிக்கப்படுகிறது.

Comment (0) Hits: 157

நாடாளுமன்றத் தெரிவுக்குழு அமர்வுகளின் நேரலை ரத்துக் எதிர்ப்பு

நாடாளுமன்றத் தெரிவுக்குழு அமர்வுகளின் நேரலை ரத்து செய்யப்பட்டமை குறித்து சுதந்திர ஊடக அமைப்பு எதிர்ப்பை வெளியிட்டுள்ளது.

ஈஸ்டர் ஞாயிறு தாக்குதல் தொடர்பில் விசாரணை நடத்தும் நாடாளுமன்றத் தெரிவுக்குழுவின் விசாரணைகள் நேரலையாக ஒளிபரப்புச் செய்யப்பட்டு வந்தது.

பின்னர் தேசியப் பாதுகாப்பிற்கு அச்சுறுத்தல் ஏற்படக்கூடும் என்ற அடிப்படையில் இந்த நேரலை ரத்து செய்யப்பட்டுள்ளது.

இவ்வாறு நேரலை ரத்து செய்யப்பட்டமையானது தகவல் அறிந்து கொள்ளும் உரிமையை முடக்கும் வகையிலானது என சுதந்திர ஊடக அமைப்பு தெரிவித்துள்ளது.

 

Comment (0) Hits: 137

நாடாளுமன்றத் தெரிவுக்குழுவில் முன்னிலையாகும் பொலிஸ் மா அதிபர்

பொலிஸ் மா அதிபர் பூஜித் ஜயசுந்தர மற்றும் பாதுகாப்புச் செயரலாளர் ஹேமசிறி பெர்னாண்டோ ஆகியோர் இன்றைய தினம் நாடாளுமன்றத் தெரிவுக்குழுவில் முன்னிலையாக உள்ளனர்.

Comment (0) Hits: 138

தஜிகிஸ்தானில் ரஸ்ய ஜனாதிபதியை சந்திக்கும் மைத்திரி

இலங்கையின் ஜனாதிபதி மைத்திரிபால சிறிசேன, தஜிகிஸ்தானில் வைத்து ரஸ்ய ஜனாதிபதி விளாடிமிர் புட்டினை சந்திக்க உள்ளார்.

ஜனாதிபதி மைத்திரிபால சிறிசேன தஜிகிஸ்தானுக்கான விஜயமொன்றை மேற்கொள்ள உள்ளார்.

எதிர்வரும் 13ம் திகதி அவர் இவ்வாறு தஜிகிஸ்தானுக்கான விஜயத்தை மேற்கொள்ள உள்ளதாகத் தெரிவிக்கப்படுகிறது.

அரச தலைவர்கள் பலர் பங்கேற்கும் சர்வதேச மாநாடுகளில் ஜனாதிபதி பங்கேற்பார் என தெரிவிக்கப்படுகிறது.

ஜனாதிபதி மைத்திரி, ரஸ்ய ஜனாதிபதி விளாடிமிர் புட்டினை சந்திக்க உள்ளதாகவும் தெரிவிக்கப்படுகிறது.

ஜனாதிபதி மைத்திரி எதிர்வரும் 18ம் திகதி நாடு திரும்புவார் என அறிவிக்கப்பட்டுள்ளது.

Comment (0) Hits: 140

எகிப்தில் கிளர்ச்சியாளர்கள் மேற்கொண்ட தாக்குதலில் 8 பேர் பலி

எகிப்தில் கிளர்ச்சியாளர்கள் நடத்திய தாக்குதல்களில் எட்டு பேர் கொல்லப்பட்டுள்ளதாகத் தெரிவிக்கப்படுகிறது.

Comment (0) Hits: 140

சவுதிக்கு தப்பிடியோடிய இலங்கையர்கள் யார்? காரணம் என்ன?

சர்ச்சைக்குரிய சவுதி நாட்டவர்களுடன் நெருங்கிய தொடர்பு வைத்திருந்தவர்கள் தங்கள் குடும்பத்துடன் சவுதிக்கு சென்றுள்ளதாக பொலிஸ் தரப்பு செய்திகள் தெரிவிப்பதாக சிங்கள இணையத்தளமொன்று செய்தி வெளியிட்டுள்ளது.

கிழக்கு மாகாண முன்னாள் ஆளுநர் ஹிஸ்புல்லா, சவுதி நாட்டவர்கள் சிலரை பாசிக்குடா நட்சத்திர விடுதி ஒன்றில் சந்தித்த காணொளியொன்ற தேசிய ஊடகங்கள் வெளியிட்டிருந்தன.

இதுகுறித்து புலன் விசாரணைகளை ஆரம்பித்த பயங்கரவாத விசாரணைப் பிரிவினர் கல்முனை, காத்தான்குடி பகுதிகளை சேர்ந்தவர்களிடம் வாக்குமூலம் பெற்றனர்.

சவுதி நாட்டவர்களை சந்தித்த மற்றும் அவர்களுக்கு தங்குமிட வசதிகளை ஏற்பாடு செய்த, மொழி பெயர்ப்பு செய்தவர்களிடமே இவ்வாறு வாக்குமூலம் பெற்றுக்கொள்ளப்பட்டது.

இவர்கள் வழங்கிய வாக்குமூலங்களுக்கு அமைய சவுதி நாட்டவர்களுடன் நெருக்கமான தொடர்புகளை வைத்திருந்தவர்கள் தங்கள் குடும்பத்துடன் சவுதிக்கு சென்றுள்ளதாக தெரிவிக்கப்பட்டுள்ளது.

Comment (0) Hits: 171

புத்தரின் பாதை புரியாத பிக்குகள் – அமைச்சர் மங்கள சாட்டை

“தம்மை கொல்ல வந்த தேவதத்தருக்கு கூட விகாரையை தடை செய்யவில்லை புத்த பெருமான்.அந்த உன்னதமான பாதையை புரியாத முட்டாள் தேரர்கள் துன்பத்திலிருந்து நீங்கி சுகம் பெறட்டும்.கவலையில் இருந்து நீங்கட்டும்”

இவ்வாறு குறிப்பிட்டு தனது ட்விட்டரில் பதிவிட்டுள்ளார் அமைச்சர் மங்கள சமரவீர.

கம்பஹா மாவட்ட விகாரை நிகழ்வுகளில் அமைச்சர்களான ராஜித, மங்கள மற்றும் சதுர சேனாரத்ன எம்பி ஆகியோர் கலந்து கொள்ள கூடாதென கம்பஹா மாவட்ட சங்க சபை தீர்மானம் எடுத்துள்ளதையடுத்து அமைச்சரின் இந்த கருத்து வெளியாகியுள்ளது.

Mangala Twitter Monks

 

Comment (0) Hits: 144

செய்திகளை வெளியிடும்போதும் பகிரும்போதும் அவதானம்

போலி செய்திகள் மற்றும் போலிப் பிரசாரத்துக்கு எதிராக சட்ட நடவடிக்கை எடுக்கும் வகையில், தண்டனை சட்ட சரத்துகள் மற்றும் குற்றவியல் சட்டங்களில் மாற்றங்களை ஏற்படுத்த அமைச்சரவை அனுமதி வழங்கியுள்ளது.

இந்தக் குற்றச்சாட்டுக்களில் ஒருவர் கைதுசெய்யப்பட்டு, அவர் மீதான குற்றம் ஒப்புவிக்கப்படும் பட்சத்தில் குற்றவாளிக்கு10 லட்சம் ரூபாய் வரையில் அபராதம் விதிப்பதற்கு அல்லது 5 ஆண்டுகால சிறை தண்டனை விதிப்பதற்கு அல்லது இந்த இரண்டு தண்டனைகளையும் வழங்குவதற்கு ஏற்றவாறு சட்டத்திருத்தம் மேற்கொள்ளப்படவுள்ளது.

வெறுப்புணர்வு பிரசாரம் தொடர்பிலும் சட்ட நடவடிக்கை எடுக்கும் வகையிலான சட்டத்திருத்தங்களும் மேற்கொள்ளப்படவுள்ளன.

எனவே, செய்திகளையும், தகவல்களையும் பகிரும் போது அவதானமாக செயற்படுமாறு கோரிக்கை முன்வைக்கப்பட்டுள்ளது.

Comment (0) Hits: 169

மகிந்தவிற்கு குண்டு துளைக்காத வாகனத்தை வழங்க மைத்திரி மறுப்பு

எதிர்க்கட்சித் தலைவர் மகிந்த ராஜபக்சவிற்கு குண்டு துளைக்காத வாகனமொன்றை வழங்குவது குறித்த யோசனைக்கு ஜனாதிபதி மைத்திரிபால சிறிசேன மறுப்பு தெரிவித்துள்ளதாக அரசாங்கத் தரப்புத் தகவல்கள் தெரிவிக்கின்றன.

இந்த யோசனை நேற்று (04) நடந்த அமைச்சரவைக் கூட்டத்தில் சமர்ப்பிக்கப்படவில்லை எனவும் தெரியவருகிறது.

எதிர்க்கட்சித் தலைவர் மகிந்த ராஜபக்சவிற்கு குண்டு துளைக்காத வாகனமொன்றை வழங்கும் யோசனையை பிரதமர் ரணில் விக்ரமசிங்க கடந்த வாரம் நடந்த அமைச்சரவையில் முன்வைத்திருந்தார்.

இந்த யோசனையை மறுத்திருந்த நிதியமைச்சர் மங்கள சமரவீர இதனை மீள் பரிசீலனை செய்ய வேண்டும் என தெரிவித்திருந்தார்.

எதிர்க்கட்சித் தலைவருக்கு ஏற்கனவே குண்டு துளைக்காத மூன்று வாகனங்கள் வழங்கப்பட்டுள்ளதாக ஜனாதிபதி இதன்போது தெரிவித்துள்ளார்.

மகிந்த ராஜபக்சவுடன் கடந்த காலங்களில் ஏற்பட்ட மனக்கசப்பும் இந்த யோசனையை மைத்திரிபால நிராகரிக்கக் காரணமாக அமைந்ததாக அரசாங்கத் தரப்புத் தகவல் தெரிவிக்கின்றன.

Comment (0) Hits: 183

கிழக்கிற்கு கத்தோலிக்க ஆளுநர்

கிழக்கு மாகாண ஆளுநராக பதவி வகித்த ஹிஸ்புல்லா பதவி விலகியதை அடுத்து அந்தப் பதவிக்கு கத்தோலிக்கர் ஒருவரை நியமிக்க வேண்டும் என்ற கோரிக்கைகள் முன்வைக்கப்பட்டு வருவதாக ஜனாதிபதி செயலகத் தரப்புத் தகவல்கள் தெரிவிக்கின்றன.

இந்த நிலையில், கிழக்கு மாகாண ஆளுநராக இலங்கை தொழிற்கட்சியின் தலைவர் ஏ.எஸ்.பி லியனகே நியமிக்கப்படவுள்ளார் என தகவல்கள் வெளியாகியுள்ளன.

மேல் மாகாணத்திற்கு ஏ.ஜே.எம். முஸாம்மில் நியமிக்கப்பட்டுள்ள நிலையில், கிழக்கு மாகாணத்திற்கு கத்தோலிக்கரான ஏ.எஸ்.பி. லியனகே நியமிக்கப்படுவதற்கான வாய்ப்புக்கள் இருப்பதாக தெரியவருகிறது.

EastGovarnor

Comment (0) Hits: 157

முஸ்லிம் சமூகத்துடன் கைகோர்க்கவேண்டும் : திகா

உயிர்த்த ஞாயிறு தாக்குதல் என்பது கண்டனத்துக்குரியது என்பதில் மாற்றுக் கருத்து இல்லை. அதனை செய்தவர்கள் இஸ்லாமிய அடிப்படைவாதிகள் என்பதும் வெளிப்படையானது. அதற்காக ஒட்டுமொத்த முஸ்லிம் மக்களையும் ஓரம் கட்டும் இனவாத சிந்தனை கொண்ட அரசியல் முன்னெடுப்புகளை அனுமதிக்க முடியாது.

தனித்துவமான சமூகம் என்ற வகையில் முஸ்லிம் மக்கள்பிரதிநிதிகள் எடுத்திருக்கும் நிலைப்பாடு வரலாற்று முக்கியத்துவம் வாய்ந்தது. இலங்கையில் சிறுபான்மை சமூகம் என்ற வகையில் மலையகத் தமிழ் சமூகம் முஸ்லிம் சமூகத்துடன் கைகோர்க்க வேண்டிய தருணம் இது என தமிழ் முற்போக்கு கூட்டணியின் பிரதித் தலைவரும் மலைநாட்டு புதிய கிராமங்கள் உட்கட்டமைப்பு சமூதாய அபிவிருத்தி அமைச்சருமான பழனி திகாம்பரம் தெரிவித்துள்ளார்.

உயிர்த்த ஞாயிறு தாக்குதல் சம்பவங்களின் தொடர்ச்சியாக நாட்டில் எழுந்துள்ள நெருக்கடியான அரசியல் சூழ்நிலை காரணமாக தமது அமைச்சுப்பதவிகளையும் அரசாங்கத்தில் கொண்டிருந்த ஏனைய பதவிகளையும் துறப்பதற்கு முஸ்லிம் மக்கள்பிரதிநிதிகள் ஒன்றிணைந்து எடுத்திருக்கும் தீர்மானம் தொடர்பில் ஊடகங்களுக்கு விடுத்திருக்கும் அறிக்கையிலேயே மேற்கண்டவாறு தெரிவித்துள்ளார்.

அந்த அறிக்கையில் மேலும் தெரிவிக்கப்படடுள்ளதாவது,

உயிர்த்த ஞாயிறு தாக்குதல் கிறிஸ்தவர்களை இலக்காகக் கொண்டது எனினும் அதில் பெருமளவில் பாதிக்கப்பட்டவர்கள் தமிழர்கள் என்பது வெளியில் பேசப்படாத உண்மை. எனினும், மதவாதத்தை அடிப்படையாகக் கொண்ட அந்த தாக்குதலை இன அடிப்படையில் சிந்தித்து எதிர்வினையாற்றாமல் தமிழ் சமூகம் பொறுமையுடனும் நிதானத்துடனும் செயற்பட்டது. கிறிஸ்த்தவ மக்களும் அதனையே செய்தனர். முஸ்லிம் மக்கள் அவர்களுக்குள்ளேயிருந்து எழுந்த அடிப்படைவாத கும்பலை அழித்தொழிப்பதற்கும், கைதுசெய்வதற்கும் துணை நின்றனர், எனினும், இந்த தாக்குதலில் நேரடியாக பாதிப்புறாமல் தமது அரசியல் இருப்புக்காகவும் பதவி ஆசைகளுக்காகவும் உயிர்த்த ஞாயிறு தாக்குதல் சம்பவத்தை திசைதிருப்பி நாட்டில் இன, மத நல்லிணக்கததை பாரியளவில் சீர் குலைக்கும் நடவடிக்கையில் திட்டமிடப்பட்ட குழுக்கள் ஈடுபட்டு வருகின்றனர்.

குண்டுத் தாக்குதலை மேற்கொண்ட பயங்கரவாத கும்பலுக்கும் அரசியல்வாதிகளுக்கும் ஏதேனும் தொடர்புகள் இருந்து அவை நிரூபிக்கப்படுமானால் அதற்கு உரிய தண்டனை வழங்கப்படல் வேண்டும் என்பதில் மாற்றுக்கருத்து இல்லை. ஆனால் அத்தகைய குற்றச்சாட்டுகளை விசாரணை செய்வதற்கும் நடவடிக்கை எடுப்பதற்கும் முன்பதாக முழு முஸ்லிம் சமூகத்தையும் குற்றவாளிக் கூண்டில் ஏற்ற முயற்சிக்கும் இனவாத போக்கை அனுமதிக்க முடியாது.

சிறுபான்மை சமூகம் என்றவகையில் இதுபோன்ற இனவாத தாக்குதல்களை இதற்கு முன்னர் அனுபவித்த சமூகம் என்ற வகையில் மலையகத் தமிழ் சமூகம் இன்றைய நிலையில் முஸ்லிம் சமூகத்துடன் கைகோர்க்க வேண்டிய தருணமாக இன்றைய அரசியல் சூழ்நிலை காணப்படுகின்றது. ஒரே மொழி பேசும் சிறுபான்மை சமூகமாக இந்த தருணத்தில் தமிழ் சமூகமும் முஸ்லிம் சமூகமும் புரிந்துணர்வுடன் செயற்பட வேண்டியுள்ளது.

கடந்தகாலங்களில் சில கசப்பான சிறு சம்பவங்கள் நடைபெற்றிருந்தாலும் கூட அவற்றை மறந்து இரண்டு சமூகங்களும் ஒருவருக்கொருவர் ஆறுதலாக செயற்படுதல் வேண்டும். இன்று முஸ்லிம் சமூகத்தின் மீது ஏவிவிடப்படும் இந்த இனவாத போக்கு நாளை எமக்கும் ஏற்படலாம் என்பதனை மனதில் கொண்டு தனிப்பட்ட விருப்பு வெறுப்புகளைக் கடந்து சகோதர முஸ்லிம் சமூகத்துக்கு ஆதரவுக்கரம் நீட்டுவோம் என்றும் குறிப்பிட்டுள்ளார்.

Comment (0) Hits: 141

முஸம்மில் நியமிக்கப்பட்டதன் பின்னணி என்ன?

கொழும்பு மாநகரசபையின் முன்னாள் மேயரான ஏ.ஜே.எம். முஸம்மில், மேல் மாகாண ஆளுநராக நியமிக்கப்பட்டுள்ளார். ஜனாதிபதி மைத்திரிபால சிறிசேன முன்னிலையில் அவர் இன்று பதவிப்பிரமாணம் செய்துகொண்டார்.

இனவாத செயற்பாடுகளுக்கு எதிர்ப்பு தெரிவித்து அரசாங்கத்தில் அங்கம் வகிக்கும் முஸ்லிம் தலைவர்கள் தமது அமைச்சுப் பதவிகளை இராஜினாமா செய்தனர். முஸ்லிம் ஆளுநர் இருவருக்கு பதவி விலகுமாறு அழுத்தம் அதிகரிக்க அவர்களும் தமது பதவிகளில் இருந்து விலகிக் கொண்டனர். இந்த நிலையில், இன்று ஏ.ஜே.எம். முஸம்மில் மேல் மாகாண சபையின் ஆளுநராக பதவியேற்றுக்கொண்டார்.

யார் இந்த முஸம்மில்?

ஐக்கிய தேசிய கட்சியின் சிரேஷ்ட உறுப்பினர்களில் ஒருவரான ஏ.ஜே.எம். முஸம்மில் 2011 ஆம் ஆண்டு முதல் 2016 ஆம் ஆண்டு வரை கொழும்பு மாநாகர சபையின் மேயராக கடமையாற்றினார். அதன் பின்னர் கடந்த 2017 பெப்ரவரி முதல் மலேசியாவுக்கான தூதுவராக செயற்பட்டு வந்தார்.

ஐக்கிய தேசியக்கட்சியின் ஆதரவாளர் ஏ.ஜே.எம். முஸம்மிலுக்கு ஜனாதிபதி மைத்திரிபால சிறிசேன ஆளுநர் பதவியை வழங்கியது எவ்வாறு என்ற கேள்வி எழுப்பப்படுகிறது. 2016ஆம் ஆண்டின் பின்னர் ஏ.ஜே.எம். முஸம்மில் முன்னாள் ஜனாதிபதி மகிந்த ராஜபக்சவிற்கு நெருக்கமாக செயற்பட்டு வருவதாக சுட்டிக்காட்டப்படுகிறது.

தற்போது மேல் மாகாண ஆளுநராக முஸம்மிலை நியமிக்குமாறு மகிந்த ராஜபக்ச தரப்பில் இருந்து ஜனாதிபதிக்கு சிபாரிசு செய்யப்பட்டுள்ளதாக கூறப்படுகிறது. ஆளுநர் இருவரை பதவி நீக்கயதால் முஸ்லிம்களின் வாக்குகள் தனக்கு கிடைக்காமல் போய்விடும் என்ற அச்சத்தில் ஜனாதிபதி இந்த யோசனையை ஏற்றுக்கொண்டுள்ளதாகக் கூறப்படுகிறது.

எவ்வாறாயினும், முஸ்லிம் சமூகம் பாரிய நெருக்கடிகளை சந்தத்துள்ள நிலையில், முஸ்லிம் தலைவராக தன்னை அடையாளம் காட்டிக்கொள்ளும் முஸம்மில், ஆளுநர் பதவியைப் பெற்றுக்கொண்டது, முஸ்லிம் சமூகத்தின் மத்தியில் பாரிய அதிருப்தியை ஏற்படுத்தியுள்ளது,

மைத்திரிபால சிறிசேனவும் மகிந்த ராஜபக்சவும் முஸ்லிம்களின் வாக்குகளை ஓரளவுக்காவது பெற்றுக்கொள்ளவே இவ்வாறானா நகர்வுகளை முன்னெடுத்து வருவதாக சுட்டிக்காட்டப்படுகிறது.

 

Comment (0) Hits: 151

இனவாதத்திற்கு இரையானது வருந்தத்தக்கது : சுமந்திரன்

முஸ்லிம் அமைச்சர்கள் இனவாதத்திற்கு இரையானது வருந்தத்தக்கது என பாராளுமன்ற உறுப்பினர் எம்.ஏ சுமந்திரன் தெரிவித்துள்ளார்.

அமைச்சரவை அந்தஸ்து உள்ள அனைத்து முஸ்லிம் அமைச்சர்கள், பிரதி அமைச்சர்கள் மற்றும் இராஜாங்க அமைச்சர்களும் தங்களது பதவிகளை இராஜினாமா செய்தமை தொடர்பிலேயே அவர் இவ்வாறு தெரிவித்துள்ளார்.

தமிழ் தேசியக் கூட்டமைப்பின் உத்தியோகபூர்வ டுவிட்டர் தளத்தில் பதிவு ஒன்றை பதிவிட்டு அவர் இதனை தெரிவித்துள்ளார்.

குறித்த பதிவில், முஸ்லிம் அமைச்சர்கள் இனவாதத்திற்கு இரையானது வருந்தத் தக்கது. நேற்று நாம், இன்று நீங்கள் நாளை இன்னொரு ‘மற்றவர்’. முஸ்லிம் மக்களோடு நாம் தொடர்ந்து தோழமையோடு நிற்போம். நேர்ச்சிந்தனையுள்ள அனைத்து இலங்கையரையும் அதையே செய்யுமாறு அழைக்கிறோம் என அவர் மேலும் குறிப்பிட்டுள்ளார்.

Comment (0) Hits: 148

இலங்கை வரலாற்றில் இன்னுமொரு சாபக்கேடான நாள்

இனவாத பிக்குகள் சிலரின் அழுத்தங்களுக்கு அடிபணிந்து பிரதமர் பண்டாரநாயக்க 1958ஆம் ஆண்டு ஏப்ரல் 09ஆம் திகதி பண்டாரநாயக்க - செல்வநாயகம் ஒப்பந்தத்தை கிழிந்தெறிந்த கறுப்பு தினத்தின் பின்னர் வரலாற்றில் மீண்டுமொரு சாபக்கேடான தினமாக ஜூன் 03ஆம் திகதி மாற்றியுள்ளதாக நிதியமைச்சர் மங்கள சமரவீர சுட்டிக்காட்டியுள்ளார்.

அரசாங்கத்தில் அங்கம் வகிக்கும் முஸ்லிம் உறுப்பினர்கள் தமது அமைச்சுப் பதவிகளில் இருந்து விலகுவதாக அறிவிக்க அலரி மாளிகைக்குச் சென்றிருந்த போதே நிதியமைச்சர் மங்கள சமரவீர இதனைத் தெரிவித்துள்ளார். இனவாத ரீதியான பிக்குகள் சிலரின் அச்சுறுத்தலுக்கு அரசியல் தலைவர்கள் அடிபணிந்து, பதவி விலக கூடாது எனவும் மங்கள சமரவீர இதன்போது கேட்டுள்ளார்.

இலங்கையின் முன்னாள் பிரதமர் எஸ்.டபிள்யூ.ஆர்.டி. பண்டாரநாயக்க மற்றும் இலங்கையின் பிரதான தமிழ் அரசியல் கட்சியின் தலைவர் எஸ்.ஜே.வீ. செல்வநாயகம் ஆகியோருக்கிடையே 1957ஆம் ஆண்டு ஜூலை 26ஆம் திகதி கையெழுத்தாகவிருந்த ஒப்பந்தம் பண்டாரநாயக்க - செல்வநாயகம் ஒப்பந்தம் என அடையாளப்படுத்தப்பட்டது. ஒரு சில இனவாத பிக்குமாரின் அழுத்தங்களினால் அந்த ஒப்பந்தத்தில் கையெழுத்திடுவதை பண்டாரநாயக்க தவிர்த்துக் கொண்டார்.

Mangala rathana gnanasara

முஸ்லிம் தலைவர்கள் மட்டும் தமது அமைச்சுப் பதவிகளில் இருந்து விலகுவது என்பது தேசிய, சர்வதேச ரீதியில் தேவையற்ற அழுத்தங்களைக் கொண்டுவரும் என்றும் அமைச்சர் இதன்போது சுட்டிக்காட்டியுள்ளார். இந்த நிலைமையைத் தவிர்ப்பதற்காக தானும் உடனடியாக தமது நிதியமைச்சுப் பதவியில் இருந்து விலகுவதற்குத் தயார் எனக் கூறியுள்ளார்.

எனினும், பிரதமர் ரணில் விக்ரமசிங்கவும், முஸ்லிம் தலைவர்களும் நிதியமைச்சுப் பதவியில் இருந்து தாங்கள் விலகக் கூடாது என மங்கள சமரவீரவிடம் கோரிக்கை விடுத்துள்ளனர்.

''அன்று பண்டாரநாயக்கவிற்கு முதுகெலும்பிருக்கவில்லை. இதனால் ஏற்பட்ட அழிவுகளை அனுபவரீதியாக நாம் உணர்ந்துகொண்டோம். எமது தலைவர்களுக்கு முதுகெலும்பில்லை. அரசியல் அதிகாரத்தை மதத் தலைவர்கள் கட்டுப்படுத்துவது அபாயகரமானது.'' என்று மங்கள சமரவீர இதன்போது தெரிவித்துள்ளார்.

எனினும், முஸ்லிம் தலைவர்களும், பிரதமரும் அமைச்சர் மங்கள சமரவீரவை சமாதானப்படுத்தி, தீர்மானத்தை மாற்றுமாறு கோரியுள்ளனர்.

இதன்பின்னர் நிதியமைச்சர் மங்கள சமரவீர, டுவிட்டர் செய்தியொன்றை வெளியிட்டிருந்தார்.

''புத்தரைப் புதைத்து, அந்த புனிதப் பெயரால் காவு உடுத்தவர்களினால், வெறுப்பைக் கக்கும் போது அந்த தர்மத்திற்கமைய செயற்படும் நிலை முஸ்லிம் தலைவர்களுக்கு ஏற்பட்டுள்ளது. எமது தாய்நாட்டிற்கு இன்னுமொரு வெட்கக்கேடான நாள் இது.

பௌத்த பீடாதிபதிகளின் கருத்துக்கள் :

பண்டாரநாயக்க - செல்வநாயகம் ஒப்பந்தம் கையெழுத்திடப்படாததால், இலங்கை பாரிய அழிவுகளை சந்திக்க நேரிட்டது என மல்வத்து பீடாதிபதி இதற்கு முன்பொரு சந்தர்ப்பத்தில் குறிப்பிட்டிருந்தார். கூட்டு எதிர்க்கட்சிகளின் தலைவராக தினேஸ் குணவர்தன 2017ஆம் ஆண்டு ஓக்டோபர் மாதம் மல்வத்து பீடாதிபதியைச் சந்தித்தபோதே அவர் இதனைத் தெரிவித்தார்.

நேற்று அரங்கேற்றப்பட்ட அடிப்படைவாத செயற்பாடுகள் குறித்து சமூக வலைத்தளங்களிலும் வாதப் பிரதிவாதங்கள் ஏற்பட்டிருந்தன. பண்டாரநாயக்க - செல்வநாயகம் ஒப்பந்தம் தடுக்கப்பட்ட பின்னர் இலங்கைக்கு அரசியல் ரீதியாக பௌத்த பிக்குகளினால் ஏற்படுத்தப்பட்ட பாரிய அழிவே நேற்றைய சம்பவம் என விமர்சிக்கப்பட்டுள்ளது.

 

Comment (0) Hits: 167

கார்தினல் MR எரிகிற இனவாதத் தீயில் எண்ணெய் ஊற்றுகிறார்

கார்தினால் மெல்கம் ரஞ்ஜித் ஆண்டகை நேற்று (03) பிற்பகல் கண்டிக்குச் சென்று உண்ணாப் போராட்டத்தை முன்னெடுத்துவந்த அத்துரெலியே ரத்தனதேரரைச் சந்தித்தார்.

அத்துரெலியே ரத்தனதேரரின் நிலைமையைக் கேட்டறிந்தமை குறித்து டுவிட்டர் செய்தியொன்றை நிதியமைச்சர் மங்கள சமரவீர பதிவிட்டிருந்தார்.

Mangala Twetter

''கார்தினால் MR இரத்தனதேரரைச் சந்தித்து எரிகிற இனவாதத் தீயில் எண்ணெய் ஊற்றகிறார்'' வத்திக்கான் இதனைக் குறித்துக்கொள்ள வேண்டும். என்றும் அந்த டுவிட்டர் செய்தியில் குறிப்பிடப்பட்டிருந்தது.

 

அத்துரெலியே ரத்தன தேரரை கார்தினால் மெல்கம் ரஞ்சித் ஆண்டகை சந்தித்தமை குறித்து சமூக வலைத்தளங்களிலும் விமர்சனத்திற்கு உட்படுத்தப்பட்டிருந்தது.

மதத் தலைவர்கள் சமூகங்களுக்கிடையில் ஒற்றுமையை ஏற்படுத்த வேண்டும் என்பதற்குப் பதிலாக சமூகங்களுக்கிடையில் இனவாத ரீதியான பாகுப்பாட்டை இவ்வாறான சந்திப்புக்கள் ஏற்படுத்துவதாக கடுமையான விமர்சனங்கள் முன்வைக்கப்பட்டன.

 

Comment (0) Hits: 149

மஹிந்த சொன்னாலும் மைத்திரிக்கு ஜனாதிபதி வேட்பாளர் கிடையாது

எதிர்க்கட்சித் தலைவர் மஹிந்த ராஜபக்ச சொன்னாலும், தற்போதைய ஜனாதிபதி மைத்திரிபால சிறிசேனவிற்கு ஜனாதிபதி வேட்பாளர் பதவி கிடையாது என நாடாளுமன்ற உறுப்பினர் பிரசன்ன ரணதுங்க தெரிவித்துள்ளார்.

எதிர்வரும் ஜனாதிபதி தேர்தலில் தைத்திரியை களமிறக்கும் எந்தவிதமான திட்டமும் கிடையாது என அவர் குறிப்பிட்டுள்ளார்.

நாடு எதிர்நோக்கியுள்ள நெருக்கடியான நிலைமைகளுக்கு ஜனாதிபதியும் பொறுப்பு சொல்ல வேண்டுமென தெரிவித்துள்ளார்.

உடுகம்பொல பிரதேசத்தில் வைத்து ஊடகவியலாளர்களிடம் அவர் இதனைக் குறிப்பிட்டுள்ளார்.

நல்லாட்சி அரசாங்கம் மீது மக்கள் கடும் அதிருப்தி கொண்டுள்ளதாகத் தெரிவித்துள்ளார்.

Comment (0) Hits: 140

பக்கம் 54 / 70